Read Batak Angkola 1 JUJUR TAON 9 Bible Online

1 JUJUR TAON 9 - Batak Angkola bible

1 JUJUR TAON 9

¹Tarsurat do sude halak Israel mangihutkon horongna be. Tarsurat do i di bagasan Buku Raja-raja Ni Israel. Dioban do rayat ni Israel tu habuangan laho manguhumi halahi hara ni dosana.

²Na parjolo mulak sian halahi tu tano dohot kota ni halahi, i ma angka halak na bahat, angka malim, halak Levi dohot angka na markarejo di Bagas Ni Debata.

³Angka na marasal sian Marga Juda, Benyamin, Efraim dohot Manase, maringanan di Jerusalem ma.

⁴Adong do 690 ripe sian Marga Juda na maringanan di Jerusalem tarmasuk ma disi pomparan ni na tolu halak anak ni si Juda na margoar si Peres, si Sela dohot si Zerah. Si Utai ma na mamimpin pomparan ni si Peres. Parjojorna pomparan ni si Utai sian toru tu ginjang, songon on ma: Utai, Amihud, Omri, Imri dohot Bani. Pomparan ni si Sela, si Asaya ma pamimpinna. Kapala ripe do ia. Pomparan ni si Zera, si Jeuel ma pamimpinna.

⁷Sian Marga Benyamin, adong do 956 ripe na maringanan di Jerusalem. Angka kapala ripe di halahi, i ma: Si Salu anak ni si Mesulam, pahompu ni si Hodawia anak ni si Hasenua. Si Jibnea anak ni si Jeroham. Si Ela anak ni si Usi, pahompu ni si Mikri. Si Mesulam anak ni si Sefaca, pahompu ni si Rehuel anak ni si Jibnea.

¹⁰Angka on ma malim na maringanan di Jerusalem: Si Jedaya, si Joyarib dohot si Jakin. Si Asarya anak ni si Hilkia, pomparan ni si Mesulam do i, si Zadok, si Merayot dohot si Ahitub. (Si Asarya ma kapala pagawe di Bagas Ni Debata.) Si Adaya anak ni si Jeroham; si Pasur dohot si Malkia ma ompu na umpompar ia. Si Masai anak ni si Abdiel; si Jahsera ma ompuna, si Mesulam, si Mesilemit, si Imer.

¹³Angka malim na gabe kapala ripe, adong do 1.760 halak sudena. Angka na malo noma sudena halahi di ragam rupa ni karejo di Bagas Ni Debata.

¹⁴Angka halak Levi na didok na maringanan di Jerusalem: Si Semaya anak ni si Hasub, i ma pomparan ni si Asrikam dohot si Hasabia sian horong ni si Merari, si Bakbakar, si Heres dohot si Galal. Si Matania anak ni si Mika, ompu na umpompar ia ma si Zikri dohot si Asap. Si Obaja anak ni si Semaya; ompu na umpompar ia i ma si Galal dohot si Jedutun. Si Berekia anak ni si Asa, pahompu ni si Elkana maringanan di luat ni kota Netofa do ia.

¹⁷Angka panjago ni Bagas Ni Debata na maringanan di Jerusalem, i ma si Salum, si Akub, si Talmon, si Ahiman dohot angka koum sisolkot ni halahi. Si Salum ma pamimpin ni halahi.

¹⁸Lopus tu ari sadari on dijago pomparan ni halahi ma Pintu Horbangan Raja[9] di sabola Habincaran. Na jolo manjago angka pintu ni horbangan laho tu bandar ni halak Levi do dibaen karejo ni halahi na sahorong.

¹⁹Na markarejo manjago pintu laho masuk tu Bandar Ni TUHAN dibaen ma si Salum anak ni si Kore, pahompu ni si Ebiasap, rap dohot deba nari laing na sian horong ni si Korah. Najolo pe laing i do karejo ni ompu ni halahi dompak na markobas di parbandaran ni TUHAN halahi.

²⁰Si Pinehas anak ni si Eleasar — sai dijagohon TUHAN ma nian ia! — jungada do gabe kapala ni halahi.

²¹Si Zakaria anak ni si Muselemia pe laing panjago ni pintu horbangan ni Bandar Ni TUHAN do.

²²Adong do 212 halak bahatna na nipili laho manjagoi angka pintu horbangan. Mangihutkon parjojor ni huta ni halahi do tarsurat goar ni halahi. Na nilehen ni Raja Daud dohot Panurirang Samuel do jabatan i tu angka ompu ni halahi.

²³Mamungka sian i ma halahi dohot angka pomparan ni halahi hot gabe panjago di pintu horbangan di Bagas Ni Debata.

²⁴Di pintu na sian Utara, Selatan, Habincaran dohot Hasundutan dibaen ma sada halak be kapala ni panjago pintu i.

²⁵Huhul sasanoli ro do kahanggi ni halahi na maringanan di huta-huta i laho mangurupi halahi sasaminggu.

²⁶Halak Levi do kapala ni panjago pintu na opat halak i, jana hot do jabatan ni halahi i. Halahi do na martanggung jawab salaho tu angka kamar na di Bagas Ni Debata, bope angka barang-barang na nisimpan disi.

²⁷Di lambung ni Bagas Ni Debata i do inganan ni halahi, harana angkon manjago halahi dohot mambuka pintu horbangan i ganop ari.

²⁸Deba halak Levi i, salaho tu angka parkokas ibadat ma tanggung jawabna. Halahi ma na mangetong muda dompak mangharuarkon dohot paulakkon.

²⁹Deba nari salaho tu angka panjamaan ibadat ma tanggung jawabna dohot na mangkobasi topung, anggur, miak zetun, hamonyan dohot parmasakna bage.

³⁰Tapi anggo salaho tu na mancampur angka parmasakna i, tanggung jawab ni angka malim do i.

³¹Anggo na mambaen roti sihaulkonon[10] tanggung jawab ni sada halak Levi do i na margoar si Matitia, anak siangkaan ni si Salum sian horong ni si Korah.

³²Angka na sian horong ni si Kehat pasingkopkon roti na rade[11] di Bagas Ni Debata ganop Ari Sabat.

³³Deba sian halak Levi i, gabe parende ma di Bagas Ni Debata. Angka kapala ripe do halahi na maringanan di piga-piga bagas di Bagas Ni Debata jana nada adong karejo ni halahi na asing, hara ni na mardinas arian na borngin.

³⁴Angka halak na nidok di ginjang i ma kapala ripe ni Marga Levi hombar tu horong-horong ni halahi. Maringanan di Jerusalem do halahi.

³⁵Dipungka si Jeiel do kota Gibeon, jana maringanan disi ma ia. Na nibuatnia margoar si Maaka,

³⁶jana anaknia siangkaan goarna si Abdon. Na deba nari margoar si Zur, si Kis, si Baal, si Ner, si Nadab,

³⁷si Gedor, si Ahio, si Zakaria dohot si Miklot,

³⁸i ma amang ni si Simea. Maringanan di Jerusalem do pomparan ni halahi rap dohot deba nari halak na asing laing sian halahi sahorong.

³⁹Amang ni Raja Saul, margoar si Kis jana ompungna si Ner. Opat anak ni si Saul: Si Jonatan, si Malkisua, si Abinadab dohot si Esbaal.[12]

⁴⁰Adong do anak ni si Jonatan, goarna si Meribaal,[13] i ma amang ni si Mika.

⁴¹Opat anak ni si Mika: Si Piton, si Melek, si Tahrea dohot si Ahas.

⁴²Anak ni si Ahas, margoar si Jaera. Tolu anak ni si Jaera: Si Alemet, si Asmawet dohot si Zimri. Parjojorna pomparan ni si Zimri songon on ma: Mosa,

⁴³Bina, Refaya, Elasa dohot Asel.

⁴⁴Onom anak ni si Asel: Si Asrikam, si Bokru, si Ismael, si Searia, si Obaja dohot si Hanan.