Read Batak Angkola 1 JUJUR TAON 16 Bible Online

1 JUJUR TAON 16 - Batak Angkola bible

1 JUJUR TAON 16

¹Dioban ma Poti Parjanjian i masuk tu bandar na niparade ni si Daud hian. Marhaul ma halahi tu Debata pasahatkon haul situtungon dohot haul pardamean.

²Dung sidung dipasahat si Daud haul i, dipasupasu ia ma rayat i mangasahon goar ni TUHAN,

³lalu dibagi-bagihon ia ma panganon tu halak sude. Sude halak na adong disi maruli roti, juhut panggang dohot kue kismis.

⁴Diangkat si Daud ma piga-piga halak sian halak Levi laho mamimpin ibadat maradopkon TUHAN, Debata ni Israel di jolo ni Poti Parjanjian i, mardongan ende dohot puji-pujian.

⁵Si Asap ma dipili gabe kapalana sude jana si Zakaria ma wakilna. Si Jeiel, si Semiramot, si Jehiel, si Matica, si Eliab, si Benaya, si Obed-Edom dohot si Jeiel, i ma na disuru marhasapi, si Asap mamalu simbal,

⁶jana dua halak nari malim, i ma si Benaya dohot Jahasiel, i ma na torus mamalu sarune di jolo ni Poti Parjanjian i.

⁷I ma na parjolo dibaen si Daud karejo ni si Asap dohot angka donganna i laho mangendehon puji-pujian tu TUHAN.

⁸Dok ma tarimakasi tu TUHAN jana baritahon ma hagodanganNa, paboa ma di tonga-tonga ni angka bangso pambaenanNia.

⁹Endehon ma puji-pujian tu TUHAN. Pabotohon ma sude na nibaenNia hahomangan!

¹⁰TUHAN na sada do Ia. Ia do nampuna hita, beta ma marjop ni roha hita. Sai marjop ni roha ma sudena na marsomba Ia.

¹¹Ro ma tu TUHAN laho mangido hagogoan. Marsomba ma tuSia ulang maradian-adian.

¹²O hamu pomparan ni si Jakob, angka naposo ni Debata! ale pomparan ni si Israel, bangso na nipiliNia! Ingot ma hahomangan na nibaen ni Debata, patulus hamu ma angka parentaNia.

¹⁴Ia ma da TUHAN, Debatanta. Dilingkup kuasoNia do portibi on sudena.

¹⁵Sai diingot Ia do parjanjianNia, hot do janjiNia ro di salolotna.

¹⁶Dohot si Abraham do dibaen Ia janji i, tapi dohot do tu si Ishak,

¹⁷lalu dipatogu dohot tu si Jakob gabe janji na hot ma i di Israel.

¹⁸“Hulehen di ho tano Kanaan gabe tano teanan,” ninna TUHAN.

¹⁹Panompang do disi umat ni TUHAN bilanganna pe na otihan.

²⁰Madang-adang sian luat na sada tu luat na asing, sian bangso na sada tu bangso na asing.

²¹Nada dipadiar Debata halahi dihapit. Hara ni halahi, digorahon TUHAN angka raja:

²²“Ulang hahua umatKu na Hutodo i, ulang antul hamu angka panurirangKi.”

²³Marende ma di TUHAN, o ale sandok portibi, marsaringar baen hamu barita haluaanNia ganop ari.

²⁴Paboa hamu tu angka bangso hagodanganNia, hagogoonNa tu jolma manusia.

²⁵Sipuji-pujion do hagodangan ni TUHAN. Manyalpui sude debata patut do nisangap TUHAN.

²⁶Hum patung sajo do debata ni angka bangso, tapi anggo TUHANta, i ma sitompa langit dohot tano.

²⁷Hagodangan dohot hamuliaan do manutupi diriNa, kuaso dohot hamogaan do manggohi bagasNia.

²⁸Puji ma TUHAN, o ale sandok jolma! Puji ma da hamuliaan dohot kuasoNa.

²⁹Puji ma goarNa na marmulia. Oban ma haul tu bagasan ingananNa. Baen ma rohamu gabe hapunjunganNia. Dompak marsomba ho tuSia.

³⁰O ale sandok tano on, humitir ma hamu di jolo ni TUHAN. Dipajongjong ma tano on jana nada humordit.

³¹O ale langit dohot tano, marsurak ma marmoga-moga! Paboa ma tu sandok bangso, TUHAN i do Raja!

³²Mangaronggur ma ho ale laut dohot sude na marhosa pe di bagasanmu. Ale padang-padang dohot sude na tubu di ginjangmu, ganop ari ma marsiriaon hamu.

³³Marsurahi ma angka hayu harangan. Marjop ni roha halahi di adopan ni TUHAN, muda ro Ia mamarenta tano on.

³⁴Lehen ma tu TUHAN tarimakasi. Angke na denggan rohaNia, jana nada tarsuhat holongNia.

³⁵Dok ma, “O ale Debata na palua hami, palua jana palagut ma hami mangulahi. Palua ma hami ale Debata, sian rante ni angka bangso panjaja! Pujionnami ma goarMu na badia i, hum tu Ho sajo do sidohononnami tarimakasi.”

³⁶Puji ma TUHAN, Debata ni Israel! Puji ma Ia saonnari ro di salolotna! Dung sidung diendehon si Asap dohot angka halak Levi i ende i, didok halak Israel ma sude, “Amen,” jana dipuji halahi ma TUHAN.

³⁷Dung i ditugaskon Raja Daud ma si Asap dohot deba nari halak Levi anso torus diurus halahi angka na porlu, domu tu karejo ibadat, di bandar inganan panyimpanan ni Poti Parjanjian ni TUHAN. Angkon markarejo halahi disi ganop ari,

³⁸diurupi si Obed-Edom anak ni si Jedutun, dohot onom pulu salapan halak nari dongan sahorongnia. Si Obed-Edom dohot si Hosa ma panjago ni angka pintu horbangan.

³⁹Tapi anggo si Zadok dohot angka malim na deba nari markarejo di inganan paribadatan na di Gibeon do dibaen.

⁴⁰Manyogot dohot potang angkon haulkonon ni halahi haul situtungon di ginjang ni langgatan hombar tu aturan na nilehen ni TUHAN tu halak Israel.

⁴¹Disi muse do si Heman dohot si Jedutun bope angka na deba nari mangurupi Malim Zadok dohot angka malim na deba nari laho mangendehon: “Puji-pujian ma di TUHAN, hara ni holong ni rohaNa na so mantak i.”

⁴²Laing si Heman muse do dohot si Jedutun dibaen mangurus sarune, simbal dohot alat musik na asing laho pariburkon angka ende puji-pujian. Angka dongan sahorong ni si Jedutun na deba nari, markarejo ma i laho manjago pintu horbangan.

⁴³Dung i mulak be ma sude jolma i tu bagasna be. Songon i muse si Daud mulak ma ia mangaligi dongan sabagasnia.