Read Batak Angkola 2 RAJA-RAJA 6 Bible Online

2 RAJA-RAJA 6 - Batak Angkola bible

2 RAJA-RAJA 6

¹Sanoli humolos ma angka panurirang na nipasahat tu si Elisa. Didok halahi ma, “Ma sompittu do ingananta on!

²Jadi paloas ma hami kehe manaba hayu di lambung ni Batang aek Jordan, anso hami pajongjong inganannami disi.” “Denggan,” ning si Elisa.

³Adong ma sahalak sian halahi na mangelek-elek si Elisa anso dohot ia rap dohot halahi. Jadi didok si Elisa ma dohot ma ho,

⁴jadi rap kehe ma halahi. Dung lalu di topi ni Batang aek Jordan, dipungka halahi ma na martaba hayu.

⁵Jadi taldus ma sada mata ni kampak ni halahi i madabu tu aek i. “Masusa,” ning ia mandok tu si Elisa. “Kampak na nipinjam do i!”

⁶“Di dia dabuna?” ning si Elisa. Dipatuduhon bayo i ma hadabuanna i; dirampingkon si Elisa ma sada hayu jana didanggurkon ia ma tu bagasan aek i. Jadi mulgap ma mata ni kampak i di ginjang ni aek i.

⁷Didok si Elisa ma, “Buat ma!” Didungdung bayo i ma laho mambuat kampak i.

⁸Sanoli marporang ma halak Siria dohot halak Israel. Dung jolo martahi dohot angka tentarana na marpangkat, ditontuhon raja Siria ma sanga na di dia halahi marbandar.

⁹Tapi ditonahon si Elisa ma tu raja ni Israel laho paingotkon anso ulang kehe ia tu inganan i, hara ni na disi halak Siria marbandar.

¹⁰Jadi dipaingot raja ni Israel ma angka halak na maringanan disi anso hobas. Songon i ma dipaingot si Elisa halahi piga-piga noli.

¹¹Dut ma roha ni raja Siria hara ni i, jabat dipiohon ia angka na marpangkat sian angka tentarania manyapai, “Pasti adong sian tonga-tonganta na manghianat. Ise halakna i? Paboa hamu jolo!”

¹²Dialusi sahalak sian parpangkat i ma, “Nada adong i sahalak pe rajanami. Tapi karejo ni si Elisa do i! Ia do paboahon tu raja ni Israel sanga aha na nidok ni raja i, haru pe di kamar podoman didok raja i hata i.”

¹³“Jalahi hamu sanga na di dia ia,” ning raja i, “Anso tartangkup au i.” Dipaboa halak ma na di Dotan si Elisa.

¹⁴Jadi ditongos raja Siria ma tusi parangan na bahat mardongan kudo dohot kareta porang. Borngin lalu ma halahi di kota i, torus dihobuk halahi ma.

¹⁵Ancogotna i sogot dope di na ngot pangurupi ni si Elisa, kehe ma ia tu ruar; diida ia ma na dung dihaliangi tentara ni Siria do kota i singkop markudo dohot markareta porang halahi. Jadi mulak ma ia mandapotkon si Elisa didok ia ma, “Harom ma hita on, tuan! Bia noma ulaning baenonta?”

¹⁶“Ulang pola mabiar ho,” ning si Elisa. “Umbahat dope na manjago hita ulang pado halahi.”

¹⁷Dung i martangiang ma si Elisa, “TUHAN sai ungkap ma jolo mata ni pangurupingku anso diida ia!” Dioloi TUHAN ma tangiang ni si Elisa i, jadi taran manaili pangurupinia i, diida ia ma sude dolok i gok dohot kudo dohot kareta na marapi humaliang si Elisa.

¹⁸Jadi taran mangaroro halak Siria i, martangiang ma si Elisa, “TUHAN papitung ma mata ni halak Siria on!” Dioloi TUHAN ma tangiang ni si Elisa i jadi gabe mapitung ma halahi sude.

¹⁹Dung i kehe ma si Elisa mandapotkon halahi jana didok ia ma, “Na lilu do hamu; nada on kota na nijalahanmunu i. Beta ma ihutkon hamu au; anso hupataru hamu tu bayo na nijalahanmunu i.” Jadi dipataru si Elisa ma halahi tu Samaria.

²⁰Di na laho masuk halahi tu kota i, martangiang ma si Elisa, “TUHAN, ungkap ma mata ni halahi anso marnida halahi.” Dioloi TUHAN ma tangiang ni si Elisa i; diungkap ia ma parnidaan ni angka jolma i lopus tangkas diboto halahi na di Samaria do halahi jongjong.

²¹Dung diida raja ni Israel angka halak Siria i, marsapa ma ia, “O Elisa, angkon bunuonku dehe angka jolma on?”

²²“Ulang,” ning si Elisa. “Salangkan tentara na nitangkup ni raja i di parporangan nada pola dibunu raja i, mur on ma hape. Lehen ma halahi mangan dohot minum, dung i padiar ma marmulahan halahi mandapotkon raja ni halahi.”

²³Jadi dipatupa raja ni Israel ma pesta godang dihalahi; dung sidung mangan dohot minum, dipalua raja i ma halahi mulak tu raja ni halahi i. Mamungka sian i, mantak ma halak Siria mamorangi halak Israel.

²⁴Dung adong sadia honok, ro ma si Benhadad raja ni Siria maroban sandok tentarania laho mamorangi Israel. Dihobuk halahi ma kota Samaria

²⁵jadi gabe masa ma haleon potir di bagasan kota i, jabat mararga sada ulu ni halode salapan pulu hepeng perak jana dua ons kotoran ni darapati[5] mararga lima hepeng perak.

²⁶Sanoli hatiha mardalan-dalan raja i di ginjang ni tembok ni kota i, adong ma sada halak dadaboru na pio-pio marsora na gogo, “Rajanami, urupi au!”

²⁷Dialusi raja i ma, “Anggo so TUHAN do na manolong ho bia muse ma pambaenku mangurupi ho? Nada adong di au gandum sanga aek ni anggur!

²⁸Aha do hasompitanmu?” Dialusi anakboru i ma, “Na dielek ni dongankon do au anso hami pangan parjolo anakki, dung i ancogotna i hami pangan muse ma anaknia.

²⁹Jadi gabe hami lompa ma anakki jana hami pangan. Ancogotna i, hupangido ma anso hami lompa anaknia i, hape ditabunihon ia!”

³⁰Umbege i, disibakkon raja i ma pakeannia hara ni marsakna. Diida angka halak na jongjong di lambung tembok i do na nipakenia goni gabe bajunia tanda ni marsak ni roha.

³¹Pio-pio ma raja i, “Sadari on angkon mate si Elisa i. Sai dimatehon Debata ma au anggo so humatehon si Elisa!”

³²Jadi disuru raja i ma sada halak manjoloi ia tu bagas ni si Elisa. Topet do di bagas si Elisa di hatiha i rap dohot angka pangituai ni rayat na ro tusi. Dompak so lalu dope suruan ni raja i tu bagas i, didok si Elisa ma tu angka pangituai ni rayat i, “Ligi hamu ma! Disuru sibunu jolma i do halak laho mamunu au. Muda lalu naron tuson halakna i tutup hamu pintu i, ulang paloas hamu masuk. Ro do ihut di pudinia raja i sandiri.”

³³Inda jabat sidung dope si Elisa na mandok hata i, ma lalu raja i disi jana didok ma, “TUHAN do mambaen hasusaan on tu hita! Jadi aha dope he gunana arop rohangku di pangurupiNia?”