Read Batak Angkola 2 RAJA-RAJA 24 Bible Online

2 RAJA-RAJA 24 - Batak Angkola bible

2 RAJA-RAJA 24

¹Dompak mamarenta Raja Joyakim, disi ma ro si Nebukadnesar raja ni Babel patundukkon Juda. Tolu taon honokna tunduk si Joyakim tu si Nebukadnesar, dung i mangalo ia muse.

²Jana laing songon na nidok ni TUHAN marhite angka panurirang naposoNia i, ditongos TUHAN ma angka garombolan na marsinjata sian halak Babel, Siria, Moab dohot Amon laho mangalo si Joyakim jana dipasude ma Juda.

³Masa pe songon i hara ni na dung didok TUHAN do na giot buangon anggo bangso Juda sian tano na nilehen ni TUHAN tu halahi. Patunda ni dosa na nibaen ni Raja Manase ma umbaen na dibuang halahi;

⁴lumobi ma i hara ni pamunuon na nibaennia maradopkon angka halak na so marsala, inda ra TUHAN manyesa dosa ni Manase hara ni angka pambaenanna.

⁵Sudena luat, mamungka sian Batang aek Efrat lalu tu parbatasan ni Mesir sabola Utara na masuk daerah ni raja Mesir, dikuasoi raja ni Babel. Hara ni i, nada jungada be ruar raja ni Mesir sian luatnia laho marporang. Barita na asing taringot tu Raja Joyakim madung disuratkon di Buku Sejarah Ni Raja-raja Juda. Dung marujung ngolu ni si Joyakim, anaknia si Joyakin ma gabe raja gontinia.

⁸Marumur salapan bolas taon ma si Joyakin di na gabe raja ia di Juda jana tolu bulan honokna mamarenta ia di Jerusalem. Si Nehusta do goar ni inangnia boru ni si Elnatan sian Jerusalem.

⁹Laing songon amangna i do si Joyakin mardosa maradopkon TUHAN.

¹⁰Di na mamarenta si Joyakin, ro ma tentara ni halak Babel na nipimpin ni angka perwira ni si Nebukadnesar laho mamorangi Jerusalem lalu manghobuk kota i.

¹¹Di hatiha na manghobuk kota i, ro ma si Nebukadnesar tu Jerusalem,

¹²jana disi ma Raja Joyakin, inangnia, angka dakdanaknia, angka perwirania dohot angka pagawenia menyerah tu si Nebukadnesar. Jadi ditaban ma si Joyakin. Di taon pasalapankon ma i masa dung mamarenta si Nebukadnesar.

¹³Disego-sego si Nebukadnesar ma sude parkokas na nibaen ni Raja Salomo sipakeon di Bagas Ni Debata jana dioban ia ma tu Babel sude barang sigodang arga na adong di Bagas i dohot di bagas godang. Songon i ma na masa i, hombar tu na nidok ni TUHAN hian.

¹⁴Raja Joyakin, angka dadaborunia, inangnia dohot angka pagawe ni bagas godangnia ditaban si Nebukadnesar ma i sudena jana dioban tu Babel. Pitu ribu halak angka na malo, saribu halak parkarejo na malo, masuk ma disi angka pande bosi, dohot hona oban; angka halak na malo marporang do i sudena. Sudena na nioban tu habuangan i, dohot ma disi bagian parbagas godang dohot angka halak na pistar, adong ma hira-hira sampulu ribu halak sudena. Hampir do sude halak na mangingani Jerusalem dioban tu habuangan i. Hum angka rayat na umpogos ma na tading.

¹⁷Dung i diangkat si Nebukadnesar ma si Matania uda ni si Joyakin gabe raja di Juda, digonti ia muse ma goarna gabe si Zedekia.

¹⁸Marumur dua pulu sada taon ma si Zedekia di na gabe raja ia di Juda jana sabolas taon honokna mamarenta ia di Jerusalem. Si Hamutal do goar ni inangnia boru ni si Jeremia sian kota Libna.

¹⁹Laing songon Raja Joyakin, Raja Zedekia pe mardosa do tu TUHAN.

²⁰Sun do muruk ni TUHAN maradopkon halak na maringanan di Jerusalem dohot halak Juda jabat nada diparrohahon Ia be halahi.