Read Batak Angkola 2 JUJUR TAON 2 Bible Online

2 JUJUR TAON 2 - Batak Angkola bible

2 JUJUR TAON 2

¹Madung diputuskon Raja Salomo laho mambangun Bagas Ni Debata dohot sada bagas godang disia sandiri.

²Diarahon si Salomo ma pitu pulu ribu halak laho mangangkut bahan ni bangunan, salapan pulu ribu halak laho manuhil batu di dolok dohot mandur tolu ribu onom ratus halak laho manjagoi karejo i.

³Ditongos si Salomo ma barita tu si Hiram raja ni Tirus songon on, “Mambaen hubungan dagang ma nian sugari tuan i dohot au laing songon tu si Daud amangki. Digadis tuan i do tu damang hayu sampinur Libanon laho mambangun bagas godangnia i.

⁴Saonnari au giot mambangun bagas paribadatan na khusus di TUHAN Debatangku. Giot di bagas i ma au dohot rayatku maribadat dohot manutung dupa dohot angka na huskus. Giot tongtong paradeonnami roti na rade diSia. Giot haulkononnami haul situtungon ganop sogot dohot ganop potang, ganop Ari Sabat, Ari Pesta Bulan Na Imbaru dohot di ari na mardohonan na asing i na ditotopkon ni TUHAN Debatanami laho pasangapkon Ia. Na dung diparentahon Ia do i anso patuluson ni halak Israel sapanjangna.

⁵Angkon luar biasa do Bagas Ni TUHAN na giot bangunonki, dibaen gumodang do antong Debatanami i sian sasude sombaon sanga dia pe.

⁶Tapi anggo satutuna, sada halak pe nada adong na margogo pajongjongkon bagas di Debata, angke haru sude pe parlangitan na bolak i nada cukup i gabe ingananNia. Jadi anggo Bagas Ni TUHAN na giot sipajongjongonki, hum tarsongon inganan panutungan ni dupa di Tuhan sajo do i!

⁷Jadi hara ni i, ditongos tuan i ma sugari tu hami sada halak na malo na tarbaen paulihon sere, perak, loyang dohot bosi, jana na malo muse pauli abit na rata langit, na bunga torung dohot na rara jana malo mambaen ukuranna. Rap markarejo ma ia dohot angka tukang na di Juda dohot Jerusalem, i ma angka na dung dipili ni damang si Daud.

⁸Huboto do, anggo angka partaba hayu na di luat ni tuan i, na malo-malo do martaba hayu, jadi hara ni i, laing ditongoskon tuan i ma da tu au sian Libanon ragam-ragam ni hayu sampinur Libanon dohot hayu cendana. Huarahon pe angka halaknami laho mangurupi angka halak ni tuan i

⁹paradehon hayu sanga na sadia bahat. Harana anggo Bagas Ni TUHAN na giot bangunonnami i angkon godang do jana sumurung.

¹⁰Anggo balanjo ni angka halak ni tuan i hami tongoskon pe tu tuan i dua ribu ton gandum, dua ribu ton burir-burir, opat ratus ribu liter anggur dohot opat ratus ribu liter miak zetun.”

¹¹Songon balosan ni surat ni Raja Salomo i, ditongos Raja Hiram ma surat, songon on hatana, “Hara ni holong ni roha ni TUHAN di bangso ni tuan i, diangkat Ia do tuan i gabe raja.

¹²Nipuji ma da TUHAN Debata ni Israel. Na manompa langit dohot tano on! Dilehen Ia do antong sada anak na sun marbisuk jana na marparbinotoan di si Daud, i ma na giot pajongjongkon Bagas di TUHAN dohot bagas godang diSia sandiri.

¹³Rap dohot on hutongoskon do tu tuan i sada halak jana na malo boti na bisuk, na margoar si Hiram.

¹⁴Sian Marga Dan do inangnia, amangnia halak Tirus. Malo do ia paulihon barang-barang sian sere, perak, loyang, bosi, batu dohot hayu. Malo do ia paulihon abit na rata langit na bunga torung dohot na rara, songon i muse abit linen. Malo do ia mangkarejohon sude ragam ni karejo na manggorga, nada marimbar sanga na bia potonganna na dipangido. Denggan ma i disuruhon ia rap markarejo dohot angka tukang ni tuan i, dohot angka halak na dung markarejo tu amang ni tuan i.

¹⁵Hami painte ma tongosan ni tuan i, i ma gandum, burir-burir, anggur dohot miak zetun na nijanjihon ni tuan i.

¹⁶Tabaannami ma hayu sampinur sian partoran Libanon sanga na sadia bahat na porlu di tuan i, jana tambatannami ma i gabe rakit, jana niayup sian laut lopus tu Jope. Sian i bolas ma angkuton ni tuan i tu Jerusalem.”

¹⁷Dibaen Raja Salomo ma sensus tu sude halak sileban na maringanan di Israel, songon na nibaen ni Raja Daud amangnia i. Hape adong do 153.600 halak bahatna halak sileban i.

¹⁸Ditugaskon ma sian halahi pitu pulu ribu halak laho manarui angka bahan bangunan, 80.000 halak ma manuhil batu di dolok, jana 3.600 halak ma na manjagoi karejo i.