Read Batak Angkola 1 JUJUR TAON 19 Bible Online

1 JUJUR TAON 19 - Batak Angkola bible

1 JUJUR TAON 19

¹Dung adong sanga na sadia honok, marujung ma ngolu ni si Nahas raja ni Amon, jana gabe raja ma anaknia si Hanun.

²Jadi didok Raja Daud ma, “Marale-ale do si Nahas denggan dohot au, jadi au pe angkon laing marale-ale do tu si Hanun, anakna i.” Jadi gabe disuru si Daud ma utusan tu tano Amon palalu tona silulutonnia. Disi lalu halahi di Amon,

³didok angka pamimpin ni luat i ma tu Raja Hanun, “Na diambang raja i dehe lakna laho pasangapkon amanta mandiang i umbaen na nisuru ni si Daud na maroban tona arsak ni rohania i? Ulang diambang raja i songon i! Na laho mangaligi-ligi luatta on do halahi disuru ia tuson anso tarbaen halahi mangarampassa!”

⁴Jadi ditangkup si Hanun ma suruan ni si Daud i, dicukur ma janggut ni halahi sasabariba, diponggol ma pakean ni halahi mamungka sian tonga-tonga lalu tu pangkal ni hae-haena, dung i disuru ma halahi kehe.

⁵Tapi ila do roha ni halahi mulak tu luat ni halahi. Dung tarboto tu si Daud taringot tu pangalaho i, ditonahon ia ma anso dipainte angka utusan i di Jeriko lopus tubu mangulahi janggut ni halahi i.

⁶Jadi torang ma diboto Raja Hanun dohot halak Amon, patunda ni pambaenan ni halahi i gabe goyak roha ni si Daud mida halahi. Jadi ditongos halahi ma 34.000 kilo perak tu Luat Mesopotamia Julu, dohot tu Maaka dohot Zoba di Siria laho mangongkosi 32.000 kareta porang dohot tentara parkudo. Jadi ro ma antong tentara ni Raja Maaka dohot sude kareta porang na niongkosan i jana marbandar ma halahi di Medeba. Marroan muse ma halak Amon sian kotana be laho marporang.

⁸Dung dibege Raja Daud pangalaho i, disuru ia ma si Joab rap dohot sude pasukannia maju mangalo musu i.

⁹Diatur halak Amon ma barisanna di jolo ni horbangan ni Raba kota sabungan ni halahi, tapi anggo angka raja na ro i mangurupi halahi, di padang-padang i ma diatur halahi barisanna.

¹⁰Diida si Joab ma na dung tarhapit ia dibaen pasukan ni musu i di jolo dohot di pudinia. Jadi gabe dipili ia ma angka parajurit na umbeteng-beteng sian Israel jana dibaen ia ma halahi paadop-adop dohot tentara ni Siria i.

¹¹Tentara ni Israel na deba nari i, dipasahat ia ma tu si Abisai angginia i; diatur si Abisai ma halahi paadop-adop dohot tentara ni halak Amon i.

¹²Didok si Joab ma tu angginia i, “Betak sai nada lobas au be mangadopi tentara ni halak Siria i, ompoti ro manolong au. Jana muda nada lobas ho be mangadopi tentara Amon i, pasti do au mangurupi ho.

¹³Pos ma rohamu! Tapuntial ma gogonta na marporang on hara ni bangsonta dohot haporluan ni angka kota ni Debatanta. Sai dipatulus TUHAN ma nian sanga aha giotNia.”

¹⁴Dung i maju ma si Joab dohot anak buania i mangaroro jana marlojongi ma tentara Siria i.

¹⁵Disi diida halak Amon marlojongi tentara Siria i, halahi pe gabe marlojongi ma sian si Abisai jana mundur ma halahi tu bagasan kota i. Dung i mulak ma si Joab tu Jerusalem.

¹⁶Ma songon baliung na tarisang dihilala halak Siria, pambaen ni halak Israel i, gabe diarahon halahi ma tentara ni halahi na tinggal, na di Habincaran ni Batang aek Efrat anso dohot marporang na dipimpin ni si Sofak, i ma panglima ni tentara ni si Hadadeser raja ni Zoba.

¹⁷Umbege i, dipalagut si Daud ma sandok pasukan ni Israel, ditaripari halahi ma Batang aek Jordan jana diatur ia ma barisan ni halahi paadop-adop dohot halak Siria i. Jadi marporang ma halahi,

¹⁸jana dibasbas tentara Israel i ma tentara Siria i lopus mundur. Dimatehon si Daud dohot pasukannia i ma 7.000 halak parkareta porang dohot tentara pardalan pat ni Siria 40.000 halak. Laing hona bunu do si Sofak panglima ni Siria i.

¹⁹Dung diida angka raja na nikuasoi ni si Hadadeser na dung talu halahi, dipangido halahi ma anso mardame dohot si Daud jana tunduk halahi tusia. Dung salpu i, nada ra be halak Siria mangurupi halak Amon.