Read Batak Angkola 2 JUJUR TAON 18 Bible Online

2 JUJUR TAON 18 - Batak Angkola bible

2 JUJUR TAON 18

¹Di na dung mamora jana tarbonggal si Josafat raja ni Juda i, dipakawin ia ma sada sian keluargania dohot sada halak keluarga ni si Ahab raja ni Israel.

²Dung adong sanga na piga taon, kehe ma si Josafat manopot si Ahab di kota Samaria. Laho pasangapkon si Josafat dohot rombonganna i, dibaen si Ahab ma pesta jana disuru ia ma sambolon bahat biri-biri dohot lombu. Hatiha na denggan ma i di si Ahab mangelek si Josafat laho mamorangi kota Ramot na di Gilead.

³Disapai ia ma, “Ra dehe ho kehe rap dohot au mamorangi Ramot?” Dialusi si Josafat ma, “Denggan, rap ma hita kehe. Margabung ma tentarangku dohot tentarami.”

⁴Tapi dumenggan do jolo muda tasapai tu TUHAN.

⁵Jadi gabe dipalagut si Ahab ma opat ratus halak panurirang lalu disapai ia ma tu halahi, “Tola dehe au kehe mamorangi Ramot sanga nada?” ning ia. “Tola!” ning halahi mangalusi. “Lehenon ni Debata do hamonangan di raja i.”

⁶Tapi disapai si Josafat ma mangulahi, “Adong dope ulaning panurirang na asing na bolas gabe parsambunganta laho manyapai hagiot ni TUHAN?”

⁷Dialusi si Ahab ma, “Adong dope sada nari, si Mika anak ni si Jimla. Tapi goyak do rohangku mida i, harana na so unjung do ia mambaen sada alatan pe na denggan di au; sai na jat do marpupu.” “Ah, ulang antong dokkon songon i!” ning si Josafat mangalusi.

⁸Jadi gabe dipiohon si Ahab ma sada halak pagawe ni bagas godang i lalu disuru ia anso diompoti kehe mangalap si Mika.

⁹Marpakean hasangapan do si Ahab dohot si Josafat di hatiha i, juguk di ginjang ni karosi harajaan di inganan pardegean ni gandum di jolo ni pintu horbangan ni Samaria. Marroan ma sude panurirang i laho palaluhon ramalanna be.

¹⁰Sada sian angka panurirang i, i ma si Zedekia anak ni si Kenaana, dibaen ia ma angka tanduk-tanduk sian bosi lalu didok ia ma tu si Ahab, “On ma na nidok ni TUHAN, ‘Rap dohot angka tanduk on ma raja i mamorangi Siria jana mangaroncohon halahi.’ ”

¹¹Satuju do sude panurirang na asing i jana didok halahi ma, “Porangi ma Ramot, maruntung do raja i. Lehenon ni TUHAN ma hamonangan di raja i.”

¹²Jadi laing didok suruan na mangalap si Mika i ma tusia, “Sude do panurirang na asing i paboahon hamonangan di raja i. Ho pe antong denggan ma da alatanmu laing songon halahi.”

¹³Tapi dialusi si Mika ma, “Mangasahon TUHAN na mangolu i, anggo au hum na nidok ni TUHAN do na giot dokkononku!”

¹⁴Dung lalu si Mika di jolo ni Raja Ahab, marsapa ma raja i, “Tola dehe kehe au dohot Raja Josafat mamorangi Ramot, sanga nada?” “Porangi ma!” ning si Mika mangalusi. “Tontu mangasi do karejo ni raja i. Lehenon ni TUHAN do i hamonangan di raja i.”

¹⁵Dialusi si Ahab ma, “Muda mangasahon goar ni TUHAN ho antong mandok hata tu au, na tutu i ma da dokkon. Piga noli lakna jabat paingotonku ho taringot tusi?”

¹⁶Dialusi si Mika ma, “Huida do marserak tentara ni Israel di dolok-dolok. Songon biri-biri na so marparmahan do halahi, jana didok TUHAN do salaho tu halahi, ‘Na so adong do pamimpin ni angka jolma on; padiar ma marmulahan halahi marhorasan.’ ”

¹⁷Jadi didok si Ahab ma tu si Josafat, “Na he tutu do na hudokkon i? Na so unjung do ia paboahon na denggan di au! Sai marpupu do i hum na jat sajo!”

¹⁸Didok si Mika ma mangulahi, “Saonnari tangihon ma jolo na nidok ni TUHAN! Huida do TUHAN juguk di ginjang ni habangsaNa di banua ginjang, jana marjongjongan angka surusuruanNa di lambungNia.

¹⁹Disapai TUHAN ma, ‘Ise noma na giot mangelek si Ahab anso ra ia kehe marporang jana anso mate ia di Ramot na di Gilead?’ Marasing-asing do alus ni angka surusuruan i.

²⁰Ujungna ro ma sada tondi. Dipadonok ia ma tu TUHAN jana didok ia ma, ‘Au ma kehe mangelek ia.’ ‘Bia?’ ninna TUHAN manyapai.

²¹Dialusi tondi i ma, ‘Kehe ma au jana hubaen ma margabus sude panurirang ni si Ahab i.’ Didok TUHAN ma, ‘Antong denggan, patulus ma i, jadi do tarelek ho ia.’ ”

²²Dung i didok si Mika ma muse, “Aha dope, madung tarjadi do i! Madung margabus dibaen TUHAN angka panurirang ni raja i tu raja i angke madung ditontuhon TUHAN do laho manimpalkon parmaraan i tu raja i!”

²³Jadi maju ma Panurirang Zedekia lalu ditampeleng ia ma bohi ni si Mika jana didok ia ma, “Dia ma mungkin Tondi Ni TUHAN manadingkon au jana mangkobari Ia tu ho?”

²⁴Dialusi si Mika ma, “Annon ma idahon buktina di na monjap ho!”

²⁵“Tangkup i!” ning Raja Ahab mamarenta, “Jana oban ma tu si Amon, walikota i dohot tu si Joas anak ni raja i.

²⁶Suru anso dipamasuk halahi si Mika tu bagasan hurungan jana saotik sajo pe dilehen ia mangan dohot minum lopus mulak au di bagasan hahorasan.”

²⁷Didok si Mika ma, “Muda horas do antong raja i mulak, tanda na so markite-kite au TUHAN manghobari. Sude na ro dison ma saksina.”

²⁸Dung i kehe ma si Ahab raja ni Israel dohot si Josafat raja ni Juda i mamorangi kota Ramot na di Gilead.

²⁹Didok si Ahab ma tu si Josafat, “Manyamar ma anggo au jana masuk ma au tu parporangan i, tapi anggo ho laing mamake pakean hagodangan ma antong.” Jadi songon i ma manyamar raja ni Israel i kehe marporang.

³⁰Na dung diparentahon rajana do di hatiha i tu angka panglima ni pasukan kareta porang ni Siria i anso ulang manyerang tu sada halak pe asing ni raja ni Israel i sajo.

³¹Jadi di na niida ni halahi Raja Josafat, diambang halahi do ia raja ni Israel. Jadi diserang halahi ma ia. Tapi pio-pio ma si Josafat tu TUHAN, jadi gabe ditolong TUHAN ia antong, jana dipaegol ma serangan i adop na asing.

³²Diboto angka panglima ni pasukan kareta porang ni Siria i ma bahaso na so raja ni Israel do i, jadi gabe mantak ma halahi manyerang.

³³Tapi sian na so niambang-ambang adong ma sada halak parajurit ni Siria i na paluahon anak ni panahnia na manombus baju porang ni si Ahab topet di parsambunganna i. “Ma hona au!” ning si Ahab manggora tu sais ni karetania i, “Putar jana oban au ruar sian parporangan on!”

³⁴Jadi di na laing jebu parporangan i, laing jongjong ma Raja Ahab marsitungkol di bagasan karetania adop tentara ni Siria i. Di na lusut mataniari marujung ma ngolunia.