Read Batak Angkola 1 JUJUR TAON 28 Bible Online

1 JUJUR TAON 28 - Batak Angkola bible

1 JUJUR TAON 28

¹Diparentahon si Daud ma anso marlagut sude pamimpin ni Israel di Jerusalem. Jadi marlagut ma sudena di Jerusalem angka kapala ni marga, na markarejo di pamarenta, angka kapala ni horong, angka pangawas ni sinadongan dohot pahan-pahanan ni raja i maradu angka dakdanakna — pendekna, sude ma disi angka na sangap sian bagas godang, perwira dohot halak na godang-godang.

²Jongjong ma si Daud di jolo ni halahi mandok hata, ning ia ma, “Hamu angka dongan sabangsongku, marsitangi-tangian ma hita jolo! Madung honok di bagasan rohangku laho pajongjong sada bagas batu inganan ni Poti Parjanjian i, sidegean ni pat ni TUHAN Debatanta. Madung hupasingkop na hasaya laho pajongjong sada bagas inganan parsombaan tuSia.

³Hape nada dipaloas TUHAN au patupahon na songon i hara ni na dung bahat mudar huduruskon songon parajurit au.

⁴Madung ditodo TUHAN Debata na nisomba ni Israel au dohot pomparanku mamarenta di Israel sapanjangna. Ditodo Ia do Marga Juda anso maruli sada pamimpin, sian tonga-tonga ni Marga Juda i ditodo TUHAN ma isi ni bagas ni damang. Jana sian sude isi ni bagas ni damang, tumbuk do rohaNia manodo au jana mambaen gabe raja di ginjang ni sude Israel.

⁵Dilehen Ia do hagabean bahat anak di au jana sian anakki sudena ditodo Ia do si Salomo anso mamarenta di Israel, harajaan ni TUHAN i.

⁶Didok TUHAN do tu au songon on, ‘Anakmu si Salomo i do na giot pajongjongkon bagas di Au. Madung Hutodo ia gabe anakKu jana Au gabe amangnia.

⁷Anggo laing dihaburjuhon ia do mangihutkon sandok aturan dohot angka na Huparentahon songon na nipatupania saonnari, pahotonKu ma harajaannia sapanjangna.’ ”

⁸Dung i diuduti si Daud ma mandok, “Jadi saonnari hamu angka rayatku, di jolo ni Debatanta dohot di jolo ni parlagutan ni sude Israel bangso ni TUHAN on, hupangido dohot gomos, anso ihutkon hamu sandok na niparentahon ni TUHAN Debatanta i. Muda songon i, laing hamu ma nampuna luat na denggan on jana pateankononmunu ma on tu pomparanmunu salolot-lolotna.”

⁹Jadi tu si Salomo, didok si Daud ma, “Amang, Debata na nisomba ni amangmu ma oku gabe Debatamu. Angkon oloanmu do Ia sian sonang dohot ias ni rohamu. Harana diboto Ia do sude pikiran dohot pos ni rohanta. Muda dijalahi ho Ia, gabe padumpang ma dohot Ia, tapi muda ditadingkon ho, tulakkononNia noma ho salolot-lolotna.

¹⁰Angkon botoonmu do na dung ditodo TUHAN ho laho pajongjongkon bagas na gabe hapunjungan ni TUHAN. Antong, saonnari situtui ma laho patuluskon i.”

¹¹Dung i dipasahat si Daud ma tu si Salomo sude sangkap na laho mambangun Bagas Ni Debata, mambangun angka gudang maradu angka kamarna sude dohot Bilik Na Sun Badia inganan pangampunan ni dosa.

¹²Laing dipasahat si Daud ma sude sangkap na dung dipikirkon ia salaho tu bagian ni alamanna dohot angka kamar humaliangna, dohot salaho tu angka gudang panyimpanan ni na hasaya di Bagas Ni Debata dohot panyimpanan ni angka silehen-lehen di TUHAN.

¹³Dipasahat ia muse ma sangkap salaho tu parbagi ni angka malim dohot halak Levi, salaho tu angka karejo sikarejohonon ni halahi, i ma karejo sipatuluson ni halahi di Bagas Ni Debata dohot na pature-turehon sandok parkokas sipakeon di bagasan ibadat.

¹⁴Dilehen ia do panogu-noguon laho mambaen angka parkokas na sian sere dohot perak,

¹⁵laho mambaen lampu dohot pat ni parlampuan,

¹⁶laho mambaen meja sian perak, dohot sude meja sere inganan ni roti na rade di TUHAN.

¹⁷Songon i panogu-noguon salaho tu bahat ni sere na polin sipakeon laho mambaen garpu, mangkuk dohot botol-botol, sanga na sadia bahat ni perak dohot sere laho mambaen angka pinggan,

¹⁸bahat ni sere na polin sipakeon laho mambaen langgatan inganan panutungan ni hamonyan dohot laho mambaen kareta inganan ni angka kerub di ginjang ni Poti Parjanjian ni TUHAN i.

¹⁹Dung i didok Raja Daud ma, “Madung adong sudena i di sangkap na nisuratkon marguru tu na nidok ni TUHAN sandiri tu au, anso dipatulus.”

²⁰Dung salpu i didok Raja Daud ma muse tu si Salomo anakna i, “Ulang ho mabiar, pos ma rohamu. Pungka ma karejo i jana ulang ho gamang sanga na maradopkon aha pe. Urupan ni TUHAN Debata na husomba i do ho. Nada tadingkononNia ho. Sai na dongananNia do ho lopus sidung dibaen ho sude karejo i.

²¹Anggo parbagi ni karejo di Bagas Ni Debata madung sidung i ditontuhon sian tonga-tonga ni angka malim dohot halak Levi. Di bagasan jop ni roha do angka parkarejo na malo-malo di jurusanna be laho mangurupi ho, jana mangoloi do tu parentamu angka pamimpin rap dohot sandok rayat i.”