Read Batak Angkola 1 JUJUR TAON 10 Bible Online

1 JUJUR TAON 10 - Batak Angkola bible

1 JUJUR TAON 10

¹Di hatiha i masa ma parporangan, ro halak Pilistin mangalo halak Israel di Dolok Gilboa. Bahat do mate halak Israel disi, jana na tinggal i maporus ma paluahon dirina; dohot ma disi Raja Saul rap dohot angka dakdanaknia.

²Tapi dikojar halak Pilistin i ma halahi, lalu hona bunu ma disi tolu anak ni si Saul, i ma si Jonatan, si Abinadab dohot si Malkisua.

³Santak jebuna parporangan i humaliang si Saul, jadi gabe hona pana ni musu ma ia jabat banga sajo.

⁴Jadi didok si Saul ma tu doli-doli na maroban sinjatania i, “Sintak ma podangmi! Tiham ma au! Ulang jabat dipargonjak-gonjakkon halak kapir i au.” Tapi nada ra doli-doli i mambaen songon i hara ni biarnia, jadi dibuat si Saul sandiri ma podangnia i, ditinggangkon ia ma dirina tu podang i.

⁵Dung diida doli-doli i na dung mate si Saul, ditinggangkon ia muse ma dirinia tu podangna lalu mate.

⁶Jadi mate ma si Saul dohot anakna na tolu i jana i ma ujung ni harajaannia.

⁷Dung tarboto tu halak Israel na tinggal di Rura Jisreel na dung maporus tentara ni Israel dohot na mate si Saul songon i anaknia na tolu i, kehe ma halahi marlojongi marsitadingkon kotana be. Jadi ro ma halak Pilistin jana maringanan ma halahi di angka kota i.

⁸Sadari dung porang i, marroan ma halak Pilistin laho mangarampasi angka bangke i, jana dapot halahi ma bangke ni si Saul dohot anakna na tolu i payak-payak di Dolok Gilboa.

⁹Jadi diponggolkon halahi ma ulu ni si Saul, jana dirampas halahi ma baju porangna i. Disuru halak Pilistin ma utusan maroban ulu ni si Saul dohot baju porangna i tu sude Luat Pilistin laho pabolkaskon barita na denggan i tu bangso dohot debata ni halahi.

¹⁰Dung i dibaen halahi ma angka sinjata ni si Saul i tu bagasan sada bagas parsombaan ni halahi jana digantung halahi ma uluna i di bagasan bagas ni Dagon, i ma debata ni halahi.

¹¹Disi tarbege tu halak Jabes na di Gilead, sude na nibaen ni halak Pilistin i tu si Saul,

¹²markehean ma angka halak na umpuluk sian halahi laho mambuat bangke ni si Saul dohot angka dakdanakna i. Dioban halahi ma i tu Jabes jana dikubur halahi ma di toru ni sada hayu na godang. Jadi puaso ma halahi pitu ari lolotna.

¹³Marujung do ngolu ni si Saul hara ni na so setia ia tu TUHAN. Nada mangido panogu-noguon ia sian TUHAN, tapi sian angka tondi ni na mate do. Dilanggar ia do angka na niparentahon ni TUHAN. Jadi hara ni i ma umbaen na niuhum ni TUHAN ia jana dipasahat ma harajaannia i tu si Daud anak ni si Isai.