Read Batak Angkola 2 RAJA-RAJA 23 Bible Online

2 RAJA-RAJA 23 - Batak Angkola bible

2 RAJA-RAJA 23

¹Dipiohon Raja Josia ma sude pamimpin ni Juda dohot Jerusalem

²lalu rap kehe ma halahi tu Bagas Ni Debata, diihutkon angka malim, angka panurirang dohot rayat sudena na pogos dohot na kayo. Di jolo ni halahi sude jongjong ma raja i di lambung ni pilar i, disise raja i ma gogo sude isi ni buku parjanjian na baru dapot i di bagasan Bagas Ni Debata.

³Dung i dibaen raja i ma parjanjian dohot TUHAN anso burju mangoloi tuSia dohot mandalankon sian sandok roha dohot sandok ate-ate sude parenta dohot angka tonaNia jana gohanna ma aturan ni parjanjian ni TUHAN dohot bangsoNa na tarsurat di bagasan buku i. Dohot do sude rayat marjanji anso burju mangoloi parjanjian i.

⁴Dung salpu i, diparentahon raja i ma tu Malim Godang Hilkia, angka malim pambantu dohot angka pangawal na markarejo di pintu ni Bagas Ni Debata anso diparuar sian Bagas i sude panjamaan na dipake laho mamele Baal, debata boru-boru Asera dohot angka binatang. Ditutung raja i ma sudena i di ruar ni kota di lambung ni Rura Kidron, jana tiranggongna i dioban tu Betel.

⁵Dung i dipaantak ia ma angka malim na dung niangkat ni angka raja ni Juda na markarejo di langgatan ni angka debata di angka kota ni Juda dohot di na humaliang Jerusalem, songon i muse angka malim na mamelehon haul tu Baal, tu mataniari, bulan, planet dohot angka bintang.

⁶Laing diparuar ia muse do patung ni Debata Asera sian Bagas Ni Debata i, dioban ma i tu balian ni kota tu Rura Kidron. Ditutung ma disi patung i, diduda ma tiranggongna i lamot, jana disampakkon ma abuanna i tu ginjang ni kuburan ni halak na bahat.

⁷Angka bilik ni Bagas Ni Debata na nipake ni angka parkamainan ni pamelean[7] laho marcampur songon dalan marsomba tu na dipardebata laing disegohon ia do i. (Di bagasan kamar i ma angka dadaboru martonuni abit na giot sipakeon di na mamele tu debata boru-boru Asera.)

⁸Angka malim na di kota ni Juda, dioban ia ma tu Jerusalem, dung i sanga na didia adong di luat i mamungka sian Geba lopus tu Barseba, dihodari ma angka langgatan ni debata, i ma inganan ni angka malim i songon na somal mamelehon haul. Nada dipatola be angka malim i mangkobasi di Bagas Ni Debata, tapi anggo roti na so marragi na niparade di angka dongan ni halahi tola do panganon ni halahi. Angka langgatan hapunjungan ni debata na di lambung ni Horbangan Josua walikota ni luat i, disegohon do. Sabola siambirang do Horbangan i muda laho masuk iba tu kota mamolus sian Horbangan Godang.

⁹

¹⁰Tofet, i ma inganan pamelean ni debata na di Rura Hinom, dipahodar do. Jadi dung songon i nada adong be tarbaen halak laho mamelehon dakdanakna songon haul situtungon di Debata Molok.

¹¹Sandok kudo na gabe hapunjungan dibaen angka raja ni Juda laho marsomba mataniari, diambungkon, jana angka kareta na nipake di pamelean i, ditutungi (di alaman ni Bagas Ni Debata do dibaen angka kareta i — di lambung ni Horbangan — nada sadia dao sian inganan ni si Natan Melek, i ma sahalak pagawe tinggi).

¹²Angka langgatan na nipajongjong ni angka raja ni Juda di tarup ni bilik ni Raja Ahas, disego-sego. Songon i angka langgatan na nipajongjong ni Raja Manase di alaman ni Bagas Ni Debata na dua i, disego-sego do i jana diambungkon tu Rura Kidron.

¹³Songon i muse angka langgatan na di Habincaran ni Jerusalem, di Selatan ni Dolok Hajahatan, dipahodar; Raja Salomo do na pajongjongkon angka langgatan i laho marsomba tu angka debata sihagigian, i ma Astoret debata boru-boru ni halak Sidon, Kamos debata ni halak Moab dohot Milkom debata ni halak Amon.

¹⁴Angka tugu ni debata dohot patung ni debata boru-boru Asera, dirunggangkon jana angka tano hajongjongan ni angka tugu dohot patung i, ditimbun ma tusi angka holi-holi ni jolma.

¹⁵Ditutung ma patung ni debata boru-boru Asera jana inganan pamelean na di Betel disegohon. Raja Jerobeam anak ni si Nebat do na pajongjong pamelean i — i ma raja na mambaen halak Israel mardosa.

¹⁶Di na manaili si Josia, diida ia ma angka kuburan di ginjang ni dolok. Gabe disuru bungkar ia ma tu halak kuburan i jana ditutungi ma holi-holina i di ginjang ni langgatan na di Betel, dung i ditapor-tapor ia ma langgatan i, markite-hite dalan on dipahodar ia ma angka langgatan. Jadi gabe tulus ma tarjadi na nidok ni panurirang ni TUHAN narobi hatiha jongjong Raja Jerobeam di lambung ni inganan i di sada ari pesta. Dung i diida Raja Josia muse ma sada nari kuburan.

¹⁷Jadi marsapa ma ia, “Kuburan ni ise dehe on?” Dialusi angka halak na di Betel i ma tusia, “Kuburan ni sada halak panurirang ni TUHAN do da i. Jungada ia ro tuson sian Juda, jana ia ma na paboahon hian na nipatupa ni raja i tu angka kuburan na di Betel on.”

¹⁸“Ulang nihahua anggo kuburan i,” ning raja i. “Ulang papinda hamu holi-holina i, padiar hamu ma disi.” Jadi nada dihahua anggo holi-holi ni panurirang na sian Juda i, songon i muse holi-holi ni panurirang na sian Samaria na dikubur disi.

¹⁹Di ganop kota na di Israel, dirumpakkon Raja Josia do sude inganan pamelean ni gana-ganaan na nibaen ni angka raja ni Israel, na pasunggul-sunggul muruk ni TUHAN. Sanga na songon dia dibaen Raja Josia di Betel, dipatupa ia muse do songon i tu angka langgatan di sandok Israel.

²⁰Sanga ise malim na so marsomba tu Debata, dibunu ia di ginjang ni angka langgatan inganan pamelean ni halahi hian. Jana di sude langgatan i, ditutungi si Josia angka holi-holi ni jolma. Dung i mulak ma ia tu Jerusalem.

²¹Dung i diparentahon Raja Josia ma rayat i anso mamestahon Paskah songon na tarsurat di Buku Parjanjian i. Songon i ma dalanna dipasangap halahi TUHAN, Debata ni halahi.

²²Paskah na songon i nada unjung be dipestahon haru pe di hatiha ni angka halak na tarbarita dope di hatiha ni angka raja-raja.

²³Di taon pasalapan bolaskon pe dung mamarenta si Josia baru ma anso dipestahon mangulahi Paskah i di Jerusalem laho pasangap TUHAN.

²⁴Laho patuluskon angka tona na tarsurat di buku na dapot ni Malim Godang Hilkia di Bagas Ni Debata i, dipaorot Raja Josia ma sian Jerusalem dohot sude Juda sanga ise na marpio sumangot dohot partondung, jana diambungkon sude debata ni rumahtangga, gana-ganaan dohot barang-barang na nipake laho mamele angka debata.

²⁵Nada unjung dope adong sada raja na songon Raja Josia pangoloina tu TUHAN sian sasude situtu ni rohana jana na patuduhonsa di sude pardalan ni ngoluna dohot pangalahona, hombar tu sude tona na dapot di buku ni si Musa. Dung Raja Josia, nada adong be raja na songon ia.

²⁶Hape anggo pangalaho ni Raja Manase na hum parohon muruk ni TUHAN do maradopkon Juda; jana lopus saonnari laing na so mombun dope roha ni TUHAN.

²⁷Didok TUHAN do, “Sanga aha na dung Hubaen tu Israel, laing baenonKu do dohot tu Juda. Angkon Hubuang halak Juda i, sian tano na dung Hulehen tu halahi. TulahonKu noma Jerusalem kota na Hutodo i dohot bagasKon pe, na dung Hudok hian inganan marsomba tu Au.”

²⁸Barita na asing taringot tu Raja Josia madung disuratkon di Buku Sejarah Ni Raja-raja Juda.

²⁹Hona bunu ma Raja Josia di Megido di na kehe ia tusi mandapotkon si Neko raja ni Mesir na topet hatiha ro rap dohot tentarania laho mamorangi raja Asur na di topi ni Batang aek Efrat.

³⁰Dibuat angka pagawena i ma bangke ni Raja Josia i jana dioban halahi ma markareta mulak tu Jerusalem. Disi ma ia dikuburkon di kuburan ni raja-raja. Dung i dipili jana diangkat rayat ni Juda ma anaknia si Joahas gabe raja gontinia.

³¹Marumur dua pulu tolu taon ma si Joahas di na gabe raja ia di Juda, jana tolu bulan do honokna mamarenta ia di Jerusalem. Si Hamutal do goar ni inangnia boru ni si Jeremia sian kota Libna.

³²Songon angka ompungna do si Joahas mardosa adop TUHAN.

³³Marujung ma pangarajaion ni si Joahas di na tartangkup ia dibaen si Neko raja ni Mesir di Ribla na di Luat Hamat, jana dipaksa ia ma Juda manggarar pajak tusia 3.400 kilo perak dohot sere tolu pulu opat kilo.

³⁴Dung i diangkat Raja Neko ma si Eliyakim anak ni si Josia gabe raja ni Juda, jana digonti ia ma goarna gabe si Joyakim. Dioban ia ma si Joahas tu Mesir jana disi ma marujung ngoluna.

³⁵Laho manggarar pajak na niigil ni raja Mesir i, dipalagut Raja Joyakim ma pajak sian rayat marguru tu gogo ni halahi be.

³⁶Marumur dua pulu lima taon ma si Joyakim na gabe raja ia di Juda, jana sabolas taon honokna mamarenta ia di Jerusalem. Si Zebudo do goar ni inangnia boru ni si Pedaya sian kota Ruma.

³⁷Songon angka ompungna do si Joyakim mardosa maradopkon TUHAN.