Read Batak Angkola 2 RAJA-RAJA 4 Bible Online

2 RAJA-RAJA 4 - Batak Angkola bible

2 RAJA-RAJA 4

¹Sanoli ro ma sahalak na manghabaluhon sada panurirang tu si Elisa, didok ma, “Amang, madung jumolo halaklahingku! Tangkas do diboto amang haburjuonnia mangoloi Debata, tapi marutang do ia tu halak. Saonnari giot buaton ni bayo i ma anakku na dua i giot baenonnia gabe hatobannia.”

²“Bia ma baenonku mangurupi ho inang?” ning si Elisa. “Aha do na adong di bagasmunu?” “Nada adong sanga na aha, asing sian miak zetun sabotol na menek,” ning ia mangalusi.

³Jadi didok si Elisa ma, “Kehe ma hamu manginjam gunci-gunci tu angka hombar bagasmunu.

⁴Dung i masuk ma hamu dohot dakdanak i tu bagas jana tutup hamu ma pintu. Dung i usehon hamu ma miak i sian gunci na menek i tu bagasan ni angka gunci i jana paasing hamu ma angka na dung gok i.”

⁵Jadi mulak ma na mabalu i tu bagasnia. Dung masuk ia dohot dakdanaknia i, ditutup ma pintu; dibuat ia ma gunci na menek i na marisi miak zetun i, diusehon ia ma miak i tu bagasan gunci na nilehen ni anaknia i.

⁶Dung gok sude angka gunci i, dipangido ia ma sada nari botol. “Inda adong be,” ning sahalak sian anaknia i. Jadi mantak ma use miak i.

⁷Dung i kehe ma na mabalu i mangulahi mandapotkon si Elisa, jana didok si Elisa ma, “Gadis ma miak i manggarar sude utangmi, jana lobina i tuk ma i pangoluhon hamu inang dohot dakdanak i.”

⁸Adong ma sada dadaboru na mora di kota Sunem. Sanoli hatiha kehe si Elisa tu Sunem, diontang anakboru i ma ia mangan. Mamungka sian i, ganop ro si Elisa tu Sunem, sai di bagas ni dadaboru i do ia mangan.

⁹Dung i didok dadaboru i ma tu halaklahinia, “Porsaya do au anggo bayo na sai maradian i dison, tutu situtu do i naposo ni Debata.

¹⁰Denggan do muda tabaen sada kamar di tirket parginjang di bagasta on, tapasingkop ma sude podomanna, meja, karosi dohot lampu anso tarbaen ia disi marborngin ganop ro ia manopot hita.”

¹¹Sanoli ro muse ma mangulahi si Elisa tu Sunem. Dung manaek ia tu biliknia laho maradian,

¹²disuru ia ma si Gehasi pangurupinia, mamiohon dadaboru i. Dung ro anakboru i,

¹³didok si Elisa ma tu si Gehasi, “Sapai ma jolo tusia sanga na bia baenonku mamalos halojaonnia hara ni hita. Betak bia sai por rohania anso kehe au mandapotkon raja sanga kapala ni tentara laho mangkatai haporluannia.” Dialusi dadaboru i ma, “Rap dohot sisolkotku do au tinggal, nada pola adong sanga na aha hahuranganku.”

¹⁴Jadi disapai si Elisa ma si Gehasi, “Antong anggo songon i, aha do na tarbaen au tu haporluannia?” Dialusi si Gehasi ma, “Nada maruntungan ia, jana halaklahinia pe madung matobang.”

¹⁵“Antong piohon ma dadaboru i,” ning si Elisa. Jadi ro ma dadaboru i jana jongjong ma ia di jolo ni pintu i.

¹⁶Jadi didok si Elisa ma tusia, “Taon na ro songon on ma hatihana, marompa anak halaklahi ma ho inang.” “Ulang ma margabus amang!” nina dadaboru i. “Naposo ni Debata do amang!”

¹⁷Tapi tutu do na nidok ni si Elisa i. Di taon na mangihut, hira-hira di hatiha na sarupa, sorang ma sada anak ni dadaboru i halaklahi.

¹⁸Dung magodang dakdanak i, sanoli manyogot di hatiha ni sabion, didapotkon dakdanak i ma amangna na topet di ladang rap dohot halak na manyabi gandum.

¹⁹Jadi ompot ma marsurak dakdanak i tu amangna, “Amang! Hancit ulungku!” ning ia. “Oban jolo dakdanak on tu inangna,” ning amangna i mandok sada pangurupi.

²⁰Jadi dioban ma dakdanak i tu inangna, diabing inangna i ma manigor. Hape andospotangna i mate ma dakdanak i.

²¹Dioban inangna i ma tu ginjang ni podoman i. Dung i ruar ma ia ditutup ia pintu i,

²²kehe ma ia mamio halaklahinia i. Didok ia ma, “Suru jolo sahalak pangurupi tuson maroban sada halode. Giot tibu au kehe mandapotkon Panurirang Elisa, jana manigor mulak do au.”

²³“Biasi ingkon sai saonnari ho kehe?” ning halaklahinia i manyapai. “Nada Ari Sabat da sadari on, jana nada Ari Pesta Bulan Na Imbaru.”[3] “Nada pola na bia,” ning ia.

²⁴Dung dipasang ia palano ni halode i, didok ia ma tu pangurupinia i. “Pacu ma halode on sahipas-hipasna marlojong; ulang urahi parhipasna anggo inda hudok.”

²⁵Jadi kehe ma dadaboru i tu Dolok Karmel tu inganan ni si Elisa. Sian na dao dope madung diida si Elisa dadaboru i ro. Jadi didok si Elisa ma tu si Gehasi, “Ligi ma, ro inanta na sian Sunem i!

²⁶Kehe ma ompoti mangalo-alo ia jana sapai sanga na bia pangalahonia dohot halaklahinia i bope dakdanaknia i.” Didok dadaboru i ma tu si Gehasi, denggan do sude.

²⁷Tapi disi lalu di jolo ni si Elisa, marsomba ma ia jana dihaol ia ma pat ni si Elisa. Sai giot diantahi ni si Gehasi do nian anso ulang disi ia, tapi didok si Elisa ma, “Padiar ma! Marsak do ia idaon. Tapi nada adong boa-boa ni TUHAN tu au!”

²⁸Didok dadaboru i ma, “Nada na hupangido anak tu ho amang. Laing hudok muse dope tu ho amang, anso ulang lehen di au arop ni roha na soada.”

²⁹Ditailihon si Elisa ma si Gehasi jana didok ia ma, “Patibu! Buat tungkotku, ompoti kehe tu bagas ni inanta on. Ulang ho maradian-adian di tonga dalan manjalang sanga na ise pe. Muda adong pe halak manjalang ho, ulang parsayang tingki laho manjalangsa. Disi lalu ho manigor payakkon ma tungkotki tu pamatang ni dakdanak i.”

³⁰Didok dadaboru i ma, “Amang Elisa! Hara ni TUHAN na mangolu i, bope hara ni hosamu amang, nada hutinggalkon ho amang!” Hara ni i gabe rap kehe ma si Elisa dohot dadaboru i tu bagasnia.

³¹Anggo si Gehasi madung parjolo giot mamayakkon tungkot ni si Elisa i tu pamatang ni dakdanak i, hape nada adong sora sanga gorak pe na asing na patandahon mangolu dakdanak i. Jadi gabe kehe ma si Gehasi mandapotkon si Elisa jana didok ia ma, “Nada tarsunggul dope dakdanak i.”

³²Dung lalu, masuk ma si Elisa sada ia tu biliknia i jana diida ia ma bangke ni dakdanak i bustang di ginjang ni podoman i.

³³Ditutup si Elisa ma pintuna i, martangiang ma ia tu TUHAN.

³⁴Dung i manungkap ma ia tu dakdanak i dipadamos ia ma pamangannia tu pamangannia i, matania tu matana i dohot tangannia tu tangan ni dakdanak i. Di na manungkap ia, mamungka ma las pamatang ni dakdanak i.

³⁵Jadi mardalani ma si Elisa pahae-pahulu di bagasan bilik i, dung i manungkap muse ma ia tu pamatang ni dakdanak i. Ujungna barsi-barsi ma dakdanak i pitu noli, jadi dipabolnang ia ma matania.

³⁶Disuru si Elisa ma si Gehasi mamiohon inang ni dakdanak i. Jadi dung masuk ina i didok si Elisa ma tusia, “Boan ma anakmon.”

³⁷Marsomba ma ina i di jolo ni si Elisa, jana dioban ia ma anaknia i tu ruar.

³⁸Dung i mulak ma si Elisa tu Gilgal di hatiha masa haleon di luat i. Jana di sada hatiha juguk ma angka panurirang di jolonia, mangkuling ma ia tu naposona, “Baen ma huali na gumodang i di ginjang ni api jana lompa ma panganon di angka panurirang i.”

³⁹Dung i kehe ma sada sian halahi tu kobun giot papunguhon angka ingkayu, dapot ia ma batang ni ancimun harangan jana diputik ma i bahatna sagendongan ni jubania. Dung mulak ia, torus diponggoli ia ma i tu bagasan huali i, harana inda ditanda halahi na so sipanganon do i.

⁴⁰Dung i disonduk ma sian pangalompaan i jana dilehen ma i tu angka panurirang i anso dipangan. Jana dung dipangan halahi sipanganon i, mangangguhi ma halahi tu si Elisa ninna ma, “Rasun di bagasan huali i, ale naposo ni Debata!” Dung i nada dipangan halahi be.

⁴¹Tapi didok si Elisa ma, “Buat ma topung!” Dipamasuk ia ma i tu bagasan huali huhut didok, “Saonari sonduk ma muse tu halak on, anso mangan halahi.” Jana inda adong be rasun di bagasan huali i.

⁴²Dung salpu i, ro ma sahalak sian Baal-Salisa. Diboan ia ma tu si Elisa dua pulu roti na dipature sian gandum patumona ni na nikarejohon, dohot saotik gandum na baru disabi di bagasan hadangan. Dung i didok si Elisa ma, “Lehen ma i tu halak na bahat on, anso mangan halahi.”

⁴³Tapi didok naposona i ma, “Dia ma tuk on panganon ni saratus halak?” Jadi dialusi si Elisa ma, “Lehen ma tu halahi anso dipangan,” harana songon on do didok TUHAN, “Angkon mangan do halahi jana marlobian dope.”

⁴⁴Dung i diparade ma i di jolo ni halahi, mangan ma halahi jana adong dope lobina, songon na nidok ni TUHAN.