Read Batak Angkola 1 JUJUR TAON 17 Bible Online

1 JUJUR TAON 17 - Batak Angkola bible

1 JUJUR TAON 17

¹Dung hot Raja Daud mangingani bagas godangnia i, dipiohon ia ma sanoli Panurirang Natan jana didok ia ma, “Ligi ma, di bagas godang na nibaen sian hayu sampinur Libanon do au maringanan, hape Poti Parjanjian ni TUHAN i, hum di bagasan bandar ma ingananna!”

²Dialusi si Natan ma, “Dibaen raja i ma da sanga aha por ni roha ni raja i, harana urupan ni Debata do raja i.”

³Hape bornginna i didok Debata ma tu si Natan,

⁴“Kehe ma ho jana pabolkas ma tu naposongKu si Daud tonangKon, ‘Nanggo ho na giot pajongjong bagas di Au.

⁵Mamungka sian na Hupalua halak Israel sian tano Mesir lalu tu saonnari, na so jungada dope Huingani sada bagas, tapi torus sajo do Au mangadangi jana tinggal di sada bandar.

⁶Salolot di paradangan Au rap dohot bangso Israel, na so jungada dope marsapa Au tu angka pamimpin na Hutodo i, sanga hara ni aha umbaen na so dipature di Au bagas sian hayu sampinur Libanon.’ ”

⁷“Hara ni i Natan, paboa ma tu si Daud naposongKi, Au do TUHAN Pargogo na so Hatudosan mandok, ‘Na dung Hubuat do ho sian parkarejoanmu na marmahan biri-biri di padang jana Hubaen ho gabe raja di bangsongKu Israel.

⁸Madung Huurupi ho sanga na tu dia pe ho kehe jana sude musumu madung Hupatimpas dompak di parporanganmu. BaenonKu ma ho tarbonggal songon angka pamimpin na gumodang di tano on.

⁹Boti muse, na dung Hupasingkop do di bangsongKu Israel inganan bona bulu ni halahi anso tarbaen halahi mangolu di bagasan sonang nada adong be gangguan. Mamungka ro halahi tu luat on najolo dohot di na Hubaen angka pamimpin di halahi, na dung ro do halak na sai pajolo gogo mangganggu halahi, tapi nada masa be sisongon i. Marjanji ma Au laho manaluhon sude musumu, jana lehenonKu ma hagabean anso adong pomparanmu.

¹¹Sanoli on di hadudumpang ni ajalmu, di na dikubur ho rap dohot ompumunu, baenonKu ma sahalak sian anakmi gabe raja. Ia ma na giot pajongjongkon bagas di Au jana patoguonKu ma harajaannia sapanjangna.

¹³Au ma gabe Amania jana ia gabe anakKu, jana nada tarihonKu sian ia anggo asi ni rohangKu songon na dung Hubaen tu na parjolo sian ho.

¹⁴Tanggung jawab salaho tu bagasKu dohot harajaanKu pasahatonKu ma sapanjangna tu anakmi na Hupili i. Pomparannia marsundut-sundut i do na giot manjuguhi habangsania sapanjangna.’ ”

¹⁵Dipalalu si Natan ma tu si Daud sasude na nipaboa ni Debata i tusia.

¹⁶Dung i masuk ma si Daud tu Bandar Ni TUHAN. Juguk ma ia martangiang, “O TUHAN Debata, nada patut au dohot keluargangku manjagit sude pasupasu na nilobianMu.

¹⁷Lobi sian i dope tehe dibaen Ho; dibaen Ho muse dope janji taringot tu pomparanku di hatiha na giot ro. Dibaen Ho muse do au songon sada halak na godang.

¹⁸Aha dope he sidohononku tu Ho, ale TUHAN Debata? Tangkas do ditanda Ho sanga na ise au on, hape dilehen Ho do sangap di au naposoMon.

¹⁹Hara ni giotMu dohot putus ni rohaMu sandiri do dipatupa Ho on sudena jana dipatuduhon Ho tu au hagodanganku di ari na giot ro.

²⁰Nada adong na mardonok tu Ho, jana sian narobi do hami boto hum Ho do Debata.

²¹Jana di tano on sudena, nada adong sada bangso na songon bangso Israel. Hum sasada bangso Israel do bangso na nipaluaMu sian parhatobanan anso dibaen Ho gabe bangsoMu sandiri. Sandok pambaenanMu na godang dohot na pahomang roha i na nibaenMu di halahi, angka i ma mambaen tarbonggal situtu goarMu di sandok tano on. Dipalua Ho do bangsoMu sian Mesir jana dihusilkon Ho angka bangso na asing na mangambat-ambati bangsoMi.

²²Dibaen Ho do bangso Israel gabe bangsoMu sandiri salolot-lolotna. Jana Ho do TUHAN na gabe Debata ni halahi.

²³Saonnari o, TUHAN Debata, sai pahot ma sapanjangna janji na nidokMi salaho tu diringku dohot tu pomparanku jana sai patulus ma sanga aha na nijanjihonMi.

²⁴Mur tu huskusna ma nian goarMu anso dohonon ni halak ma salolot-lolotna, ‘TUHAN Pargogo na so Hatudosan, i ma Debata di Israel.’ Jana pomparanku pe marsundut-sundut giot baenonMu gabe raja di bangso on.

²⁵Hupasahat ma tangiang on tu Ho, o Debata angke madung dipabotohon Ho sandiri sandok na songon i tu naposoMon jana dipaboa Ho tu au, na giot baenonMu pomparanku gabe raja ni bangso on.

²⁶Sasada Ho do Debata ale TUHAN, jana madung dijanjihon Ho tu au na angka denggan on.

²⁷Hara ni i hupangidohon, sai pasupasu ma pomparanku anso manjagit holong ni rohaMu sapanjangna. Madung dipasupasu Ho ale TUHAN bangsoMi, jadi gabe marpasupasu ma halahi salolot-lolotna.”