Read Batak Angkola 1 JUJUR TAON 12 Bible Online

1 JUJUR TAON 12 - Batak Angkola bible

1 JUJUR TAON 12

¹Di na gilo si Daud sian jolo ni Raja Saul, martabuni ma ia di Ziklag. Bahat do angka parporang na burju bope na marpangalaman na dohot mangihutkon si Daud.

²Sian Marga Benyamin do halahi songon si Saul. Na malo do halahi manembakkon pana dohot mangambalang — dohot tangan siamun sanga pe manjaluk.

³Si Ahieser dohot si Joas dakdanak ni si Semaa na sian Gibea ma pamimpin ni halahi. Angka on ma goar ni parporang i: Si Jesiel dohot si Pelet dakdanak ni si Asmawet Si Beraka dohot si Jehu halak Anatot Si Jismaya sian Gibeon, parporang na tarbarita laing ia ma sahalak pamimpin ni “Tridasawira.” Si Jeremia, si Jehasiel, si Johanan dohot si Josabad halak Gedera, si Elusai, si Jerimot, si Bealya, si Semarya, dohot si Sefaca halak Harufi, si Elkana, si Jisia, si Asareel, si Joeser dohot si Jasobam sian horong ni si Korah. Si Joela dohot si Zebaya dakdanak ni si Jeroham halak Gedor.

⁸Dompak di bagasan benteng na di halongonan si Daud, bahat do angka parporang na tarbarita boti na marpangalaman sian Marga Gad na ro gabe dongan ni si Daud. Angka parporang na malo do halahi mamake parince dohot hujur i, songon singa do idaon puluk-pulukna halahi jana tarsongon ursa lingkasna.

⁹Angka on ma goar ni halahi mangihutkon parjojor ni pangkatna: Si Eser, si Obaja, si Eliab, si Mismana, si Jeremia, si Atai, si Eliael, si Johanan, si Elsabad, si Jeremia, si Makbanai.

¹⁴Adong do deba na sian Marga Gad i angka perwira tinggi na mangapalai saribu halak; na deba nari angka perwira na somal ma halahi na mangapalai saratus halak.

¹⁵Jungada do tarjadi di bulan sada, ditaripari angka perwira i Batang aek Jordan haru pe topet banjir godang batang aek i. Sandok halak na di napa i sian Habincaran dohot Hasundutan ni batang aek i, dipaorot halahi.

¹⁶Sanoli kehe ma sarombongan halak sian Marga Benyamin dohot Juda tu benteng inganan ni si Daud.

¹⁷Didapotkon si Daud ma halahi jana didok ma, “Anggo na giot mandongani au do hamu ro tuson, denggan ma i dison hamu. Jop do rohanami laho manjagit hamu. Tapi muda na giot manghianat au do tu musu maksudmunu, haru pe nada hujungkati hamu, Debata na nisomba ni angka ompunta i ma na umbotosa, jana Ia ma na manguhumi hamu.”

¹⁸Jadi adong ma sahalak sian halahi, i ma si Amasai na gabe pamimpin ni na margoar “Tridasawira i”, digohi Tondi Ni Debata ma ia jana didok ia ma, “O Daud, anak ni si Isai! Donganmu do da hami! Sai manjadi ma nian karejomu dohot angka na mandongani ho. Mamihak tu ho do Debata!” Jadi dijaluangi si Daud ma halahi jana diangkat ia ma halahi gabe perwira di tonga-tonga ni tentarania i.

¹⁹Adong ma deba parajurit na sian Marga Manase na marbalik mamihak tu si Daud di na marporang ia dohot halak Pilistin mangalo Raja Saul. Satutuna nian nada pola na niurupannia halak Pilistin i; na disuru ni halak Pilistin i do ia mulak tu Ziklag hara ni na mabiar halahi betak marbalik ia lalu tu pihak ni Raja Saul jana dihianati ia halahi.

²⁰Angka on ma goar-goar ni parporang na sian Marga Manase na taripar tu pihak ni si Daud di na mardalan ia tu Ziklag: Si Adnah, si Josabad, si Jediael, si Mikael, si Josabad, si Elihu dohot si Ziletai. Saribu be parajurit ni halahi.

²¹Parporang na sai monang do halahi jana na mangurupi si Daud songon angka perwira ni tentarania. Gabe angka perwira do muse halahi di tonga-tonga ni tentara porang ni Israel.

²²Ganop ari do dohonon sai adong halak na imbaru na taripar mandongani si Daud, jadi nada sadia honok gabe bahat sajo ma tentara ni si Daud.

²³Dompak di Hebron si Daud, bahat do angka parporang na malo na ro mandongani si Daud. Diurupi halahi ma ia anso tarbaen gabe raja manggontihon si Saul, songon na nijanjihon ni TUHAN. Songon on ma bahat ni halahi: Juda: 6.800 halak singkop parince dohot hujurna. Simeon: 7.100 halak na gogo boti tongam. Levi: 4.600 halak. Joyada dohot anak buania pomparan ni si Harun: 3.700 halak. Zadok, doli-doli parporang na barani songon i dohot koum sisolkotna: 22 halak na tarpatujolo. Benyamin (marga ni si Saul): 3.000 halak. Umbahat dope nian sian Marga Benyamin na mangihut tu si Saul. Efraim: 20.800 halak na godang-godang sian horong ni halahi be. Manase Hasundutan: 18.000 halak na nitodo anso dohot kehe laho mangangkat si Daud gabe raja. Isakar: 200 halak pamimpin rap dohot na nipimpin ni halahi. Angka na malo do pamimpin on manontuhon sanga aha sibaenon ni rayat Israel di hatiha na tumbuk. Zebulon: 50.000 halak na malo mamake ragam-ragam ni sinjata jana na singkop t(...)

³⁸Kehe ma sudena halahi tu Hebron di bagasan ni na dung singkop tu porang jana na dung sada rohana laho mangangkat si Daud gabe raja ni sude Israel. Jana halak Israel na deba nari i pe sudena madung saroha.

³⁹Tolu ari honokna disi halahi rap dohot si Daud, mangan minum halahi dihobasi angka halak Israel i.

⁴⁰Sian angka marga na dao di Utara, i ma Marga Isakar, Zebulon dohot Naftali marroan be ma marobani sipanganon: topung, batu ni ara, kismis, anggur dohot miak zetun. Halode ma dibaen marobansa dohot unto, bagal dohot lombu. Laing maroban lombu do halahi dohot biri-biri sisambolon baen panganon. Sudena i pataridahon jop ni roha ni rayat i ma di Israel sudena.