Read Batak Angkola 2 JUJUR TAON 10 Bible Online

2 JUJUR TAON 10 - Batak Angkola bible

2 JUJUR TAON 10

¹Kehe ma si Rehabeam tu Sikem, dibaen madung marlagut disi sude rayat Israel bagian Parutara laho manabalkon ia gabe raja.

²Jadi di na tarboto pangalaho i tu si Jerobeam anak ni si Nebat na dung kehe tu Mesir lari sian Raja Salomo, mulak ma ia tu Israel.

³Diundang rayat na sian Utara i ma si Jerobeam, lalu rap kehe ma halahi dohot ia mangadop tu si Rehabeam. Didok halahi ma,

⁴“Madung borat boban na nilehen ni si Salomo amang ni raja i tu hami. Muda dipanayang raja i do bobannami jana diurahi pardangolannami, tunduk do hami tu raja i.”

⁵Dialusi si Rehabeam ma, “Angkon jolo marpikir dope au. Taulahi ma tolu ari on.” Jadi marmulahan ma angka jolma i.

⁶Jadi dipangido si Rehabeam ma sipaingot sian angka na tobang-tobang na dung jungada gabe panuturi ni si Salomo amangnia i, “Bia do baenonku alus tu angka jolma i? Aha do sipaingot sian hamu?” ning ia.

⁷Dialusi halahi ma, “Muda dibaen raja i na denggan tu angka halak i jana diusahahon raja i antong pajopkon roha ni halahi marhite na mangalehen alus na denggan, tontu setia do halahi tu raja i salolot-lolotna.”

⁸Tapi nada diterge si Rehabeam sipaingot ni angka na tobang-tobang i. Mur kehe noma ia tu angka halak na poso na sangoncap dohot ia jana na dung gabe panuturinia.

⁹“Bia do alus sibaenonku tu angka jolma na mangido anso hupanayang boban ni halahi? Aha do sipaingotmunu tu au?” ning ia manyapai halahi.

¹⁰Dialusi halahi ma, “Songon on ma sugari sura didok raja i tu halahi, ‘Sagale-galena au, laing gumogo dope au sian damang.

¹¹Madung borat boban na nilehen ni damang i tu hamu, tapi umboratan dope na giot silehenonku. Disambok ia do hamu dohot hotang, tapi anggo au giot libasonku dope hamu dohot libas-libas na marduri bosi!’ ”

¹²Dung tolu ari, mangulahi ma si Jerobeam dohot jolma i sude mangadop tu Raja Rehabeam laing songon na niparentahon ni raja tu halahi, “Angkon mulak ma hamu muse tu au tolu ari na giot ro.”

¹³Maralo tu sipaingot ni angka na tobang-tobang i, kasar do pangkulingnia tu rayat na marroan i tusia,

¹⁴songon na didok ni angka halak na poso i, didok ia ma, “Madung borat boban na nilehen ni amangku tu hamu, tapi mur borat dope baenonku boban i. Disambok ia do hamu dohot hotang, tapi anggo au libasonku do hamu dohot libas-libas na marduri bosi!”

¹⁵Jana nada diterge ia pangidoan ni rayat i. Tapi tutu hagiot ni TUHAN Debata do i, harana antong angkon tarjadi do alatan ni Panurirang Ahia na sian Silo i taringot tu si Jerobeam anak ni si Nebat i.

¹⁶Di na niida ni rayat i bahaso na so ra do raja i manangihon, marsurak ma halahi, “Pardulinta i si Daud i dohot pomparanna i! So jungada bagi aha dibaen i tu hita. Tole, halak Israel, beta hita mulak! Padiar ma diurus si Rehabeam i dirina!” Jadi gabe mulak ma rayat ni Israel,

¹⁷jana hum di Luat Juda sajo noma si Rehabeam gabe raja.

¹⁸Disuru si Rehabeam ma si Adoniram, sada halak pangawas ni parkarejo paksa laho patenangkon rayat i. Tapi didangguri halahi ma ia dohot batu lopus mate. Marnida i diompoti si Rehabeam ma manengget karetania lalu kehe ia maporus tu Jerusalem.

¹⁹Mamungka sian hatiha i, sai na mangalo noma rayat na di bagian Utara ni harajaan Israel maradopkon angka raja pomparan ni si Daud.