Read Batak Angkola 1 JUJUR TAON 25 Bible Online

1 JUJUR TAON 25 - Batak Angkola bible

1 JUJUR TAON 25

¹Laho mamimpin angka pardalan ni ibadat, dipili si Daud rap dohot angka pamimpin ni halak Levi ma sian angka horong ni halak Levi: Si Asap, si Heman dohot si Jedutun. Palalu angka tona na sian Debata ma tugas ni halahi, mardongan sora ni musik hasapi, gambus dohot simbal. Angka na mamimpin ibadat rap dohot sude pardalan na jojor mangihutkon rombonganna, dipili ma angka halak na nipajojor di toru on:

²Anak ni si Asap na opat i: Si Zakur, si Josep, si Netania dohot si Asarela. Si Asap ma kapala ni halahi, na nitugaskon ni raja pabolkaskon tona na sian Debata.

³Anak ni si Jedutun na onom i: Si Gedalia, si Zeri, si Jesaya, si Simei, si Hasabia dohot si Matica. Amang ni halahi i ma na mamimpin halahi pabolkaskon tona ni Debata didongani musik hasapi dohot angka ende puji-pujian dohot hatarimakasion tu TUHAN.

⁴Anak ni si Heman: na opat bolas i: Si Bukia, si Matania, si Usiel, si Sebuel, si Jerimot, si Hananya, si Hanani, si Eliata, si Gidalti, si Romamti-Eser, si Josbekasa, si Meloti, si Hotir dohot si Mahasiot. Si Hemam ma panurirang ni raja i sandiri.

⁵Dilehen TUHAN do anak na opat bolas i di si Heman rap dohot tolu borunia domu tu janji ni TUHAN laho mambaen sangap disia.

⁶Sudena anak ni si Heman i parmusik simbal do, parhasapi dohot pargambus, na nipimpin ni amang ni halahi laho mangihutkon upacara ni ibadat di Bagas Ni Debata. Dijagit si Asap, si Jedutun dohot si Heman do sian raja mardomu tu karejo nasida.

⁷Angka na tangkas tarlatih do anak ni halahi na dua pulu opat halak i, dohot kahanggi ni halahi i ma angka halak Levi, i ma angka parmusik na malo. Sudena 288 halak ma bahat ni halahi.

⁸Laho manontuhon geleran ni parkarejo, sudena ma halahi manarik undian — na poso dohot na matobang, na dung marpangalaman bope na baru marsiajar.

⁹Dibagi dua pulu opat rombongan ma si 288 halak i marguru tu horong-horong ni halahi be na nipimpin ni sada halak. Dua bolas halak ma sapunguan. Songon on ma parjojorna mangihutkon undianna: 1. Si Josep sian horong ni si Asap — 13. Si Subael 2. Si Gedalya — 14. Si Matica 3. Si Zakur — 15. Si Jerimot 4. Si Jisri — 16. Si Hanania 5. Si Netania — 17. Si Josbekasa 6. Si Bukia — 18. Si Hanani 7. Si Jesarela — 19. Si Maloti 8. Si Jesaya — 20. Si Eliata 9. Si Matania — 21. Si Hotir 10. Si Simei — 22. Si Gidalti 11. Si Asareel — 23. Si Mahasiot 12. Si Hasabia — 24. Si Romamti-Eser