Read Batak Angkola 1 JUJUR TAON 29 Bible Online

1 JUJUR TAON 29 - Batak Angkola bible

1 JUJUR TAON 29

¹Dung i mandok hata ma Raja Daud tu sude halak na marlagut i disi, ning ia ma, “Sian sude dakdanakku, si Salomo ma na nitodo ni Debata. Tapi na bajar dope ia jana na hurang pangalaman, hape songon i ma borat ni karejo on. Boti muse nada na giot bagas godang ni jolma na giot bangunon on, tapi na giot bagas paribadatan do tu TUHAN Debata.

²Madung nian hupasingkop angka bahan tu bagas i intap ni gogongku. Madung hupasingkop sere, perak, tumbaga, bosi, hayu, angka batu sigodang arga dohot angka batu intan, angka batu na martompa marragam rupa baen parhiasan dohot batu marmar bahat sajo.

³Jabat do hara ni holong ni rohangku di Bagas Ni Debatangki, madung hupasahat muse perak dohot sere sian sinadonganku sandiri:

⁴Sere na dumenggan lobi saratus ton dohot perak na polin adong do tu dua ratus opat pulu ton baen lampis ni dinding ni Bagas Ni Debata i dohot sipakeon ni angka tukang na malo-malo mambaen angka barang-barang. Antong, saonnari ise dope na ra mangalehen haulna tu TUHAN sian sonang ni rohana?”

⁶Jadi ro ma angka kapala ni marhorong-horong, kapala marga, angka perwira dohot angka na martanggung jawab salaho tu sinadongan ni raja i, didok halahi ma na dohot do halahi giot manyumbang.

⁷Jadi dilehen halahi muse angka bahan na dison laho mambangun Bagas Ni Debata i: Sere lobi saratus pitu pulu ton, perak lobi tolu ratus opat pulu ton, tumbaga mardonok tu onom ratus dua pulu ton dohot bosi lobi tolu ribu opat ratus ton.

⁸Sanga ise angka na maniop batu intan, dipasahat be ma i tu si Jehiel anso dipamasuk tu Kas ni Bagas Ni Debata. (Halak Levi na sian horong ni si Gerson do anggo si Jehiel.)

⁹Sian na nionjar ni rohana diparleheni jolma i ma tu TUHAN jana jop do roha ni halahi hara ni na dung bahat dihaulkon halahi. Raja Daud pe, i noma jop ni rohania.

¹⁰Di jolo ni halak na bahat i, dipuji Raja Daud ma TUHAN. Ning ia ma, “O TUHAN, Debata na nisomba ni ompunami si Jakob, sipujion ma Ho salolot-lolotna!

¹¹Tutu do Ho na godang, jana na markuaso. Marmulia do Ho, manongtong jana na godang. Ho do nampuna sasude na adong di langit dohot na di tano on. Raja na bonggal do Ho, na mangarajai sandok na adong.

¹²Sian Ho do haroroan ni sasude hamoraan dohot hasonangan; dirajai Ho do sasudena mardongan hagogoonMu dohot kuasoMu; guru di Ho do mambaen sanga ise gabe halak na godang dohot na gogo.

¹³Saonnari, ale Debatanami, mandok tarimakasi ma hami tu Ho, jana hami puji ma goarMu na godang i.

¹⁴Anggo satutuna nian, nada adong tarlehen au dohot rayatkon sanga na aha tu Ho, angke na nilehenMu do sasudena jana sanga aha pe na hami pasahat on, laing Ho do nampunasa.

¹⁵Diboto Ho do ale TUHAN, laing songon angka ompunami do, hami pe laing songon halak na ro do jana paisolat. Songon halinu na mamolus do ngolunami, jana nada tarbaen malua hami sian hamatean.

¹⁶Ale TUHAN, Debatanami, hami palagut do angka barang sigodang arga on dison laho pajongjongkon sada bagas di Ho anso tarbaen hami pasangapkon goarMu na badia i. Tapi sian Ho sandiri do hami jagit i sudena jana laing Ho muse do nampunasa.

¹⁷Huboto do, na niujimu roha ni ganop halak jana dihalomohon rohamu do halak parroha na ias. Sian sada ni rohangku, di bagasan jop ni roha huhaulkon ma sudena on tu Ho. Madung tangkas huida sanga songon dia bangsoMu na marlagut dison marjop ni roha marsioban haulna be tu Ho.

¹⁸Ale TUHAN, Debata na nisomba ni si Abraham, si Ishak dohot si Jakob ompunami i, jagohon ma bangsoMon anso hot songon i holong ni rohanami tu Ho jana urupi ma halahi anso tongtong burju mangoloi Ho.

¹⁹Lehen ma tu si Salomo anakki, roha na marsitutu laho mangihutkon sude na niparentahonMu bope laho pajongjong sada bagas paribadatan na dung hupasingkop haporluanna.”

²⁰Dung ditangianghon ia songon i didok si Daud ma tu halak na bahat na marlagut disi, ning ia ma, “Puji hamu ma TUHAN Debatamunu i!” Jadi dipuji halahi ma TUHAN, Debata na nisomba ni angka ompu ni halahi i. Manungkap ma halahi pasangapkon TUHAN dohot raja i.

²¹Ancogotna i, disambol halahi ma angka pahan-pahanan sihaulkonon gabe haul tu TUHAN, lalu dibagi-bagi muse ma tu rayat i. Tamba ni i, adong dope saribu nari lombu jantan, saribu biri-biri jantan dohot biri-biri jara-jara na nisambol jana na nitutung himpal saribu di ginjang ni langgatan i. Dihaulkon halahi muse ma dohot haul anggur.

²²Mangan minum ma halahi di ari i marmoga-moga di adopan ni TUHAN. Jadi laing dipadua noli halahi muse ma pabotohon na dung gabe raja si Salomo. Mangasahon goar ni TUHAN, dirasmihon halahi ma ia gabe raja ni halahi dohot si Zadok gabe malim.

²³Jadi laho manggonti si Daud gabe raja, marhabangsa ma si Salomo na dung ditotopkon ni TUHAN i. Raja na mardohar do ia jana na marsahala di sude bangso Israel.

²⁴Sude angka na juguk di pamarenta dohot militer maradu sude angka anak ni si Daud na deba nari i, dioku halahi do si Salomo gabe raja.

²⁵Dibaen TUHAN do sude rayat i marlomo ni roha mida si Salomo jana dibaen Ia muse si Salomo dumohar sian sude raja na jungada mamarenta di Israel.

²⁶Sude do Israel dirajai si Daud anak ni si Isai i,

²⁷opat pulu taon honokna. Pitu taon lolotna mamarenta ia di Hebron jana tolu pulu tolu taon di Jerusalem.

²⁸Na mora do ia boti na sangap jana ginjang do umurnia di na marujung ngolunia. Anaknia si Salomo do manggonti ia gabe raja.

²⁹Taringot tu riwayat ni ngolu ni Raja Daud sian mulana lopus tu ujungna madung disuratkon i di Buku Sejarah Ni Panurirang Samuel, Panurirang Natan dohot Panurirang Gad.

³⁰Dicaritohon do di buku i salaho tu pangarajainia, kuasonia dohot sude na masa tusia, na masa tu Israel dohot tu angka harajaan na humaliang Israel.