Read Batak Angkola 1 JUJUR TAON 21 Bible Online

1 JUJUR TAON 21 - Batak Angkola bible

1 JUJUR TAON 21

¹Sai giot agoon ni Sibolis do halak Israel; jadi dijajang Sibolis i ma si Daud anso mambaen sensus.

²Jadi didok si Daud ma tu si Joab dohot tu angka perwirania i, “Kehe ma hamu tu sude kota ni Israel mandalankon sensus. Giot botoonku sanga na sadia bahat ni halahi.”

³Dialusi si Joab ma, “Sai mur dipabahat TUHAN ma nian rayat ni Israel lopus saratus noli sian bahat ni na adong saonnari. Nada he madung tangkas tunduk halahi tu daulat i? Jadi ia boti aha do gunana baenon sensus on? Naron, hara ni na sala i, gabe sude lalu bangso on mangaesa!”

⁴Hape laing dipaksa raja i do si Joab mandalankon sensus i. Jadi laing kehe ma si Joab tu sude Israel, lopus tu huta suhi-suhi, dung i mulak ma ia tu Jerusalem,

⁵jana dilapurkon ia ma tu Raja Daud suha ni sensus i. Bahat ni halaklahi na sanggup marporang adong ma 1.100.000 halak di Israel jana 470.000 halak di Juda.

⁶Tapi nada dohot dope disi Marga Levi dohot Benyamin. Nada didalankon si Joab sensus di halahi hara ni na so ringkot rohania mandalankon parenta ni raja i.

⁷Nada sonang roha ni Debata di sensus i jana diuhum Ia ma halak Israel.

⁸Dung i martangiang ma si Daud tu Debata ning ia ma, “Madung mardosa au! Mangido ampun ma au hara ni otongku mambaen songon i.”

⁹Didok TUHAN ma tu Panurirang Gad, i ma panuturi ni si Daud sandiri,

¹⁰“Kehe ma ho jana dok ma tu si Daud, Hulehen tolu sipilionnia. Hubaen ma sanga aha na nipilinia i.”

¹¹Jadi kehe ma si Gad mandapotkon si Daud jana dipalalu ia ma na nitonahon ni TUHAN i, ning ia ma, “Angkon pilion ni raja i do sada sian na tolu pangalaho on:

¹²Tolu taon haleon sanga tolu bulan honokna marlojong dikojar-kojar musu, sanga tolu ari honokna diserang podang ni TUHAN marrumang nyae bala, laing disi ma dipararat surusuruanNia hamatean di sude Israel. Paputus ma di rohamu saonnari sanga aha do sipaboaonku tu TUHAN.”

¹³Dialusi si Daud ma, “Marsak sajo do au! Tapi nada giot au anggo uhuman na sian jolma. Padiar ma da hona uhum ni TUHAN hita, angke godang do ibo ni rohaNia.”

¹⁴Jadi diparo TUHAN ma nyae bala tu halak Israel jabat mate pitu pulu ribu halak sian halahi.

¹⁵Dung i disuru TUHAN muse ma sahalak surusuruan laho manyegohon Jerusalem. Hape dung lalu surusuruan i di lambung pardegean ni gandum nampuna ni si Arauna halak Jebus i, muba ma roha ni TUHAN jana didok ma tu surusuruan i, “Tuk ma i! Paso ma!”

¹⁶Diida si Daud do habang-habang surusuruan i di antara ni langit dohot tano. Marpodang do surusuruan i tiop di tanganna songon na laho mangaroncohon Jerusalem. Jadi marabit goni ma si Daud dohot angka pamimpin ni Israel tanda ni solsol ni roha, manungkap tu tano.

¹⁷Dung i martangiang ma si Daud, ning ia ma, “O Debata, au do parsala. Au do marsuru anso dibaen sensus i. Aha ma he anggo sala ni bangso na malang bagian on! O TUHAN Debatangku, au ma dohot keluargangku uhumi, tapi padao ma bala on sian bangsoMu.”

¹⁸Dung i disuru Surusuruan Ni TUHAN i ma si Gad anso didok ia tu si Daud, angkon pajongjongonnia langgatan di TUHAN di inganan pardegean ni gandum nampuna ni si Arauna i.

¹⁹Jadi gabe kehe ma si Daud hombar tu na niparentahon ni TUHAN markite sian si Gad.

²⁰Topet do hatiha mardege gandum si Arauna dohot opat halak anaknia di pardegean i. Marnida surusuruan i gabe kehe ma anak ni si Arauna na opat i martabuni.

²¹Dung diida si Arauna ro Raja Daud, didapotkon ia ma si Daud jana manungkap ma ia tu tano marsomba tusia.

²²Didok si Daud ma tusia, “Na giot pajongjong langgatan do au dison baen di TUHAN, anso mantak bala on. Dok ma sanga na sadia arga ni tano on, hugarar pe di ho.”

²³“Ah, dibuat raja i ma da songon i,” ning si Arauna mangalusi, “jana dibaen raja i ma da sanga aha na giot baenon ni raja i. Indon bo lombu baen haul situtungon, tarpake raja i do angka hayu pardegean on baen sobanna. Laing dibuat raja i ma da gandum on baen haul, perei pe hulehen sudena i.”

²⁴Tapi dialusi raja i ma, “Ulang songon i antong! Giotku angkon gararanku do sanga na sadia argana. Nada giot au mangalehen di TUHAN sanga na ahamu sanga manghaulkon haul situtungon na perei-perei di au.”

²⁵Jadi digarar si Daud ma tu si Arauna onom ratus hepeng sere panggarar ni tano i.

²⁶Di inganan i ma dipajongjong si Daud langgatan di TUHAN jana dihaulkon ia ma haul situtungon dohot haul pardamean disi. Dung salpu i martangiang ma ia jana dialusi TUHAN do tangiangnia i markite-hite na paijur api sian langit manutungi angka haul na di ginjang ni langgatan i.

²⁷Dung i disuru TUHAN ma anso dipasarung surusuruan i podangna i laho mangantak bala i.

²⁸Songon i ma dialusi TUHAN tangiang ni si Daud di na nihaulkon ni si Daud haul di langgatan na di inganan pardegean ni gandum ni si Arauna i.

²⁹Di hatiha i, di halongonan dope Bandar Ni TUHAN na nibaen ni si Musa i jana langgatan inganan ni haul situtungon i laing di inganan paribadatan na di Gibeon dope.

³⁰Tapi nada puluk si Daud anggo tusi laho manghatai dohot Debata, hara ni biarnia mida podang ni Surusuruan Ni TUHAN i.