Read Batak Angkola 1 JUJUR TAON 20 Bible Online

1 JUJUR TAON 20 - Batak Angkola bible

1 JUJUR TAON 20

¹Di pamungkaan ni musim logo na mangihut, disi ma hasomalan ni angka raja-raja kehe marporang, dioban si Joab ma tentarania ruar jana ditaluhon halahi ma Luat Amon. Nada dohot anggo Raja Daud hatiha i, tading do ia di Jerusalem. Dihuliangi si Joab dohot tentarania i ma kota Raba, diserang ia ma lalu diabiskon ia.

²Dung i ro ma si Daud jana dibuat ia ma tuku sere sian ulu ni Raja Amon lalu dipake ia tu ulunia sandiri. Adong do marborat-borat 34 kilo tuku i jana adong sada batu intanna. Laing tama do bahatna barang-barang dioban si Daud na nirampasnia sian kota i.

³Dioban ma sude halak kota i jana dipaksa markarejo, manggargaji, mamangkur dohot mangkampak. Laing songon i ma dibaen ia tu kota ni halak Amon na deba nari. Dung i mulak ma si Daud dohot tentarania i sudena tu Jerusalem.

⁴Nada sadia honok dung i, masa muse ma porang mangalo halak Pilistin di Geser. Di paraloan i dibunu si Sibkai halak Husa ma sahalak raksasa na margoar si Sipai. Jadi gabe talu ma halak Pilistin.

⁵Di paraloan na asing tu halak Pilistin, dibunu si Elhanan anak ni si Jair ma si Lahmi anggi ni si Goliat, halak Gat i. Sagodang ni balok panggulung ni abit na nitonun ma godang ni suhul ni hujur ni si Lahmi i.

⁶Di porang na asing di Gat, adong na sahalak raksasa onom jari-jari ni tanganna dohot patna. Pomparan ni raksasa na robi ma rupana.

⁷Diincak-incahi ia ma halak Israel, jadi gabe dibunu si Jonatan ma ia, i ma anak ni si Simea angkang ni si Daud.

⁸Pomparan ni raksasa na di Gat do sitolu halak na nibunu ni si Daud dohot anak buania i.