Read Batak Angkola 1 JUJUR TAON 24 Bible Online

1 JUJUR TAON 24 - Batak Angkola bible

1 JUJUR TAON 24

¹Opat anak ni si Harun: Si Nadab, si Abihu, si Eleasar dohot si Itamar. Jumolo do mate si Nadab dohot si Abihu sian amang ni halahi jana nada adong anak di halahi. Jadi hara ni i, diangkat ma si Eleasar dohot si Itamar anggi ni halahi i gabe malim. Dibagi si Daud ma pomparan ni si Harun marsasapunguan marguru tu karejo ni halahi. Laho mandalankon karejo i, diurupi si Zadok pomparan ni si Eleasar dohot si Ahimelek pomparan ni si Itamar ma si Daud.

⁴Pomparan ni si Itamar dibagi salapan punguan ma, tapi anggo pomparan ni si Eleasar dibagi onom bolas punguan do, harana umbahat do sian pomparan ni si Eleasar na gabe kapala ripe.

⁵Diundi do laho manontuhon karejo i, harana rap adong do na manjabat di Bagas Ni Debata dohot angka pamimpin ni ugamo sian pomparan ni si Eleasar bope sian pomparan ni si Itamar.

⁶Margeleran ma pomparan ni si Eleasar dohot pomparan ni si Itamar manarik undian di jolo ni raja, angka pagawena. Malim Zadok songon i dohot angka kapala ripe sian golongan malim dohot angka kapala ripe sian golongan Levi. Dung i adong ma sada halak sekretaris na manyuratkon goar-goar ni halahi si Semaya goarna, anak ni si Netaneel Marga Levi.

⁷On ma na dua pulu opat punguan i mangihutkon parjojor ni pangundina: 1. Joyarib — 13. Hupa 2. Jedaya — 14. Jesebeab 3. Harim — 15. Bilga 4. Seorim — 16. Imer 5. Malkia — 17. Hesir 6. Miyamin — 18. Hapises 7. Hakos — 19. Petahya 8. Abia — 20. Jeheskiel 9. Jesua — 21. Jakin 10. Sekanya — 22. Gamul 11. Elyasib — 23. Delaya 12. Jakim — 24. Maasia

¹⁹Parsusun ni goar-goar ni halahi i disurat mangihutkon karejo ni halahi masuk tu Bagas Ni Debata dohot mandalankon karejo di bagasan ibadat marguru tu na dung ditontuhon ni si Harun, ompu ni halahi i, laing songon na niparentahon ni TUHAN, Debata ni Israel.

²⁰Deba nari sian pomparan ni Levi laing dohot do: Si Jehdeya, pomparan ni si Subael pomparan ni si Amram;

²¹Si Jisia, pomparan ni si Rehabia;

²²Si Jahat pomparan ni si Selomot, pomparan ni si Jishar.

²³Si Jeria, si Amarya, si Jahasiel dohot si Jekameam dakdanak ni si Hebron mangihutkon parjojor ni umurna;

²⁴Si Samir pomparan ni si Usiel sian Mika;

²⁵Si Zakaria, pomparan ni si Usiel sian si Jisia, anggi ni si Mika.

²⁶Si Mahli, si Musi dohot si Jaasia pomparan ni si Merari.

²⁷Si Jaasia tolu anaknia: Si Sobam, si Zakur dohot si Hibri.

²⁸Si Mahli dua anaknia, goarna si Eleasar dohot si Kis. Nada adong anggo anak ni si Eleasar, tapi anggo si Kis adong do sada anaknia, i ma na margoar si Jerahmeel.

³⁰Anak ni si Musi adong do tolu halak: Si Mahli, si Eder dohot si Jerimot. Angka i ma ripe di Marga Levi.

³¹Laho manontuhon geleran ni halahi martugas, ganop kapala ripe rap dohot sada halak angginia, kehe ma manarik undian songon na nibaen ni kahanggi ni halahi, i ma angka malim pomparan ni si Harun. Di jolo ni Raja Daud rap dohot si Zadok, si Ahimelek dohot sude angka kapala ripe sian golongan ni malim-malim dohot sude golongan ni halak Levi, disi do ditarik undian i.