Read Batak Angkola 1 JUJUR TAON 26 Bible Online

1 JUJUR TAON 26 - Batak Angkola bible

1 JUJUR TAON 26

¹Songon on ma parbagi ni tugas di halak Levi pangawal ni Bagas Ni Debata. Sian horong ni si Korah, ditodo ma si Meselemia anak ni si Kore na sian keluarga ni si Ebyasap.

²Adong pitu anaknia na tarsurat mangihutkon parjojor ni umurna: Si Zakaria, si Jediael, si Zebaya, si Jatniel,

³si Elam, si Johanan, si Elyoenai.

⁴Na mangihut ditodo ma si Obed-Edom: Dipasupasu Debata do ia salapan anaknia na tarsurat mangihutkon parjojor ni umurna: Si Semaya, si Josabad, si Joah, si Sakar, si Netaneel,

⁵si Amiel, si Isakar dohot si Peuletai.

⁶Si Semaya anak siangkaan ni si Obed-Edom, adong do onom anaknia: Si Otni, si Refael, si Obed, si Elsabad, si Elihu dohot si Semakia; angka halak na godang do sudena i jana na marbakat, lumobi si Elihu dohot si Semakia.

⁸Di na mandalankon karejona na mangawal i dilehen keluarga ni si Obed-Edom do onom pulu dua halaklahi na marbakat situtu.

⁹Keluarga ni si Meselemia mangalehen salapan bolas halak na marbakat.

¹⁰Sian horong ni si Merari ditodo ma si Hosa. Opat halak anaknia: Si Simri (nada anak siangkaan ia, tapi dibaen amangnia i ma ia na gabe pamimpin),

¹¹si Hilkia, si Tebalia dohot si Zakaria. Tolu bolas halak sudena sian keluarga ni si Hosa na gabe pangawal di Bagas Ni Debata.

¹²Angka pangawal ni Bagas Ni Debata i, dibagi-bagi do marrombongan mangihutkon horong-horongna be. Laing dilehen muse do karejo di halahi di bagasan Bagas Ni Debata songon halak Levi na deba nari i.

¹³Ganop horong, na bahat sanga siotik-otik, angkon dohot do manarik undian anso diboto sanga na di pintu dia halahi manjago.

¹⁴Si Selumia dapotan karejo manjago di pintu adop Habincaran. Anaknia si Zakaria, na sai tongtong mangalehen sipaingot na denggan, dapotsa bagianna manjago pintu na mangadop tu Utara.

¹⁵Si Obed-Edom dapotan karejo manjago pintu na mangadop tu Selatan jana angka anaknia i dapotan karejo manjago angka gudang panyimpanan ni haporluan.

¹⁶Si Supim dohot si Hosa dapot karejo ma manjago pintu sabola Hasundutan dohot pintu horbangan Saleket i ma na di dalan panangkohan. Karejo ni na mangawal i ditontuhon ma domu tu parbagi ni hatihana margeleran.

¹⁷Ganop ari sabola Habincaran adong ma onom halak pangawal, di Utara opat halak jana di Selatan opat halak. Angka gudang ni haporluan pe opat halak ma pangawalna: dua halak di sada gudang.

¹⁸Di emperna i dibaen ma dua halak pangawal jana di dalan-dalan na i donok tusi opat halak.

¹⁹Songon i ma parbagi ni karejo ni pangawal na nipasahat tu horong ni si Korah horong ni si Merari.

²⁰Angka Marga Levi na deba nari, dipasahat ma tanggung jawabna salaho tu parhepengon di Bagas Ni Debata dohot salaho tu gudang inganan panyimpanan ni angka silehen-lehen di Debata.

²¹Si Zetam dohot si Joel, dua nari anak ni si Ladan na asing, dipasahat ma tanggung jawab ni halahi salaho tu parhepengon ni Bagas Ni Debata dohot salaho tu angka gudang. (Anak ni si Gerson do si Ladan adong do sanga na piga-piga ripe pomparannia dohot ma disi ripe ni anaknia ni Jehiel.)

²³Dapotan karejo muse do pomparan ni si Amram, si Jishar, si Hebron dohot si Usiel.

²⁴Kapala ni parhepengon ni Bagas Ni Debata, i ma si Sebuel sian horong ni si Gersom anak ni si Musa,

²⁵Solkot dope ia tu si Selomit, i ma sian si Elieser anggi ni si Gersom i. Songon on ma parjojorna pomparan ni si Elieser lalu tu si Selomit; Elieser, Rehabia, Jesaya, Joram, Zikri, Selomit.

²⁶Si Selomit dohot halahi sahorong ma na martanggung jawab salaho tu sude silehen-lehen na nihaulkon ni Raja Daud, kapala ni ganop ripe, angka pamimpin ni marhorong-horong dohot na sian perwira. Angka silehen-lehen i, i ma deba sian angka barang na hona rampas ni halahi di angka parporangan jana na nihaulkon ni halahi baen sipakeon lumobi di Bagas Ni Debata.

²⁸Pendekna, anggo si Selomit dohot halahi na sahorong martanggung jawab ma di sude na dung dipasahat baen sipakeon lumobi di Bagas Ni Debata, masuk ma disi angka haul na dipasahat sian si Samuel na nilehen ni Raja Saul, si Abner anak ni si Ner dohot na nilehen ni si Joab anak ni si Zeruya, tanggung jawab ni si Selomit ma sudena i dohot kahanggina.

²⁹Anggo tu pomparan ni si Jishar, si Kenania dohot angka anakna i, dipasahat ma karejo administrasi dohot angka karejo mangadili di Israel.

³⁰Sandok urusan ugamo dohot urusan pamarenta di Israel Hasundutan ni Batang aek Jordan, dipasahat ma i tu si Hasabia dohot tu saribu pitu ratus halak koum sisolkotnia; angka halak na godang do sudena i sian pomparan ni si Hebron.

³¹Di taon paopat puluhon mamarenta Raja Daud, dibaen do panangkasion di tonga-tonga ni pomparan ni si Hebron. Sian panangkasion i tarida ma na adong do hape angka parajurit na beteng-beteng na maringanan di Jaeser na di Luat Gilead.

³²Sandok urusan ugamo dohot urusan pamarenta di Israel Habincaran ni Batang aek Jordan — i ma Luat Ruben, Gad dohot Manase Habincaran — dipasahat ma i tu dua ribu pitu ratus kapala ripe sian horong ni si Jeria, angka halak na godang do sudena i na nipili ni Raja Daud.