Read Batak Angkola 2 JUJUR TAON 12 Bible Online

2 JUJUR TAON 12 - Batak Angkola bible

2 JUJUR TAON 12

¹Dung gabe togu parjuguk ni Raja Rehabeam, dipasiding ia ma dohot rayatnia i Tona Ni TUHAN,

²jana nada setia tuSia. Jadi gabe hona uhum ma halahi dibaen TUHAN. Di taon palimahon mamarenta si Rehabeam, ro ma si Sisak raja ni Mesir mamorangi Jerusalem

³mardongan saribu dua ratus kareta porang, onom pulu ribu tentara na markudo dohot parajurit nada taretong bahatna, dohot ma disi pasukan ni Libia, Suki dohot Sudan.

⁴Dirampas ia ma angka kota na marbenteng di Juda lalu maju ma ia lopus tu Jerusalem.

⁵Ma marlagut di hatiha i Raja Rehabeam dohot angka pamimpin ni Juda di Jerusalem anso maporus sian si Sisak. Ro ma Panurirang Semaya mandok tu halahi, “Songon on do pandok ni TUHAN, ‘Ditadingkon hamu do Au antong, jadi saonnari Au pe Hutadingkon ma hamu anso gabe dikuasoi si Sisak hamu.’ ”

⁶Dioku raja i ma dohot angka pamimpin i bahaso na dung mardosa halahi. Didok halahi ma, “Tigor do sanga aha na nidok ni TUHAN i.”

⁷Di na diida ni TUHAN na dung patoruk roha halahi, didok Ia ma mangulahi tu si Semaya, ninna ma, “Hara ni na dung dioku halahi dosana, nada be pusaonKu halahi tapi manigor ma paluaonKu; nada jabat maropuk Jerusalem. Tapi haru songon i pe, laing

⁸kuasoan ni si Sisak do halahi, anso diboto halahi parasingan ni na mangoloi tu Au dohot na mangoloi tu angka na markuaso di portibi on.”

⁹Jadi ro ma Raja Sisak mamorangi kota Jerusalem jana dibuat ia ma angka barang-barang sigodang arga sian Bagas Ni Debata dohot sian bagas godang ni raja i, tarmasuk ma i angka parince sere na nibaen ni Raja Salomo.

¹⁰Baen gontina dipauli si Rehabeam ma angka parince loyang jana dipasahat ia ma i tu angka perwira na manjago pintu horbangan ni bagas godang i.

¹¹Ganop kehe raja i tu Bagas Ni Debata, dipake angka pangawal i ma parince i jana dipaulak ma mangulahi tu kamar ni panjago i.

¹²Hara ni na nipatoruk ni raja i rohana di adopan ni TUHAN, gabe mombun ma muruk ni TUHAN tusia jana nada diabiskon TUHAN ia. Gabe denggan muse ma na masa di Juda.

¹³Mamarenta di Jerusalem do si Rehabeam jana mur magodang do kuasonia. Marumur opat pulu sada taon ma ia di na gabe raja, jana pitu bolas taon honokna ia mamarenta di Jerusalem, kota na dipili ni TUHAN sian sasude kota na adong di Luat Israel, anso gabe inganan paribadatan tuSia. Si Naama boru na sian tano Amon do inang ni si Rehabeam.

¹⁴Mambaen na jahat do si Rehabeam hara ni na so marusaha ia patuluskon hagiot ni TUHAN.

¹⁵Barita salaho tu si Rehabeam sian mulana lalu tu ujungna dohot tarombonia disuratkon do i di bagasan Buku Sejarah Ni Panurirang Semaya dohot di bagasan Buku Sejarah Ni Panurirang Ido. Sai marpupu do tarjadi parporangan antara ni si Rehabeam dohot si Jerobeam.

¹⁶Marujung ma ngolu ni si Rehabeam jana dikuburkon di kuburan ni angka raja na di Kota Ni si Daud. Si Abia anaknia i ma gabe raja manggontihon ia.