Read Batak Angkola 1 JUJUR TAON 11 Bible Online

1 JUJUR TAON 11 - Batak Angkola bible

1 JUJUR TAON 11

¹Dung salpu i, ro ma sude bangso Israel mandapotkon si Daud di Hebron jana didok halahi ma, “Ale-ale ni raja i do da hami on.

²Sian najolo, salang dompak si Saul dope raja mamarenta hami, laing na raja i do manguluhon rayat ni Israel marporang. Boti pe na dung marjanji do TUHAN tu raja i paboa na raja i noma na mamimpin halak ni TUHAN dohot na gabe raja ni halahi.”

³Dibaen si Daud ma parjanjian dohot halahi di Hebron. Jadi diangkat halahi ma ia gabe raja ni Israel laing songon na nijanjihon ni TUHAN marhite sian si Samuel.

⁴Sanoli kehe ma Raja Daud rap dohot sude pasukan ni Israel manyerang Jerusalem, Jebus dope hatiha i goar ni kota i jana halak Jebus do maringanan disi, i ma halak na asli mangingani kota i.

⁵Didok halak Jebus i ma tu si Daud na so tarmasuhi ia kota i. Hape dirampas si Daud ma benteng ni halahi na margoar Sion, lalu disi noma ia maringanan. Mamungka sian i margoar ma benteng i “Kota Ni si Daud.” Dipabotohon si Daud ma tu angka anak buania i, sanga ise sian anak buania na parjolo mamunu sada halak Jebus, baenon ma gabe panglima. Jadi gabe panglima ma si Joab harana ia do na mamimpin serbuan i. (Si Zeruya do goar ni inang ni si Joab.)

⁸Dibangun ia ma kota i humaliang, mamungka sian Habincaran ni dolok na nitimbun i dohot tano. Si Joab do na pasidungkon pambangunan ni kota i.

⁹Mur honok mur gogo ma si Daud, hara ni na sun gogo do TUHAN laho mangurupi ia.

¹⁰Angka on ma perwira ni si Daud na tarbonggal. Madung marporang halahi rap dohot rayat ni Israel anso gabe raja si Daud hombar tu na nijanjihon ni TUHAN. Jana dijuljulkon halahi do si Daud di na mamarenta i.

¹¹Na parjolo perwirania i ma si Jasobam sian horong Hakmoni; ia ma pamimpin ni “Triwira”.[14] Jungada do di sada partempuran dialo ia tolu ratus halak jana dimatehon ia halahi sude dohot hujurnia.

¹²Na paduahon di “Triwira”, i ma si Eleasar anak ni si Dodo na sian Marga Ahohi.

¹³Di paraloan na di Pas Damim marporang ma ia mandongani si Daud mangalo halak Pilistin. Haru madung mamungka paluahon dirina be tentara ni Israel, anggo ia dohot anak buania i laing martahan do di tonga-tonga ni sada kobun burir-burir jana disi ma ia maralo tu angka halak Pilistin i. Jadi laing dilehen TUHAN do hamonangan na godang disia.

¹⁵Sanoli marbandar ma sapunguan tentara ni halak Pilistin di Rura Refaim. Ro ma tolu halak perwira ni si Daud sian sitolu pulu halak na umbonggal mandapotkon si Daud di dolok batu na di lambung ni liang Adulam.

¹⁶Topet hatiha i di bagasan benteng si Daud, hape na dung masuk do tentara ni halak Pilistin tu Betlehem.

¹⁷Malungun si Daud tu huta hatubuannia i jana didok ia ma, “Sugari nian adong ma na mangalehen minum au sian sumur na di lambung ni horbangan ni Betlehem i.”

¹⁸Umbege i, kehe ma perwira ni si Daud si tolu halak na tarbonggal i mangaloha parbandaran ni halak Pilistin i, ditimba halahi ma aek sian sumur i lalu dioban halahi tu si Daud. Hape nada giot si Daud manginumsa, diduruskon ia do aek i gabe haul tu TUHAN,

¹⁹jana didok ia ma, “Nada tarinum au aek on! Muda huinum aek i, tarsongon na manginum mudar ni halak na mangalehen hosana do au!” Jadi nada diinum si Daud aek i saotik pe. Songon i ma habaranion ni perwira sitolu halak na tarbonggal i.

²⁰Si Abisai anggi ni si Joab do pamimpin ni “Tridasawira”[15] na tarbonggal i. Jungada do dibunu ia tolu ratus halak dohot tombaknia. Jana sian Tridasawira i, ia ma na umbonggalna,

²¹jadi ia do pamimpin ni halahi. Tapi nada pola songon “Triwira” i betengna.

²²Sada halak nari perwira na asing na tarbonggal, i ma si Benaya anak ni si Joyada, halak Kabseel. Na barani do bayo i. Dua ma parporang na sumurung sian Moab dibunu ia. Sanoli topet ro salju, masuk ma ia tu sada lubang, dimatehon ia disi sada singa.

²³Sanoli dibunu ia halak Mesir lobi dua meter ginjang ni bayo i, adong muse do hujur na lobi godang sinjatana. Hum potuk-potuk do sinjatania mangadopisa. Dirampaskon si Benaya do hujur na di tangan ni halak Mesir i, lalu i noma dibaen ia mamunu bayo i.

²⁴Angka i ma habetengan na nibaen ni si Benaya, sahalak sian Tridasawira i.

²⁵Ia ma tardok na gumodang sian pasukan i, tapi nada jabat dope songon “Triwira” i. Diangkat si Daud ma ia gabe kapala ni pangawalnia.

²⁶Na mangihut on, i ma angka perwira na tarbonggal deba nari: Si Asael anggi ni si Joab Si Elhanan anak ni si Dodo na sian Betlehem Si Samot halak Harod Si Heles halak Peloni Si Ira anak ni si Ikes halak Tekoa Si Abieser halak Anatot Si Sibkai halak Husa Si Ilai halak Ahohi Si Maharai halak Netofa, Heled anak ni Baana halak Netofa Si Itai anak ni si Ribai halak Gibea na di Luat Benyamin Si Benaya halak Piraton Si Hurai na sian luat lombang Gaas Si Abiel halak Araba Si Asmawet halak Bahurim Si Elyakba halak Saalbon Si Hasem halak Gison Si Jonatan anak ni si Sage halak Harari Si Elifal anak ni si Ur Si Hefer halak Makerati Si Ahia halak Peloni Si Hesro halak Karmel Si Naarai anak ni si Esbai Si Joel anggi ni si Natan Si Mibhar anak ni si Hagri Si Zelek halak Amon Si Naharai halak Beerot, sioban sinjata ni si Joab Si Ira dohot si Gerab halak Jetri Si Uria halak Het S(...)