Read Batak Angkola 1 JUJUR TAON 15 Bible Online

1 JUJUR TAON 15 - Batak Angkola bible

1 JUJUR TAON 15

¹Dibaen si Daud ma disia angka bagas di Kota Ni si Daud, jana dipasingkop ia ma inganan ni Poti Parjanjian ni Debata jana dibaen ia ma undung-undung inganan ni Poti i.

²Dung i didok si Daud ma, “Hum halak Levi sajo do na tola mangangkat Poti Parjanjian ni TUHAN, harana halahi do na nitodo ni TUHAN laho mamorsan Poti i dohot na mangoloi Ia salolot-lolotna.”

³Dung salpu i dipiohon si Daud ma sudena halak Israel ro tu Jerusalem laho paimbarkon Poti Parjanjian ni TUHAN i tu inganan na niparadenia i.

⁴Jadi disuru ia ma marlagut pomparan ni si Harun dohot halak Levi.

⁵Sian Marga Levi horong ni si Kehat, ro ma si Uriel manguluhon donganna sahorong 120 halak bahatna.

⁶Sian horong ni si Merari ro ma si Asaya manguluhon 220 halak.

⁷Sian horong ni si Gerson ro ma si Joel mamimpin donganna 130 halak.

⁸Sian horong ni si Elsafan ro ma si Semaya manguluhon 200 halak.

⁹Sian horong ni si Hebron ro ma si Eliel na manguluhon 80 halak.

¹⁰Jana sian horong ni si Usiel ro ma si Aminadab na manguluhon 112 halak donganna.

¹¹Dung i dipiohon si Daud ma Malim Zadok dohot Malim Abyatar dohot onom nari halak Levi, i ma si Uriel, si Asaya, si Joel, si Semaya, si Eliel dohot si Aminadab.

¹²Didok si Daud ma tu halahi, “Hamu do pamimpin ni angka halak Levi marhorong-horong. Jadi hara ni i, jolo paias hamu ma dirimunu rap dohot halak Levi na deba nari anso tarbaen hamu paimbarkon Poti Parjanjian ni TUHAN, Debata ni Israel i, tu inganan na huparade i.

¹³Di na dipapinda parjolo situtu Poti i, nada adong sian hamu na ro, jadi hara ni i, diuhumi TUHAN Debatanta hita, angke tabaen antong ibadat na so cocok tu na nihagiotanNia.”

¹⁴Jadi mangias diri ma angka malim dohot halak Levi anso tarbaen halahi paimbarkon Poti Parjanjian ni TUHAN, Debata ni Israel i.

¹⁵Jana di na paimbarkon Poti i, ditandu halahi ma mamake porsan-porsan di abara ni halahi, domu tu na dung diaturkon ni TUHAN markite-hite si Musa.

¹⁶Laing disuru si Daud muse ma angka pamimpin ni halak Levi i anso didok halahi sanga na piga-piga halak sian marga ni halahi laho marende na marlogu jop ni roha mamake hasapi dohot simbal.

¹⁷Sian angka keluarga ni parende, dipili halahi ma angka na malo mamake simbal na sian loyang, i ma si Heman anak ni si Joel rap dohot kahanggina na margoar si Asap anak ni si Berekia dohot si Etan anak ni si Kusaya na sian horong ni si Merari. Jana laho mangudurkon halahi boti mamalu hasapi parsora na tinggil dipili halahi ma halak Levi, i ma si Zakaria, si Jaasiel, si Semiramot, si Jehiel, si Uni, si Eliab, si Maaseya dohot si Benaya. Sipalu hasapi sigordong sora, dipili halahi ma sian Marga Levi i ma si Matica, si Elifele, si Mikneya, si Asasia dohot dua halak panjago ni Bagas Ni Debata, i ma si Obed-Edom dohot si Jeiel.

²²Si Kenanya ma dipili gabe kapala ni angka parmusik na sian Marga Levi i, harana ia pe tangkas do umboto musik.

²³Dipili ma na gabe pangawal ni Poti Parjanjian ni TUHAN, i ma si Berekia dohot si Elkana rap dohot si Obed-Edom dohot si Jehia. Dung i dipili ma na mamalu sarune di jolo ni Poti i angka malim, i ma si Sebanya, si Josafat, si Netaneel, si Amasai, si Zakaria, si Benaya dohot si Elieser.

²⁵Kehe ma Raja Daud rap dohot angka pamimpin ni Israel songon i angka perwira tu bagas ni si Obed-Edom laho mangalap Poti Parjanjian i, lalu dibaen ma pesta godang.

²⁶Dihaulkon ma pitu lombu dohot pitu biri-biri tu Debata laho mangido pangurupionNia tu halak Levi na maroban Poti Parjanjian i.

²⁷Dipake si Daud ma disi baju juba na sian abit linen, songon i dohot angka parmusik bope si Kenanya pamimpin ni halahi i rap dohot halak Levi na maroban Poti Parjanjian i. Laing dipake si Daud muse do baju Efod.

²⁸Diudurkon halak Israel ma sude Poti Parjanjian i lalu tu Jerusalem marsurak-surak marmoga-moga, dohot sora ni sarune, suling, simbal dohot hasapi.

²⁹Di na laho masuk Poti i dioban tu kota i, ditungkir si Mikal boru ni si Saul ma sian jandela jana diida ia ma Raja Daud manortori marhujingjang hara ni jop ni rohana, gabe goyak ma roha ni si Mikal mida si Daud.