Read Batak Angkola 2 RAJA-RAJA 3 Bible Online

2 RAJA-RAJA 3 - Batak Angkola bible

2 RAJA-RAJA 3

¹Di taon pasalapan bolaskon dung raja si Josafat di Juda, gabe raja ma si Joram anak ni si Ahab di Israel jana mamarenta ma ia di Samaria dua bolas taon honokna.

²Mardosa do ia tu TUHAN, tapi nada pola songon si Ahab dohot si Isebel natorasna i jahatnia. Angka patung na nibaen ni amangnia i laho manyomba Baal, madung disego-sego ia.

³Tapi laing songon Raja Jerobeam anak ni si Nebat na mamarenta painte so ia, laing mardosa do halak Israel hara ni ia jana sai dikarejohon ia do manyomba na songon i.

⁴Jadi adong do parmahanan ni biri-biri ni si Mesa raja ni Moab. Ganop taon, sai dilehen ia do anak ni biri-biri 100.000 dohot imbulu ni 100.000 biri-biri jantan songon pajakna tu raja ni Israel.

⁵Hape dung mate Raja Ahab, mangalo ma si Mesa tu halak Israel.

⁶Jadi hara ni i, ditadingkon Raja Joram ma Samaria jana kehe ma ia manyuru sude parangannia anso markobas.

⁷Ditonahon ia ma songon on tu si Josafat raja ni Juda, “Mangalo do raja ni Moab tu au, ra do ho mandongani au marporang mangalo ia?” “Denggan,” ning Raja Josafat. “Dohot do au rap dohot angka donganku dohot angka paranganku na markudo.

⁸Sian dia ma dalan baenonta laho mangaroro?” “Sian dalan Parhorsihan Edom ma tabolus,” ning si Joram.

⁹Jadi kehe ma Raja Joram rap dohot raja ni Juda dohot raja ni Edom. Jadi dung jabat pitu ari halahi na mardalan i, abis ma aek, gabe nada adong be inumon ni parangan dohot binatang na nibobanan.

¹⁰Dung i didok Raja Joram ma, “Na dung ditahi roha ni Debata do lakna laho pasahatkon hita na tolu tu raja Moab!”

¹¹Marsapa ma Raja Joram, “Adong dehe ulaning panurirang dison na gabe dalanta mangido panogu-noguon tu TUHAN?” Dialusi sahalak parpangkat sian tentara ni Raja Joram ma, “Dison do si Elisa anak ni si Safat. Pangurupi ni si Elia do ia na salpu i.”

¹²“Tutu do manghobari Debata markite-hite ia,” ning Raja Josafat. Jadi kehe ma raja na tolu i manopot si Elisa.

¹³“Aha urusanku tu ho?” ning si Elisa tu raja ni halak Israel i. “Tu angka panurirang ni amangmi ma ho kehe.” “Nada!” ning si Joram mangalusi. “Angke na nisangkap ni TUHAN do laho pasahatkon hami na tolu tu raja Moab.”

¹⁴Dialusi si Elisa ma, “Hara ni TUHAN na mangolu i na sai huoloi, tangkas ma hudok, anggo ulang hara ni Raja Josafat raja ni Juda, nada ra au marpanatap tu ho.

¹⁵Saonnari oban ma tuson sahalak parhasapi.” Jadi hatiha marhasapi bayo i, digohi Tondi Ni TUHAN ma si Elisa

¹⁶jabat didok ia, “On ma na nidok ni TUHAN, ‘Baen ma angka bondar-bondar di rura on.

¹⁷Haru pe nada adong diida hamu ro udan sanga alogo na mangombus, tapi marlobi-lobi do aek di rura on. Tuk ma inumonmunu aek, di hamu dohot di pahan-pahanan maradu angka binatang boban i.’ ”

¹⁸Didok si Elisa ma muse, “Tapi anggo na songon i, parkaro na menek dope i di TUHAN. LehenonNia do hamonangan di hamu maralohon halak Moab.

¹⁹Roncohononmunu ma sude kota ni halahi na marparik dohot na jeges-jeges; sude bona ni suan-suananna tabaonmunu, sude mual ni aek tutuponmunu, jana sude ladang ni halahi angka na napu dangguranmunu dohot batu lopus sego sudena.”

²⁰Ancogotna i di na pasahatkon haul manyogot, ro ma da aek na mabaor sian Edom lopus gok rura i.

²¹Jadi dung tarbege tu halak Moab na ro raja na tolu i mangaroro, gabe sude ma halak — sian na tumobang lalu tu na umposo — na tarbaen maniop sinjata, diarahon ia ma jana dibaen di batas.

²²Ancogotna i di na ngot halahi manyogot i, disondangi mataniari ma aek i jabat rara idaon songon mudar.

²³Marsurak ma halahi, “Mudar! Tontu na dung marsibunuan do pasukan ni raja na tolu i! Keta ma tarampas tu parbandaran ni halahi i!”

²⁴Hape di na lalu halak Moab i di parbandaran i, mundur ma halahi diroro halak Israel na torus monang jana mamunui halahi;

²⁵angka kota ni halahi pe dironcohon ma. Sandok ladang na napu na nibolus ni halahi, didangguri halahi ma dohot batu. Ujungna sude ladang gok batu noma. Disumpol halak Israel muse ma sude mual ni aek jana ditabai halahi ma bona ni suan-suanan. Hum kota Kirhareset noma na tinggal, i ma kota sabungan ni Moab. Ujungna dihobuk muse ma kota i, didangguri angka pandangguri ma dohot batu.

²⁶Dung diboto ia na so lobas ia be martahan, dioban ia ma pitu ratus halak parajurit na malo mamake podang, dicubo ma manompas partahanan ni Raja Edom, hape nada lobassa.

²⁷Jadi gabe dibuat ia ma anak na giot panggontinia lalu dihaulkon ia ma i di ginjang ni tembok ni kota i gabe haul tu dewa ni Moab. Gabe mabiar ma[2] angka halak Israel, jabat ditarik halahi pasukanna sian kota i lalu mulak tu luat ni halahi.