Read Batak Angkola 1 JUJUR TAON 14 Bible Online

1 JUJUR TAON 14 - Batak Angkola bible

1 JUJUR TAON 14

¹Disuru Raja Hiram na sian Tirus ma suruanna laho manghatahon soal boniaga tu si Daud rap dohot angka tukang batu dohot tukang hayu dohot sampinur Libanon laho pajongjongkon bagas godang.

²I ma na paposkon roha ni si Daud paboa na dung dipatogu TUHAN parjuguknia gabe raja ni Israel jana marsonang-sonang harajaannia dibaen hara ni bangso ni TUHAN.

³Dibuat si Daud ma di Jerusalem sanga na piga halak nari dadaborunia jana adong be ma dakdanakna.

⁴Angka on ma goar ni anaknia na sorang di Jerusalem: Si Samua, si Sobab, si Natan, si Salomo,

⁵si Jibkar, si Elisua, si Elpelet,

⁶si Nogah, si Nefeg, si Jafia,

⁷si Elisama, si Beelyada[17] dohot si Elifelet.

⁸Dung tarbege tu halak Pilistin na dung diangkat si Daud gabe raja di sude Israel, kehe ma halahi laho manangkup ia. Jadi hara ni i ruar ma si Daud anso marsuo dohot halahi.

⁹Ro ma tentara ni halak Pilistin jana diporangi halahi ma Rura Refaim.

¹⁰Jadi marsapa ma si Daud tu Debata, “O TUHAN, angkon aloonku dehe halak Pilistin on? Lehenon ni TUHAN dehe hamonangan di au?” Dialusi TUHAN ma, “Olo, pajolo ma mangaroro! Hulehen pe hamonangan di ho!”

¹¹Jadi diserang si Daud ma halak Pilistin jana ditaluhon ia ma halahi di Baal-Perasim. Didok si Daud ma, “Madung dipake Debata au laho manompas partahanan ni musu i songon pangayup ni aek na godang.” I ma umbaen na margoar Baal-Perasim[18] inganan i.

¹²Marsilojong di ibana be ma tentara ni halak Pilistin i, nada jabat taroban halahi angka patung ni halahi. Dung i diparentahon si Daud ma anso ditutungi angka patung i.

¹³Nada sadia honok diulahi halak Pilistin ma mamorangi rura i.

¹⁴Mangulahi sanoli nari dipangido si Daud panogu-noguon tu Debata, jana dialusi Debata ma, “Ulang sian on haroromu laho mangalo halahi, tapi sian ipar an ma ho, jana sian hayu gabovo ma ho ro mangalo halahi.

¹⁵Muda adong dibege ho songon sora ni langka ni halak na marbaris di ujung ni hayu-hayu i, maju ma ho, harana mardalan di jolomu do Au laho manaluhon tentara ni Pilistin i.”

¹⁶Dibaen si Daud ma songon na niparentahon ni Debata tusia. Disosak ia ma dohot pasukannia i tentara ni Pilistin i mundur mamungka sian Gibeon lalu tu tongtang ni Geser.

¹⁷Gabe tarbonggal ma goar ni si Daud sun ro di dia, jana mabiar ma dibaen TUHAN sandok bangso tu si Daud.