Read Batak Angkola 2 JUJUR TAON 13 Bible Online

2 JUJUR TAON 13 - Batak Angkola bible

2 JUJUR TAON 13

¹Di taon pasalapan bolaskon mamarenta Raja Jerobeam di Israel, gabe raja ma si Abia di Juda,

²jana mamarenta ma ia tolu taon lolotna di Jerusalem. Si Mikaya boru ni si Usiel halak kota Gibea i do inangnia. Dung i mapultak ma porang antara ni si Abia dohot si Jerobeam.

³Diarahon si Abia ma 400.000 tentara, jana si Jerobeam mangarahon 800.000 parajurit.

⁴Maradopan ma pasukan na dua i di luat partoran Efraim. Manangkok ma si Abia tu ginjang ni Dolok Zemaraim lalu manggora-gora ma ia sian i tu si Jerobeam dohot halak Israel, “Tangihon!

⁵Diboto hamu do na dung mamudun janji TUHAN, Debata ni Israel dohot si Daud bahaso na giot mamarenta ia dohot pomparannia di Israel salolot-lolotna. Nada tarbaen sundat janji i.

⁶Haru songon i pe, laing mangalo do si Jerobeam anak ni si Nebat i tu si Salomo rajana i.

⁷Dipalagut ia do sada garombolan ni halak na jahat jana dipaksahon ia ma hagiotnia tu si Rehabeam anak ni si Salomo i, na maposotu dope di hatiha i jana nada marpangalaman laho mangalo.

⁸Saonnari diambang ho ma lakna tarbaen mangalo kuaso na nilehen ni TUHAN tu pomparan ni si Daud, hara ni godang ni pasukanmu dohot hara ni na adong angka lombu seremunu na nibaen ni si Jerobeam gabe debatamunu.

⁹Nada he madung diusir hamu angka malim ni TUHAN pomparan ni si Harun dohot angka halak Levi i? Sanga na ise na marpor ni roha gabe malim, i ma dibaen hamu gontina, asalkan ma ra maroban sada lombu sanga pitu biri-biri, dibaen hamu ma i malim tu na so Debata, harana songon i do antong carana dibaen angka bangso na asing mangangkat malim ni halahi. Tapi anggo hami, nada hami baen na songon i.

¹⁰Totop do hami mangoloi tu TUHAN Debatanami jana nada hami tadingkon Ia. Hot do pomparan ni si Harun angka malim di hami, jana tongtong do angka halak Levi mangurupi halahi.

¹¹Ganop manyogot dohot potang sai ditutung halahi do dupa jana dihaulkon halahi do haul situtungon di TUHAN, jana dipasingkop halahi do roti di ginjang ni meja. Ganop borngin dipagara halahi do angka lampu di pat ni parlampuan sere. Tongtong do sai hami oloi angka parenta ni TUHAN. Hape anggo hamu, madung manadingkon Ia.

¹²Debata sandiri do anggo pamimpinnami jana dison do angka malimNia. Ma pola rade halahi laho mangombus sarune songon tandana di hami laho mamorangi hamu. O, hamu halak Israel, ulang alo hamu TUHAN, Debata ni ompumunu! Nada bolas monang hamu!”

¹³Di hatiha i disuru si Jerobeam ma deba sian pasukannia i laho mangadang pasukan ni Juda i sian pudi, hape anggo na deba nari i laing mangadopi sian jolo do.

¹⁴Di na niida ni pasukan ni Juda na hona hobuk halahi, marsurak ma halahi mangido tolong tu TUHAN. Diombus angka malim ma sarune,

¹⁵lalu disurakkon pasukan ni Juda i ma surak-surak parporangan jana maju ma halahi mangaroro dipimpin si Abia. Ditaluhon Debata ma si Jerobeam dohot pasukan ni Israel i,

¹⁶lopus lari halahi. Monang ma halak Juda dibaen Debata maralohon halahi.

¹⁷Godang do antong hataluan na nibaen ni si Abia dohot pasukannia i di halak Israel; lima ratus ribu parajurit na dumenggan mate.

¹⁸Monang ma halak Juda dibaen mangasahon TUHAN Debata ni ompuna do halahi.

¹⁹Di na mangkojar pasukan ni si Jerobeam i si Abia, dibuat ia ma sanga na piga kota dohot angka desa na humaliangna i. I ma angka kota Betel, Jesana dohot Efron.

²⁰Salolot di na mamarenta si Abia, nada tarpasuang si Jerobeam be kuasonia. Ujungna mate ma ia dibunu TUHAN.

²¹Tapi anggo si Abia mur tamba ma kuasonia. Adong do opat bolas halak dongan saripenia, dohot dua pulu dua anaknia jana onxom bolas halak borunia.

²²Barita na asing salaho tu si Abia, sude pandohan dohot pambaenannia disuratkon do di bagasan Buku Sejarah Ni Panurirang Ido.