Read Batak Angkola 1 JUJUR TAON 5 Bible Online

1 JUJUR TAON 5 - Batak Angkola bible

1 JUJUR TAON 5

¹On ma pomparan ni si Ruben anak siangkaan ni si Jakob. (Hara ni na dung mambaen tilako si Ruben dohot rading ni amana, gabe dibuat ma haknia songon anak siangkaan jana dipasahat ma i tu si Josep.

²Tapi sian sudena pomparan ni si Jakob Marga Juda ma na gumogo jana angka raja ni bangso Israel pe marasal sian marga i muse do.)

³Opat anak ni si Ruben anak siangkaan ni si Jakob i: Si Hanokh, si Palu, si Hesron dohot si Karmi.

⁴Songon on ma parjojorna pomparan ni si Joel: Si Semaya, si Gog, si Simei, si Mika, si Reaya, si Baal dohot si Beera ma pamimpin ni Marga Ruben na nitangkup ni si Tiglat-Pileser raja ni Asur na lalu dioban tu habuangan.

⁷Di tarombo, tarsurat do angka kapala ni horong sian Marga Ruben songon on: Jeiel, Zakaria,

⁸dohot si Bela anak ni si Asas, pahompu ni si Sema sian horong Joel. Maringanan di Aroer do horong on dohot di luat namarbalok sian Aroer sabola Utara lalu tu Nebo dohot Baalmeon.

⁹Bahat sajo do pahan-pahanan ni halahi di Luat Gilead. Jadi hara ni i ma umbaen na niinganan ni halahi luat sabola Habincaran lopus tu parhorsihan na manggistang lopus tu Batang aek Efrat.

¹⁰Di hatiha ni Raja Saul, diserang Marga Ruben ma tano Hagri sabola Habincaran ni Gilead jana dibunu halahi ma halak na mangingani i, diingani halahi muse ma tanona i.

¹¹Sabola Utara ni luat ni Marga Ruben, maringanan do Marga Gad di tano Basan lopus tu Salka sabola Habincaran.

¹²Si Joel ma na umpompar horong na sumangap, jana si Safam ma na umpompar horong nomor dua, si Jaenai dohot si Safat ma na umpompar angka horong na asing i na di Basan.

¹³Marga Gad na deba nari, i ma na masuk tu horong na pitu nari, na mangihut on, i ma: Mikael, Mesulam, Soba, Jorai, Jakan, Zia dohot Eber.

¹⁴Pomparan ni si Abihail anak ni si Huri ma halahi. Parjojor ni tarombo ni halahi songon on ma sian toru tu ginjang: Abihail, Huri, Jaroah, Gilead, Mikael, Jisisai, Jahdo, Bus.

¹⁵Si Ahi anak ni si Abdiel, pahompu ni si Guni ma kapala ni angka horong i.

¹⁶Maringanan di Luat Basan dohot Gilead do halahi, dohot ma i di angka kota na di luat i bope sude padang-padang na di Saron.

¹⁷Di hatiha si Jotam gabe raja ni Juda, dohot si Jerobeam raja ni Israel, disi ma dibaen tarombo on.

¹⁸Di Marga Ruben, Gad dohot Manase Habincaran adong do 44.760 halak parajurit na dung tangkas malo mamake parince, podang dohot pana.

¹⁹Marporang ma halahi mangalo angka Marga Jetur, Nafis, dohot Nodab; masuk tu bangso Hagri do marga na tolu i.

²⁰Ditaluhon halahi do sude jolma i, angke porsaya do angka parajurit i tu Debata jana mangido tolong tuSia do halahi; jadi dioloi Debata pangidoan ni halahi i jana dilehen ma hamonangan di halahi.

²¹Dibaen hara ni hagiot ni Debata do parporangan i, gabe bahat do musu i dibunu halahi. Ditaban halahi muse dope 100.000 halak, jana dirampas halahi 50.000 unto, 250.000 biri-biri dohot 2.000 halode. Dung i, hot ma halahi maringanan di luat i lopus hona taban ma halak Israel lalu dioban tu habuangan.

²³Angka Marga Manase na di Habincaran, maringanan di Luat Basan do halahi lopus tu Baalhermon, Senir dohot Dolok Hermon. Mur lolot mur mabahat do halahi.

²⁴Angka on ma kapala ni horong-horong ni halahi: Si Hefer, si Jisei, si Eliel, si Asriel, si Jeremia, si Hodawi dohot si Jahdiel. Angka parajurit na barani do halahi.

²⁵Nada setia halak Israel tu Debata na nisomba ni angka ompu ni halahi, tapi ditadingkon halahi do ia gabe maribadat halahi tu angka debata ni bangso-bangso na nipaorot ni Debata sian tano Kanaan i.

²⁶Jadi hara ni i, dipatubu Debata ma tu bagasan roha ni si Pul raja ni Asur, gabe kehe ma ia mamorangi luat i. Laing tarbarita do goar ni si Pul, si Tiglat-Pileser. Jadi gabe dioban ia ma Marga Ruben, Gad dohot Manase na di Habincaran gabe hona taban jana dibuang tu Halah, Habor, Hara dohot tu inganan na di lambung ni Batang aek Gosan. Disi noma halahi maringanan lopus tu sadari on.