Read Batak Angkola 2 RAJA-RAJA 5 Bible Online

2 RAJA-RAJA 5 - Batak Angkola bible

2 RAJA-RAJA 5

¹Si Naaman, i ma panglima ni tentara Siria. Holong do roha ni raja ni Siria i mida ia jana diargahon do ia. Harana markite-hite si Naaman, madung dilehen TUHAN hamonangan di tentara Siria. Hape marnyae hulit na jorbut ma si Naaman panglima ni tentara i.

²Sanoli tompu ma ro halak Siria mamorangi halak Israel. Di na mangaroro i, tartangkup ma sada dakdanak daboru sian halak Israel jana dioban ma gabe tabanan. Di pudi ni ari gabe pangurupi ni dadaboru ni si Naaman ma ia.

³Sanoli mangkatai ma pangurupi i tu morana i, “Sugari kehe tuan i manopot panurirang na di Samaria i, pasti tarpamalumsa tuan i.”

⁴Jadi dung tarbege tu si Naaman songon i, kehe ma ia mandapotkon raja i mancaritohon na nipaboa ni dakdanak i.

⁵Jadi didok raja i ma, “Denggan, kehe ma ho manopot raja ni Israel. Hubaen pe surat tusia.” Jadi kehe ma si Naaman, dioban ia ma tolu pulu ribu hepeng perak, onom ribu hepeng sere, dohot pakean na jeges-jeges sampulu pasang.

⁶Songon on ma hata ni surat na niobannia i, “Markite-hite surat on hupantadahon ma si Naaman panglimangku tu tuan i anso dipamalum tuan i ia sian nyaenia.”

⁷Di na nisise ni raja Israel i surat i, disibak-sibak ia ma pakeannia jana didok ia ma, “Hara ni aha dehe umbaen na dipangido ni raja Siria i au pamalumkon bayo on? Nada Debata au na markuaso pangoluhon sanga mamatehon jolma! Pasti na manjalak-jalahi bonsir do raja ni Siria i anso martangkangi dohot au!”

⁸Tarbege ma tu Panurirang Elisa pangalaho i jadi ditonahon ia ma tu raja i songon on, “Biasi sak rohamu? Tu au ma suruhon bayo i anso diboto ia na adong do sahalak panurirang di Israel on!”

⁹Jadi gabe kehe ma si Naaman dohot kudo bope karetania i. Dung lalu di bagas ni si Elisa maradian ma ia di jolo ni pintuna i.

¹⁰Jadi disuru si Elisa ma sahalak pangurupi laho mandok tu si Naaman songon on, “Kehe ma tuan i maridi pitu noli tu Batang aek Jordan, malum ma naron sude dihilala tuan i.”

¹¹Umbege i, kehe ma si Naaman hara ni muruknia. Didok ia ma, “Ninna roha ruar ma ia sandiri mandapotkon au, manigor martangiang tu TUHAN, Debatania i dohot mangapuskon tangannia di pamatangniba na marnyae on anso malum.

¹²Dumengganan dope Batang aek Albana dohot Batang aek Parpar na di Damaskus i martimbangkon sanga na batang aek dia pe di Israel on! Lobas au do maridi disi anso malum!”

¹³Tapi dipadonok angka pangurupinia ma tusia mandok, “Sugari disuru tuan i mambaen karejo na maol, pasti do patuluson ni tuan i. Mur ma hape hum maridi do disuru ia tuan i anso malum!”

¹⁴Jadi kehe ma si Naaman tu Batang aek Jordan, masuk ma ia markonong tu bagasan aek i pitu noli songon na nidok ni si Elisa i. Gabe malum ma si Naaman; torkis ma pamatangnia i mulak songon dia ma pamatang ni doli-doli.

¹⁵Kehe ma ia rap dohot dongannia sauduran i mangulahi mandapotkon si Elisa jana didok ia ma, “Saonnari huboto ma, hum sada do Debata di na satano on sude, i ma Debata na nisomba ni halak Israel; hara ni i, sai jop ma roha ni tuan i manjagit silehen-lehenkon.”

¹⁶Dialusi si Elisa ma, “Hara ni TUHAN na mangolu i na sai huoloi, nada tarjagit au sanga na silehen-lehen bagi aha pe.” Sai dielek-elek si Naaman ma si Elisa anso ra nian manjagit silehen-lehennia i, tapi torus do ditulak ia.

¹⁷Jadi didok si Naaman ma, “Anggo laing na so ra do tuan i manjagit silehen-lehenkon, paloas ma au mulak maroban tano[4] sabahat ni boban ni sapasang bagal. Harana mamungka saonnari hum tu TUHAN sajo noma au manghaulkon haul jana nada be anggo tu debata na asing.

¹⁸Muda pe sanoli on angkon dongananniba rajanami muda kehe ia tu bagas pamelean ni Rimmon debata ni halak Siria, laho marsomba, sai ibo ma roha ni TUHAN laho mangampuni au.”

¹⁹Ning si Elisa ma, “Horas ma ho di na mulak.” Jadi kehe ma si Naaman. Nada sadia honok dung kehe si Naaman,

²⁰marpikir ma si Gehasi pangurupi ni si Elisa i, “Biasi dipaloas ia kehe sajo inda manggarar? Sugari angkon jagiton ni tuanki do nian silehen-lehen ni halak Siria i! Hara ni TUHAN na mangolu i, angkon hukojar bayo i anso adong dapot au sanga na aha sian ia!”

²¹Jadi dikojar si Gehasi ma si Naaman. Dung diida si Naaman adong halak na ro, mijur ma ia sian karetania i marsapa, “Aha na masa?”

²²Dialusi si Gehasi ma, “Santabi tuan, na disuru do au mandok tu tuan i, on dope ro dua halak panurirang sian luat partoran Efraim. Jana hupangido tu tuan i, anso dilehen tolu ribu hepeng perak dohot dua pasang pakean na jeges di panurirang na dua i.”

²³“Denggan!” ning si Naaman jana dielek-elek ia ma si Gehasi anso ra maroban onom ribu hepeng perak. Disaputi si Naaman ma hepeng i dua bungkusan, jana dibuat ia ma dua pasang pakean na jeges-jeges. Dilehen si Naaman ma sudena i tu dua halak pangurupinia na mardalan parjolo sian si Gehasi.

²⁴Dung lalu di dolok na niinganan ni si Elisa i, dibuat si Gehasi ma hepeng dohot pakean i jana dipasimpan ia ma di bagas. Disuru ia ma mulak pangurupi ni si Naaman na dua halak i.

²⁵Dung masuk si Gehasi mangulahi tu bagas, disapai si Elisa ma ia, “Na sian dia do ho?” “Nada pola sian dia da, tuan!” ning ia mangalusi.

²⁶Tapi didok si Elisa ma, “Disi do rohangku dompak na mijur i si Naaman sian karetania mandapotkon ho. Nada tingkina songon on dapotan hepeng, dohot manobusi kobun zetun, kobun anggur, biri-biri dohot lombu bope angka hatoban!

²⁷Hara ni na nijagitmu silehen-lehen i, laing jagitonmu muse ma dohot nyae ni si Naaman i. Sanga na andigan salolot-lolotna laing hona nyae na songon i ma pomparanmu!” Di na ruar si Gehasi sian i, hona ma tusia nyae i — mamontar ma kulitna i.