Read Batak Angkola 2 JUJUR TAON 15 Bible Online

2 JUJUR TAON 15 - Batak Angkola bible

2 JUJUR TAON 15

¹Digohi Tondi Ni Debata ma Panurirang Asarya anak ni si Oded,

²jadi gabe kehe ma ia mandapotkon Raja Asa, jana didok ia ma, “Ale Raja Asa, dohot sude halak na maringanan di Juda dohot Benyamin! Tangihon ma! Donok do TUHAN tu hamu muda donok hamu tuSia. Muda mangido panogu-noguon hamu tuSia, lehenonNia ma i. Tapi muda nada parduli hamu diSia, Ia pe nada parduli di hamu.

³Lolot sajo do na so mangoloi Israel tu Debata na tutu, nada maruli pangajaran sian angka malim na laho mangajari halahi, jana nada tunduk tu angka uhum.

⁴Hape dompak di bagasan hasusaan halahi, ro ma halahi mandapotkon TUHAN, Debata ni Israel. Mangido panogu-noguon ma halahi, jana Dilehen do antong.

⁵Di hatiha i nada aman halak muda kehe mardalanan, dibaen sai adong do hagaoran godang di ganop luat.

⁶Disosak bangso na sada do bangso na asing, jana luat na sada mamisat luat na asing, dibaen diparo Debata antong hagaoran godang tu halahi.

⁷Tapi angkon sobar do hamu jana barani. Manjadi do usahamunu i.”

⁸Di na nibege ni si Asa pandohan ni si Asarya anak ni si Oded i, gurgur ma semangatnia. Dipaorot ia ma sude gana-ganaan na di tano Juda dohot Benyamin, dohot na di angka kota na nitaluhonnia di partoran Efraim. Jana dipadenggan ia ma langgatan ni TUHAN na di alaman ni Bagas Ni TUHAN i.

⁹Bahat do halak Efraim, Manase dohot Simeon na margabung dohot si Asa, jana maringanan ma halahi di luat na nirajaannia, harana diida halahi, ditolongi TUHAN do ia. Disuru si Asa ma sude halahi rap dohot rayat ni Juda dohot Benyamin

¹⁰marlagut di Jerusalem. Jadi marlagut ma halahi di bulan tolu taon palima bolaskon mamarenta si Asa.

¹¹Di bagasan ari i dihaulkon halahi ma tu TUHAN pitu ratus lombu dohot pitu ribu biri-biri, i ma na dapot dirampas na nioban ni halahi mulak sian parporangan.

¹²Marjanji do halahi tu TUHAN bahaso na giot oloan ni halahi ma TUHAN, Debata ni ompu ni halahi, sian sasude roha dohot tondi ni halahi.

¹³Sanga ise na matobang sanga na poso, halaklahi sanga na dadaboru pe jadi, na so marsomba tu TUHAN pasti mate hona uhum.

¹⁴Marsora na gogo ma halahi marsumpa tu TUHAN paboa na giot tiopon ni halahi ma janji i. Dung i marsurak-surak ma halahi jana mangombus sarune.

¹⁵Marjop ni roha do sandok rayat Juda, angke madung marsumpa halahi sian nasa roha. Sonang ma roha ni halahi mulak tu TUHAN, jana TUHAN pe lomo ma rohana manjagit halahi. Dilehen ia ma tu halahi hasonangan di luat ni halahi.

¹⁶Dung i dipecat Raja Asa ma si Maaka sian jabatanna songon na duma, hara ni na mambaen patung na so patut si Maaka di si Asera, debata ni hagabean i. Ditaporkon ia ma patung i masarge lalu ditutung ia di Rura Kidron.

¹⁷Haru pe na so sude inganan pamelean ni gana-ganaan na di luat i ditaporkon si Asa, tapi anggo ia sai tongtong do setia tu TUHAN sapanjang mangolu ia.

¹⁸Dipayakkon si Asa ma di Bagas Ni Debata sude sere dohot perak maradu angka barang-barang na asing na dapot hona rampas di porang nampuna ni amangnia dohot nampunania sandiri.

¹⁹Lopus tu taon patolupululimahon mamarenta si Asa, nada unjung masa be parporangan di luat i.