Read Batak Angkola 2 RAJA-RAJA 8 Bible Online

2 RAJA-RAJA 8 - Batak Angkola bible

2 RAJA-RAJA 8

¹Sanoli diparo TUHAN ma haleon potir di Israel jabat pitu taon honokna. Dompak so masa haleon i, madung dipaboa si Elisa hian tu dadaboru na sian Sunem i, i ma na nipangolunia anakna i mangulahi. Jolo disuru ia do dadaboru i anso bungkas dohot halahi na sabagas tu luat na asing.

²Dipatulus dadaboru i ma songon na nidok ni si Elisa i, jana kehe ma halahi bungkas maringanan di Luat Pilistin.

³Dung salpu na pitu taon i mulak ma ia tu Israel. Kehe ma ia mangadop tu raja laho mangidohon anso dipaulak tusia bagas dohot ladangnia humani.

⁴Dipangido raja i ma di hatiha i anso dicaritohon si Gehasi pangurupi ni si Elisa i, angka hahomangan na nibaen ni si Elisa.

⁵Jadi dompak na marcarito i si Gehasi sanga na bia dibaen si Elisa pangoluhon mangulahi sada dakdanak na dung mate, dipasahat dadaboru na sian Sunem i ma pangidoannia tu raja i. “Daulat na marmulia,” ning si Gehasi, “On ma ibana dadaboru i, jana on ma anaknia na dipangolu ni si Elisa i mangulahi!”

⁶Dung i dipiohon raja i ma anso dipaulak mangulahi sude sinadongan ni dadaboru i, dohot sude arga ni suha ni angka ladangnia salolot na pitu taon i ia di luat na asing.

⁷Sanoli kehe ma si Elisa tu Damaskus. Topet hatiha marnyae Raja Benhadad. Di na tarbege tu raja i na di Damaskus si Elisa,

⁸didok raja i ma tu si Hasael sahalak sian pagawenia, “Oban silua tu panurirang i, jana pangido ma anso disapai ia tu TUHAN betak na malum dope au sanga nada.”

⁹Dibuat si Hasael ma opat pulu unto, dibobani ia ma i dohot sude ragam ni pansamotan ni Damaskus, dung i kehe ma ia mandapotkon si Elisa. Dung lalu ia di inganan ni si Elisa i didok si Hasael ma, “Raja Benhadad naposomi do marsuru au tuson laho manyapai betak na malum dope ia sanga nada.”

¹⁰Dialusi si Elisa ma, “Madung didok TUHAN tu au, mate noma ia; tapi anggo tusia dok sajo ma, na malum dope ia.”

¹¹Dung i tajom ma panaili ni si Elisa tu si Hasael, jabat songon na susa dihilala si Hasael. Ompot ma tangis si Elisa.

¹²“Biasi tangis tuan i?” ning si Hasael manyapai. “Angke huboto do hajahatan na giot baenonmu tu halak Israel,” ning si Elisa. “Giot surbuonmu ma angka kotana na martembok, bunuonmu ma angka halak na poso na jumogi, pingkohanmu ma angka dakdanak na baru sorang jana bolaanmu ma butuha ni angka ina na denggan pamatangna.”

¹³“Aha ma he astuan ni naposomon,” ning si Hasael mangalusi, “Sian dia ma adong kuasongku na songon i godang!” “Madung dipatuduhon TUHAN tu au na giot ho ma gabe raja ni Siria,” ning si Elisa mangalusi.

¹⁴Di na mulak si Hasael tu bagas ni raja i, disapai si Benhadad ma, “Aha didok si Elisa?” “Pandoknia, malum do raja i.”

¹⁵Tapi ancogotna i dibuat si Hasael ma sada ulos, disornomkon ia ma i tu aek dionyakkon ia ma tu bohi ni raja i lopus mate pultong raja i. Jana si Hasael ma gabe raja ni Siria manggonti si Benhadad.

¹⁶Gabe raja ma si Joram anak ni si Josafat di Juda, dung lima taon Raja Joram anak ni si Ahab mamarenta di Israel.

¹⁷Marumur tolu pulu dua taon ma hatiha i si Joram jana salapan taon honokna mamarenta ia di Jerusalem.

¹⁸Dibuat ia ma boru ni si Ahab, jana songon pangalaho na nibaen ni horong ni si Ahab, laing songon i ma ia mardosa maradopkon TUHAN.

¹⁹Tapi nada ra TUHAN mambaen marmara Juda hara ni na dung dijanjihonNia humani tu si Daud naposoNia i, na manongtong do anggo pomparannia gabe raja.

²⁰Di hatiha si Joram on na mamarenta, mangalo ma halak Edom tu Juda jana pajongjong harajaanna sandiri halahi.

²¹Jadi ruar ma si Joram rap dohot sude kareta porangnia kehe tu Zair. Dihobuk tentara ni Edom ma ia disi, tapi borngin i tarbaen ia do luncat rap dohot angka panglima ni tentarania i manompas partahanan ni musuna i jana angka parajuritnia i pe marlojong ma mulak tu bagasna be.

²²Mamungka sian i ma talgang Edom sian gomgoman ni Juda gabe sada harajaan na mardeka. Laing di hatiha i mangalo muse ma kota Libna.

²³Barita na asing taringot tu si Joram madung disuratkon di Buku Sejarah Ni Raja-raja Juda.

²⁴Marujung ma ngolunia jana dikubur di kuburan ni angka raja na di Kota Ni si Daud. Anaknia si Ahasia ma gabe raja manggonti ia.

²⁵Gabe raja si Ahasia anak ni si Joram di Juda, dung dua bolas taon Raja Joram anak ni si Ahab mamarenta di Israel.

²⁶Marumur dua pulu dua taon ma si Ahasia hatiha i jana mamarenta ma ia di Jerusalem sataon. Si Atalia do goar ni inangnia, i ma boru ni Raja Ahab jana pahompu ni si Omri raja ni Israel.

²⁷Hara ni dongan saripena, gabe markoum ma si Ahasia tu Raja Ahab. Ia pe laing mardosa do maradopkon TUHAN laing sarupa tu pangalaho na nibaen ni horong ni Raja Ahab.

²⁸Dohot do Raja Ahasia marporang rap dohot si Joram raja ni Israel mangalo si Hasael raja ni Siria. Di Ramot ma halahi marporang, i ma di Luat Gilead. Mabugang ma si Joram di parporangan i.

²⁹Jadi mulak ma ia tu kota Jisreel marubat, jana ro ma tusi si Ahasia mangaligi ia.