Read Batak Angkola 1 JUJUR TAON 13 Bible Online

1 JUJUR TAON 13 - Batak Angkola bible

1 JUJUR TAON 13

¹Dialap tahi Raja Daud ma sude perwirania na mamimpin sasaribu halak dohot na mamimpin marsasaratus halak.

²Jadi didok ia ma tu halak Israel i sude, “Muda satuju do hamu, jana lomo roha ni TUHAN, Debatanta i, denggan ma ning rohangku tasuru utusan mandapotkon angka malim dohot angka halak Levi di huta ni halahi be, dohot tu sude halak hita di tanonta on anso ditonahon tu halahi ro marlagut rap dohot hita dison.

³Dung i taalap ma Poti Parjanjian ni Debata, na nipadiar-diar songon na so mararga salolot Raja Saul mamarenta.”

⁴Sonang do roha ni rayat i manjagit usul i jana satuju do halahi.

⁵Jadi dipalagut si Daud ma rayat ni Israel sian sude luat, mamungka sian batas tu Mesir di Selatan lopus tu dalan tu Hamat di Utara laho mangalap Poti Parjanjian i sian Kiryat-Jearim jana marobansa tu Jerusalem.

⁶Jadi kehe ma halahi rap dohot si Daud tu kota Baala, i ma Kiryat-Jearim na di Luat Juda laho mangalap Poti Parjanjian ni Debata i. Tarbarita do goar ni poti i, “Marhabangsa di ginjang ni na marhabong do TUHAN.”

⁷Disi lalu di Baala, diparuar halahi ma Poti Parjanjian i sian bagas ni si Abinadab, torus dipamasuk halahi ma tu sada padati na imbaru. Si Usa dohot si Ahio ma mangiring lombu ni padati i,

⁸tapi anggo si Daud dohot sude bangso Israel i mardalan ma di jolo ni Poti i manortori dohot marendei marsitutu, didongani sora ni hasapi, gambus, gondang, hersek dohot sarune.

⁹Dung lalu tu pardegean ni gandum nampuna ni si Kidon, targompang ma angka lombu na manarik padati i jana didungdung si Usa ma laho manahan Poti Parjanjian i anso ulang jabat madabu.

¹⁰Hape muruk ma TUHAN tu si Usa jana diuhumi ma ia hara ni na nitiopnia Poti Parjanjian i. Laing mate santongkin i do si Usa dibunu Debata. Jadi mamungka sian i ma inganan i margoar “Peres Usa”.[16] Muruk ma si Daud hara ni na songon i borat ni uhuman ni TUHAN tu si Usa.

¹²Tapi laing mabiar do si Daud mida Debata jana didok ia ma, “Saonnari bia ma baenonku Paroban ni Poti Parjanjian i?”

¹³Jadi sundat ma dioban Poti i tu Jerusalem, tapi ditinggalkon noma di bagas ni sada halak na margoar si Obed-Edom na sian kota Gat.

¹⁴Adong do tolu bulan honokna disi Poti i, jadi hara ni i dipasupasu TUHAN ma keluarga ni si Obed-Edom maradu sinadongan ni halahi.