Read Batak Angkola 2 RAJA-RAJA 7 Bible Online

2 RAJA-RAJA 7 - Batak Angkola bible

2 RAJA-RAJA 7

¹Dialusi si Elisa ma, “Tangihon ma sanga aha na nidok ni TUHAN! Ancogot, hira-hira tarsongon hatihana, tartobusi halak ma tolu kilogram gandum na dumenggan sanga onom kilogram jawawut dohot hepeng saperak sajo.”

²Dialusi pangawal ni raja i ma, “Sian dia ma tarbaen i. Nada tutu i, haru pe sugari diparo TUHAN udan potir saonnari sian langit!” “Idaonmunu do i annon tarjadi, tapi anggo ho nada daionmu saotik pe sipanganon i,” ning si Elisa.

³Di ari i adong ma opat halak na huliton na lobi jorbut di ruar ni horbangan ni Samaria. Mangkatai ma halahi sama halahi, “Aha dope he gunana juguk-juguk hita dison painte-inte mate?

⁴Muda masuk hita tu kota i, mate tangkuraparon ma hita; muda dison sajo pe, laing na mate muse ma hita. Dumengganan noma hita tu parbandaran ni halak Siria i. Olat ni na matehonon ni halahi do hita. Tapi ra do nada pola dihahua halahi hita.”

⁵Jadi dung mamungka samon ari, kehe ma halahi tu parbandaran ni halak Siria i, hape umpe sahalak diida halahi disi.

⁶Harana madung dibaen TUHAN halahi palingo-lingoon songon na umbege sora ni porang ni sada parangan nabahat, na markudo dohot na markareta. Jadi diambang halahi ma na diupai ni raja Israel, raja ni Het dohot Mesir dohot tentarana i laho mamorangi halahi.

⁷Jadi hara ni i gabe maporus ma borngin i tentara ni halak Siria i marsipalua dirina. Ditadingkon halahi ma undung-undung, kudo dohot halode ni halahi songon i di parbandaran i.

⁸Jadi di na lalu na huliton si opat halak i di topi ni parbandaran i, masuk ma halahi tu sada bandar. Mangan minum ma halahi disi jana dipambuati halahi ma sere, perak, dohot angka pakean, lalu ditabunihon halahi. Dung i diulahi halahi muse ma, jana masuk ma halahi tu undung-undung na asing mandatdati songon i.

⁹Dung i mangkatai ma halahi sama halahi, “Nada na denggan karejonta on! Barita na denggan do on! Sapatutna angkon paboaonta do on! Muda tapainte lalu tu ancogot, gabe hona uhum ma hita. Beta ma tapaboa na masa on tu angka parpangkat di harajaan on.”

¹⁰Jadi gabe mulak ma halahi tu Samaria jana pio-pio ma halahi tu panjago ni horbangan ni kota i, “Ma kehe hami tu parbandaran ni halak Siria i, hape nada adong halak disi. Laing tambat do kudo dohot halode ni halahi hami dapot, jana angka bandar i madung ditadingkon halahi songon i sajo.”

¹¹Dipabotohon angka panjago i ma barita i, lalu tu raja i.

¹²Borngin dope hatiha i, tapi laing ruar ma raja i sian podomanna jana didok ia ma tu angka pagawenia i, “Tangihon hamu jolo! Huboto do sanga na bia tahi ni halak Siria i. Diboto halahi do na topet tangkuraparon hita, jadi kehe ma halahi manadingkon parbandaran i jana kehe ma halahi martabuni tu harangan laho mangaligi hita anso ruar manjalahi panganon. Dung i ro ma halahi ompot manjombai hita, dimasuhi halahi ma kotanta.”

¹³Didok sahalak pagawe ni raja i ma, “Anggo hita na di bagasan kota on do rajanami, sarupa tu halak na dung mate noma bagianta. Jadi gumonan ma tasuru piga-piga halak tusi laho mangaligi sanga na bia do satutuna. Padiar ma kehe halahi mar lima kudo sian na adong i.”

¹⁴Jadi dipili ia ma piga-piga halak, disuru raja i ma manengget dua kareta porang laho manangkasi sanga aha do na masa di tentara Siria i.

¹⁵Kehe ma halahi lalu tu Batang aek Jordan. Sapanjang dalan i diida halahi ma pakean dohot angka parkokas marsarsaran; na niparsampakkon ni halak Siria i do sudena i di na maporus halahi paluahon dirina. Mulak ma angka suruan i jana dipaboa halahi ma tu raja i.

¹⁶Jadi marlojongi ma halak Samaria i tu ruar ni kota, dipambuati halahi ma parbandaran ni halak Siria i. Domu tu na nidok ni TUHAN, tulus ma masa, tolu kilo gandum na dumenggan sanga onom kilo jawawut hum hepeng saperak do argana.

¹⁷Topet muse ma hatiha i pangawal ni raja i disuru manjagoi pintu horbangan ni kota i. Mate disi ma ia tardege-dege halak na bahat i. Laing tulus ma tarjadi songon na nidok ni si Elisa tu raja di na ro raja i mandapotkon ia.

¹⁸Madung didokkon si Elisa hian, hira-hira songon on ma hatihana ancogotna i, tolu kilo gandum na dumenggan sanga onom kilo jawawut gadison ni halak ma di Samaria mararga saperak.

¹⁹Jana topet di hatiha i pangawal ni raja i sandiri mandok, “Bia ma pambaen ni i! Inda tutu i, haru pe saonnari on diparo TUHAN udan potir sian langit!” Jadi dialusi si Elisa do, “Idaonmu do naron tarjadi, tapi anggo ho nada dohot mandai panganon i saotik pe.”

²⁰Saonnari i ma na masa tu halakna i — tardege-dege rayat i ma ia di horbangan i.