Read Batak Angkola 2 JUJUR TAON 17 Bible Online

2 JUJUR TAON 17 - Batak Angkola bible

2 JUJUR TAON 17

¹Dung i gabe raja ma si Josafat di Juda manggontihon si Asa amangnia i, jana ditambai ia ma gogonia laho mangalo Israel.

²Dibaen ia ma angka tentara di sude kota na marbenteng di Juda, dohot di luat na di balian ni kota di Juda, maradu di angka kota na nibuat ni amangnia di Luat Efraim.

³Dipasupasu TUHAN do si Josafat dibaen diihutkon ia do indege ni amangnia, nada marsomba ia tu Baal,

⁴tapi maribadat tu Debata do ia. Burju do ia mangoloi angka parenta ni Debata, jana ngolunia pe nada songon angka raja ni Israel.

⁵Dilehen TUHAN do tu si Josafat parjuguk na togu songon raja ni Juda. Sude do rayat i mangalehen angka silua tusia jana gabe mamora do ia boti dipasangap situtu.

⁶Sian roha na marsitutu dihaburjuhon ia mangoloi parenta ni TUHAN jana dironcohon ia sude inganan parsombaan ni gana-ganaan maradu angka patung ni Debata Asera na di Juda.

⁷Di taon patoluhon ia mamarenta, disuru ia ma angka parpangkat na timbo laho mangajarkon angka uhum ni TUHAN di angka kota ni Juda. I ma angka: Benhail, Obaja, Zakaria, Netaneel dohot si Mika.

⁸Adong do sambilan halak Levi dohot dua malim mandongani halahi. Angka halak Levi i, i ma si Semaya, Netania, Zebaya, Asael, Semiramot, Jonatan, Adnia, Tobia dohot Tobadonia. Malim na dua i, i ma si Elisama dohot si Joram.

⁹Kehe ma halahi, dioban-oban halahi ma Buku Tona Ni TUHAN sanga na tu dia di sude kota ni Juda jana diajari halahi ma rayat i disi.

¹⁰Dibaen TUHAN ma sude harajaan na adong humaliang Juda mabiar marporang mangalo Raja Josafat.

¹¹Bahat do dijagit ia perak dohot angka silua na asing sian halak Pilistin, jana sian halak Arab dijagit ia do 7.700 biri-biri dohot hambeng 7.700.

¹²Songon i ma mur lolot mur markuaso si Josafat. Dibangun ia do di sandok Juda angka benteng dohot angka kota panyimpanan ni bohal.

¹³Dipatimbun ia do bohal bahat di angka kota i. Dibaen ia ma di Jerusalem angka perwira na garang-garang,

¹⁴ganop be mangihutkon hasadaan marguru tu horongna. Si Adna ma panglima ni pasukan na sian angka horong ni Juda. Dipimpin ia do 300.000 halak parajurit.

¹⁵Na paduahon halakna, i ma si Johanan; 280.000 halak parajurit na nikapalaannia.

¹⁶Na patoluhon halakna, i ma si Amasia anak ni si Zikri; 200.000 halak parajurit na nikapalaannia. (Sada halak na nionjar ni rohana sandiri do si Amasia mangoloi tu TUHAN.)

¹⁷Panglima ni hasadaan ni tentara sian angka marga ni Benyamin, i ma si Eliada, sada halak parporang na barani dipimpin ia do 200.000 parajurit singkop dohot sior dohot parince.

¹⁸Halak na paduahon sian hasadaan on, i ma si Josabad; 180.000 parajurit dipimpin ia na singkop marsinjata.

¹⁹Halahi ma na martugas di Jerusalem. Tamba ni i, dibaen raja i dope angka pasukan na asing di angka benteng na adong di Luat Juda.