Read Batak Angkola 2 JUJUR TAON 19 Bible Online

2 JUJUR TAON 19 - Batak Angkola bible

2 JUJUR TAON 19

¹Dung mulak si Josafat raja ni Israel i horas tu bagas godangnia di Jerusalem,

²ro ma sada halak panurirang na margoar si Jehu anak ni si Hanani mangadop tu raja i. Didok panurirang i ma tusia, “Patut ma he raja i mamihak tu halak na jahat jana mamihak tu halak na manghagigihon TUHAN? Muruk do TUHAN tu raja i patunda ni parbuatan ni raja i.

³Haru songon i pe, laing adong do nian na denggan di raja i. Dipaduru raja i do sude patung ni Debata Asera na nisomba ni rayat i jana diusahahon raja i do laho mangihutkon hagiot ni Debata.”

⁴Maringanan di Jerusalem do Raja Josafat. Tapi jotjot do ditopoti ia rayat i di sude luat laho manyosoi halahi mulak tu TUHAN, Debata ni ompu ni halahi.

⁵Diangkat ia do angka panguhum di ganop kota na marbenteng,

⁶jana dilehen ia ma parenta songon on tu halahi, “Malo-malo hamu marroha, dibaen nada hara ni goar ni jolma hamu manguhumi, tapi mangasahon goar ni TUHAN do. Dijagoi Ia do hamu di na mamutuskon parkaro.

⁷Angkon mabiar do hamu tu TUHAN jana jamot-jamot hamu mambaen tindakan, dibaen goyak do roha ni TUHAN mida halak na mambaen hageduhan, na martindak borat sabola sanga na manjagit sogok.”

⁸Di Jerusalem pe laing diangkat si Josafat do angka panguhum sian halak Levi, angka malim dohot sian bagian hatobangon ni rayat i. Angkon putuskonon ni halahi do angka parkaro na mardomu tu angka na mangalanggar Tona Ni TUHAN dohot angka parkaro-parkaro na asing.

⁹Diparentahon si Josafat ma tu angka panguhum i songon on, “Burju ma dalankon hamu tugasmunu tu TUHAN. Oloi hamu ma parentaNia di sude sanga aha na nikarejohonmunu.

¹⁰Muda adong sian angka donganmunu na pasahatkon tu hamu sian kota na asing sada parkaro na mamunu jolma, na mangalanggar uhum sanga na mangalanggar parenta ni TUHAN, ulang so lehenonmunu panogu-noguon tu halahi. Jadi muda songon i do, nada marsala be halahi tu TUHAN, jana nada muruk be TUHAN tu hamu bope tu halahi. Patulus hamu ma parenta on, jadi nada marsala be hamu disi.

¹¹Tu Malim Godang Amarya hulehen do kuaso partimbo salaho tu sude parkaro na mardomu tu uhum ni TUHAN. Tu si Zebaya anak ni si Ismael, i ma gubernur ni Juda, hulehen kuaso partimbo salaho tu sandok parkaro na asing. Tanggung jawab ni angka halak Levi ma manjago anso didalankon angka haputusan ni pangadilan. Ihutkon hamu ma panogu-noguon na hudok on jana tegas ma tindakanmunu. Sai didongani TUHAN ma halak na tigor pambaenanna!”