Read Batak Angkola 1 JUJUR TAON 22 Bible Online

1 JUJUR TAON 22 - Batak Angkola bible

1 JUJUR TAON 22

¹Jadi ning si Daud ma, “Angkon dison noma baenon Bagas Ni TUHAN Debata. Jana on ma langgatan inganan ni halak Israel manghaulkon haul situtungon tu TUHAN.”

²Diparentahon Raja Daud ma anso marlagut sudena bangso na asing na maringanan di tano Israel. Disuru ia ma deba, manuhil batu laho mambaen Bagas Ni Debata.

³Dipalagut ia ma bahat bosi laho mambaen paku dohot encel ni pintu horbangan hayu di bagas i. Tumbaga na dung marlagut pe madung bahat sajo, jabat nada be tartimbang.

⁴Disuru buat ia sian halak Tirus dohot Sidon bahat hayu sampinur Libanon.

⁵Dibaen ia pe sudena i, hara ni na nidok ni rohania do di bagasan, “Anggo Bagas Ni Debata na giot pajongjongon ni si Salomo anakki angkon sumurung do tohongna dohot jegesna jana tarbonggal tu na satano on. Tapi dibaen poso dope ia jana nada sadia pangalamanna, jadi angkon pasingkoponku do i.” Jadi painte so marujung ngolu ni si Daud, madung diparade ia hian bahat sajo na hasaya tusi.

⁶Dipiohon si Daud ma anaknia si Salomo jana disuru ia ma pajongjongkon Bagas Ni TUHAN Debata na nisomba ni halak Israel.

⁷Didok si Daud ma tu si Salomo, “Amang, madung honok adong nietku laho pajongjong sada bagas laho pasangapkon TUHAN Debatangku.

⁸Hape didok TUHAN, madung mabahattu au marporang dohot mamunu jolma. Hara ni i ma umbaen na so diisinkon TUHAN au pajongjongkon bagas diSia.

⁹Tapi haru songon i pe, dilehen Ia do janji tu au mandok, ‘Adong ma sada anakmu. Mamarenta do ia di bagasan sonang, angke urupanKu do ia jabat nada adong masa porang. Goaron ma ia si Salomo,[20] angke salolot ia mamarenta, sonang jana aman do baenonKu Israel.

¹⁰Anakmi noma na giot pajongjongkon bagas di Au. Gabe anakKu ma ia jana gabe Amangnia ma Au. Hot do harajaan ni Israel di pomparannia sapanjangna.’ ”

¹¹Dung i didok si Daud ma mangulahi, “Saonnari amang, sai diurupi TUHAN Debatamu ma ho tongtong. Jana sai tulus ma nian tarpajongjong ho bagas i di TUHAN songon na dung dijanjihonNa i.

¹²Jana sai ibo nian roha ni TUHAN Debatami laho mangalehen habisuhon dohot roha di ho anso tarrajai ho Israel hombar tu angka aturanna.

¹³Anggo burju do ho mangoloi sude aturan na nilehen ni TUHAN tu si Musa di bangso Israel, manjadi ma karejomu. Angkon puluk do ho jana marpos ni roha. Ulang ho mabiar sanga na mangadopi aha pe jadi.

¹⁴Loja do huhilala palagut-lagutkon sere na 3.400 ton i dohot perak na 34.000 ton i, i ma sibaenon tu pambangunan ni Bagas Ni Debata i. Tamba ni i adong dope tumbaga dohot bosi na so taretong bahatna. Hayu pe dohot batu, madung singkop sude hubaen, tapi angkon laing tambaanmu dope i.

¹⁵Bahat do angka parkarejo di ho: Situhil batu, tukang hayu, tukang batu jana bahat muse do angka na malo-malo mamake jama-jamaan

¹⁶na mardomu tu sere, perak, tumbaga dohot bosi. Antong, manigor ma pungka karejo i! Sai diurupi TUHAN ma ho da amang!”

¹⁷Dung i disuru si Daud ma sude pamimpin ni Israel anso diurupi halahi si Salomo.

¹⁸Ning ia ma, “Madung diurupi TUHAN Debatamunu i hamu, jana dilehen dame dohot hasonangan di hamu. Dilehen Ia do hatiha hadenggananNa di au anso tartaluhon au sude angka bangso na mangingani luat on hian. Saonnari tunduk tu hamu noma halahi dohot tu TUHAN.

¹⁹Jadi, ulang so oloanmunu TUHAN Debatamunu i sian sude roha dohot gogomunu. Pungka hamu ma pajongjong bagas di Debata, anso dipamasuk tusi Poti Parjanjian ni TUHAN dohot sandok parkokas na asing i na nipake di bagasan na mandalankon ibadat.”