Read Batak Angkola 1 JUJUR TAON 23 Bible Online

1 JUJUR TAON 23 - Batak Angkola bible

1 JUJUR TAON 23

¹Dung matobang situtu si Daud, diangkat ia ma si Salomo gabe raja di Israel.

²Dipalagut Raja Daud ma sude pamimpin ni Israel dohot sude malim bope halak Levi.

³Dung i disuratkon ia ma sude goar-goar ni sude halaklahi sian Marga Levi na marumur tolu pulu taon tu ginjang. Pungu ma sude 38.000 halak.

⁴Jadi disuru ia ma 24.000 halak sian halahi laho mangawasi parkarejoan di Bagas Ni Debata, onom ribu halak manjama soal administrasi dohot parkaro-parkaro pangadilan,

⁵opat ribu halak maniop tugas mangawal, jana opat ribu halak nari mamuji TUHAN mardongan musik na diparade hian.

⁶Dibagi tolu si Daud ma halak Levi i marguru tu horong ni halahi be, i ma horong ni si Gerson, Kehat dohot Merari.

⁷Dua anak ni si Gerson: Si Ladan dohot si Simei.

⁸Tolu anak ni si Ladan: Si Jehiel, si Zetam dohot si Joel.

⁹Halahi ma kapala di horong pomparan ni si Ladan. (Si Selomit, si Hasiel dohot si Haran, i ma anak ni si Simei.)[21]

¹⁰Opat anak ni si Simei mangihutkon parjojor ni umurna: Si Jahat, si Zisa, si Jeus dohot si Beria. Nada piga halak pomparan ni si Jeus dohot si Beria, gabe dietong sahorong do halahi.

¹²Opat anak ni si Kehat: Si Amram, si Jishar, si Hebron dohot si Usiel.

¹³Si Amram ma amang ni si Harun dohot si Musa. (Anggo si Harun dohot pomparannia sapanjangna noma dibaen markarejo hum mangurus angka panjamaan na nipake maribadat, manutung hamonyan di TUHAN, mangoloi Tuhan dohot mamasumasu rayat mangasahon goar ni Tuhan.

¹⁴Angka dakdanak ni si Musa naposo ni Debata i pe dietong masuk tu Marga Levi do.)

¹⁵Dua anak ni si Musa, i ma si Gersom dohot si Elieser.

¹⁶Gabe pamimpin do si Sebuel anak ni si Gersom.

¹⁷Si Elieser hum sada do anaknia, si Rehabia goarna. Anggo si Rehabia bahat sajo do anaknia.

¹⁸Si Jishar anak ni si Kehat na paduahon, adong do anaknia na margoar si Selomit, gabe kapala ni horong do ia.

¹⁹Si Hebron anak ni si Kehat na patoluhon, adong do opat anaknia: Si Jeria, si Amarya, si Jahasiel dohot si Jekameam.

²⁰Si Usiel anak ni si Kehat na paopatkon, adong do dua anaknia: Si Mika dohot si Jisia. Si Mika ma kapala ni horong.

²¹Dua anak ni si Merari, goarna si Mahli dohot si Musi. Si Mahli dua anaknia, i ma si Eleasar dohot si Kis,

²²tapi mate do si Eleasar nada adong anaknia; hum borunia do na adong, i ma na marbagas tu angka anak ni udana, anak ni si Kis.

²³Si Musi anak ni si Merari na paduahon, adong do tolu anaknia: Si Mahli, si Eder dohot si Jeremot.

²⁴I ma pomparan ni si Levi na nisuratkon mangihutkon horong dohot ripe ni halahi be. Sanga ise halahi na marumur dua pulu taon tu ginjang, adong ma tugasna di Bagas Ni Debata.

²⁵Didok si Daud ma, “Aman do dibaen TUHAN Debata ni Israel ngolu ni bangsoNia, jana maringanan di Jerusalem do Ia sandiri salolot-lolotna.

²⁶Hara ni i, nada jabat dohot be halak Levi mananggung na hasaya di Bandar Ni TUHAN dohot sude parkokas sipakeon di paribadatan.”

²⁷Domu tu angka parenta na parpudi na nibaen ni si Daud, sandok halak Levi, muda dung marumur dua pulu taon tu ginjang angkon suratkonon ma anso dohot martugas.

²⁸Angkon urupan ni halahi ma angka malim pomparan ni si Harun di na mandalankon ibadat mangihutkon parjojorna di Bagas Ni Debata, pature-ture angka alaman dohot angka kamar-kamarna, lalu manjago anso ulang jabat adong na gabe hodar sandok barang na dung ditontuhon hian di TUHAN.

²⁹Tanggung jawab ni halahi ma roti sihaulkonon tu Debata, topung na nipake gabe sihaulkonon tu TUHAN, kue na nipis na so marragi, haul na nipanggang, dohot topung na nicampur dohot miak zetun. Angkon laing timbangon dohot suhaton ni halahi do jolo angka haul siobanon tu Bagas Ni Debata.

³⁰Tamba ni i, angkon marende muse dope halahi laho mamuji TUHAN ganop manyogot dohot ganop borngin,

³¹bope bagi na sadihari muda adong haul na ditutung di TUHAN di Ari Sabat, di Ari Pesta Bulan Na Imbaru dohot di angka ari pesta na asing i. Laing dibaen muse dope aturanna taringot tu bahat ni halak Levi sanoli markarejo. Ditugaskon ma halak Levi anso sai tongtong manyomba tu TUHAN.

³²Dibaen tanggung jawab ni halahi mangurus Bandar Ni TUHAN dohot Bagas Ni Debata dohot mangurupi angka kahanggi ni halahi, i ma angka malim pomparan ni si Harun di na mandalankon ibadat di inganan i.