Read Batak Angkola 2 JUJUR TAON 1 Bible Online

2 JUJUR TAON 1 - Batak Angkola bible

2 JUJUR TAON 1

¹Madung tohong parjuguk ni si Salomo anak ni Raja Daud i gabe raja di harajaan Israel. Dipasupasu TUHAN Debatania do ia jana dibaen do markuaso situtu ia.

²Sude kapala ni pasukan sisaribu dohot pasukan sisaratus, sude pagawe ni pamarenta, sude kapala ripe maradu sude rayat ni Israel diparentahon Raja Salomo ma

³anso kehe rap dohot ia tu inganan paribadatan na di Gibeon. Jadi kehe ma halahi tusi, dibaen disi do antong Bandar Ni TUHAN na nipauli ni si Musa naposo ni TUHAN i dompak di halongonan i dope. (

⁴Tapi anggo Poti Parjanjian ni Tuhan i, di Jerusalem do di bagasan bandar na nibaen ni Raja Daud di na nipaimbarnia Poti i sian Kiryat-Jearim.)

⁵Langgatan loyang na nipauli ni si Besaleel anak ni si Uri, pahompu ni si Hur i pe laing di Gibeon dope di jolo ni Bandar Ni Tuhan i. Disi ma Raja Salomo dohot sude rayat i manyomba TUHAN.

⁶Jana di ginjang ni langgatan loyang na di jolo ni Bandar Parmianan ma dihaulkon raja i saribu pahan-pahanan gabe haul situtungon di TUHAN.

⁷Bornginna i dipataridahon Debata ma diriNa tu si Salomo jana didok ma, “Aha do giotmu silehenonKu di ho?”

⁸Dialusi si Salomo ma, “TUHAN, madung dipatuduhon Ho hinasantak ni holong ni rohaMu maradopkon damang si Daud, jana saonnari madung diangkat Ho au on gabe raja manggontihon ia.

⁹Saonnari, ale TUHAN Debata, sai patulus ma baga-bagaMu tu damang i. Madung diangkat Ho au gabe raja di ginjang ni bangso na godang na so taretong be bahatna.

¹⁰Hara ni i sai lehen ma nian di au habisuhon dohot parbinotoan na huhaporluhon laho mamarenta halahi. Anggo nada songon i bia ma he pambaenku mamarenta bangsoMu na godang on?”

¹¹Dialusi Debata ma tu si Salomo, “Denggan do da pangidoanmi. Nada hakayoan dipangido ho sanga sinadongan sanga anso tarbonggal sanga hamatean ni musumu, sanga umur na ginjang di dirimu sandiri, tapi habisuhon do dohot parbinotoan laho mamarenta bangsongKu na Hupasahat tu ho.

¹²Jadi hara ni i, lehenonKu ma di ho habisuhon dohot parbinotoan. Tamba ni i baenonKu ma ho mur tu makmurna, mur makayo jana tarbonggal sumurung sian angka raja sanga na dia di hatiha na dung salpu bope tu hatiha na giot ro.”

¹³Dung i kehe ma si Salomo manadingkon inganan paribadatan na di Gibeon inganan ni Bandar Ni TUHAN i, lalu mulak ma ia tu Jerusalem. Disi ma ia mamarenta Israel.

¹⁴Dipalengkap ia ma tentarania dohot saribu opat ratus kareta porang dohot dua bolas ribu kudo porang. Di Jerusalem ma deba ingananna dibaen ia, jana na deba nari i di angka kota na asing.

¹⁵Di zaman ni si Salomo mamarenta, barang na somal do anggo perak dohot sere di Jerusalem, dos dohot batu; jana hayu sampinur Libanon sun do bahatna tarsongon hayu ara na somal.

¹⁶Dipamasuk do marhite angka agen ni raja i kudo sian Mesir dohot sian Kewe,

¹⁷dohot angka kareta porang sian Mesir, dung i digadis muse ma i tu angka raja ni Het dohot angka raja ni Siria mararga seratus lima pulu hepeng perak sada kudo, jana onom ratus hepeng perak tu sada kareta porang.