Read Batak Angkola 2 JUJUR TAON 11 Bible Online

2 JUJUR TAON 11 - Batak Angkola bible

2 JUJUR TAON 11

¹Di na lalu Raja Rehabeam di Jerusalem, dipalagut ia ma 180.000 tentarania na dumenggan sian Marga Benyamin dohot Juda laho mamorangi halak Israel dohot pasuangkon kuasonia maradopkon angka marga na di Israel bagian Parutara.

²Tapi disuru TUHAN ma Panurirang Semaya

³palaluhon barita on tu si Rehabeam dohot tu sude Marga Juda dohot Benyamin,

⁴“Ulang hamu marporang mangalo angka kahanggimunu halak Israel i. Mulak ma hamu sude. Sanga aha na tarjadi on, giotKu do i.” Jadi gabe diihutkon halahi sudena ma parenta ni TUHAN i jana nada tulus be kehe halahi mamorangi si Jerobeam.

⁵Tinggal ma si Rehabeam di Jerusalem, jana disuru ia ma halak mambangun angka benteng di angka kota na di Luat Juda dohot Benyamin, i ma:

⁶kota Betlehem, Etam, Tekoa,

⁷Bet-Zur, Soko, Adulam,

⁸Gat, Mares, Zip,

⁹Adoraim, Lakis, Aseka,

¹⁰Zora, Ayalon dohot Hebron.

¹¹Dipatogu ia ma angka kota na marbenteng i jana dibaen ia ma sada halak komandan pasukan di ganop kota i. Dipasingkop ia do di ganop kota i parlengkapan ni si panganon, miak zaitun, anggur dohot

¹²parince dohot hujur. Jadi songon i ma laing hot anggo Luat Juda dohot Benyamin di bagasan kuasoNia.

¹³Kehe ma angka malim dohot halak Levi sian sude luat ni Israel mardomu dohot si Rehabeam.

¹⁴Ditadingkon angka halak Levi i ma padang-padang ruput dohot tano ni halahi jana pinda ma halahi tu Juda dohot Jerusalem, harana nada diisinkon si Jerobeam raja ni Israel dohot na manggontihon ia be halahi markarejo songon malim ni TUHAN.

¹⁵Madung diangkat si Jerobeam angka malimnia sandiri laho manghobasi di angka inganan parsombaan ni gana-ganaan dohot parsombaan ni begu, jihin maradu patung ni lombu na nibaennia sandiri.

¹⁶Marroan ma angka halak sian sude marga ni Israel na tutu situtu giot manyomba TUHAN, Debata ni Israel tu Jerusalem, mangihutkon angka halak Levi i anso tarbaen halahi manghaulkon haul tu TUHAN, Debata na nisomba ni ompu ni halahi.

¹⁷Jadi hara ni i gabe gumogo ma harajaan Juda. Tolu taon honokna dipartahankon halahi pamarentaon ni si Rehabeam anak ni si Salomo i, jana mangolu halahi songon di zaman ni na mamarenta Raja Daud dohot Raja Salomo.

¹⁸Si Mahalat do boru na nibuat ni si Rehabeam; amang ni si Mahalat i ma si Jerimot anak ni si Daud, jana inangna i ma si Abihail boru ni si Eliab, pahompu ni si Isai.

¹⁹Adong do tolu anak ni halahi; si Jeusi, si Semarya dohot si Zaham.

²⁰Dung i dibuat si Rehabeam ma si Maaka boru ni si Absalom. Adong ma opat anak ni halahi: Si Abia, si Atai, si Zisa dohot si Selomit.

²¹Adong do salapan bolas dadaboru ni si Rehabeam dohot onom pulu radingnia, dua pulu salapan anak halaklahi dohot onom pulu borunia. Sian dadaborunia i sude dohot radingnia i, si Maaka do na humolong rohania.

²²I ma dalanna umbaen na sai jumop rohania mida si Abia anak ni si Maaka i ulang pado sude anaknia na asing i jana dipili ia ma i laho manggontihon ia gabe raja.

²³Marbisuk do si Rehabeam di na mangalehen karejo tu angka anaknia i dohot mambaen inganan ni halahi di angka kota na marbenteng di sude Luat Juda dohot Benyamin. Dilehen ia do panganon ni halahi marlobi-lobi, jana laing disadiohon ia do bahat dadaboru ripe ni halahi.