Read Batak Angkola 2 JUJUR TAON 14 Bible Online

2 JUJUR TAON 14 - Batak Angkola bible

2 JUJUR TAON 14

¹Dung marujung ngolu ni Raja Abia jana dikuburkon di kuburan ni raja-raja na di Kota Ni si Daud, gabe raja ma anaknia si Asa manggontihon ia. Di toru ni pamarentaon ni si Asa marhasonangan do tano Israel sampulu taon lolotna.

²Pasonang roha ni TUHAN Debatana do si Asa marhite na patuluskon na tigor dohot na denggan.

³Disingkirkon ia do angka langgatan ni bangso na asing dohot angka inganan parsombaan ni gana-ganaan. Disarsarkon ia do angka tugu ni debata jana diparrumpakkon ia do angka tiang ni Debata Asera.

⁴Disuru ia do rayat ni Juda patuluskon hagiot ni TUHAN, Debata ni ompu ni halahi dohot mangoloi angka pangajaran maradu angka parentaNa.

⁵Sude inganan pamelean ni gana-ganaan dohot inganan panutungan ni dupa dipaorot ia do sian angka kota ni Juda. Jadi gabe sonang ma harajaan i di hatiha ia mamarenta,

⁶gabe tarbaen ia mambangun angka benteng di angka kota ni Juda. Piga-piga taon nada adong masa porang dibaen dilehen TUHAN antong hasonangan tusia.

⁷Ninna si Asa ma tu rayat ni Juda, “Denggan do i muda tapatogu angka kota marhite na mambangun tembok humaliangna dohot angka palas-palas maradu pintu horbangan dohot angka palang panggorukna. Madung takuasoi luat on hara ni na taihutkon hagiot ni TUHAN Debatanta. Dipature-ture Ia do hita jana dijagohon Ia do hasonangan ni sude tanonta on.” Jadi dipungka halahi ma na mambangun lalu pasidungkonsa lopus denggan.

⁸Tentara ni Raja Asa adong do 300.000 halak Juda na marsinjatahon parince dohot tombak jana 280.000 halak Benyamin na marsinjatahon parince, sior dohot panah. Angka parajurit na barani do i sudena boti na tarlatih.

⁹Sanoli di sada hatiha ro ma sada halak Sudan na margoar si Zerah mamorangi Juda mardongan sajuta parajurit dohot tolu ratus kareta porang. Maju ma halahi lalu tu Maresa.

¹⁰Jadi ruar ma si Asa mangadopi si Zera jana mangatur barisanna be ma halahi na dua di Rura Zefata na di lambung ni Maresa.

¹¹Jadi martangiang ma si Asa tu TUHAN Debatania, “TUHAN, hum Ho do na tarbaen mangurupi na gale maradopkon na gogo. Urupi ma hami saonnari, ale TUHAN Debatanami! Marpangunsandean tu Ho do hami jana mangasahon goarMu haruar ma hami marporang mangalo pasukan na santak bahat on. TUHAN, Ho do Debatanami. Ulang ma padiar diriMu ditaluhon sada jolma.”

¹²Jadi diroro si Asa dohot tentara ni Juda i ma tentara ni Sudan i. Ditaluhon TUHAN ma tentara ni Sudan i lopus maporus halahi.

¹³Dikojar si Asa dohot tentarania i ma halahi lopus tu Gerar. Bahat sajo do na mate di pihak ni Sudan jabat nada margogo be tentara ni halahi i hara ni na disaroso ni TUHAN halahi dohot tentara ni Juda i. Bahat do barang dirampas halahi.

¹⁴Dung i dironcohon halahi ma angka kota na di luat na humaliang Gerar, harana gabe mabiar do halak na maringanan disi dibaen TUHAN. Dirampasi tentara ni Juda ma sude kota i jana bahat do barang dapot halahi.

¹⁵Laing disaroso halahi muse do parbandaran ni angka parmahan, jana dioban halahi ma dohot biri-biri dohot unto. Dung i mulak ma halahi tu Jerusalem.