Read Batak Angkola 2 JUJUR TAON 21 Bible Online

2 JUJUR TAON 21 - Batak Angkola bible

2 JUJUR TAON 21

¹Marujung ma ngolu ni si Josafat jana dikuburkon ma di kuburan ni raja-raja na di Kota Ni si Daud. Gabe raja ma anaknia si Joram manggontihon ia.

²Adong ma onom halak anggi ni si Joram anak ni si Josafat raja ni Juda i; si Asarya, si Jehiel, si Zakaria, si Asariahi, si Mikail dohot si Sefaca.

³Maruli do halahi bahat sere, perak, dohot angka barang sigodang arga sian amang ni halahi, jana dilehen muse do di halahi sada be kota na marbenteng di Juda. Tapi dibaen si Joram do anak siangkaan, ia ma na ditontuhon si Josafat na gabe raja.

⁴Dung togu dihilala si Joram parjuguknia songon raja, disuru ia ma mamunu sude angginia i dohot piga-piga halak parpangkat.

⁵Marumur tolu pulu dua taon ma si Joram di na gabe raja ia jana salapan taon lolotna ia mamarenta di Jerusalem.

⁶Songon parngoluon ni Raja Ahab dohot angka raja ni Israel i do diihutkon ia, dibaen boru ni si Ahab do sada dibuat ia ripenia. Mardosa do ia tu TUHAN,

⁷tapi nada ra TUHAN mamusa raja na sian pomparan ni si Daud hara ni na dung marjanji Ia mandok sai na tongtong do mamarenta anggo pomparan ni si Daud.

⁸Di hatiha mamarenta si Joram, disi ma mangalo Edom tu Juda jana dibaen halahi ma harajaanna sandiri.

⁹Jadi hara ni i gabe haruar ma si Joram dohot angka panglima ni tentarania dohot angka kareta porang laho mangalo Edom. Dihobuk pasukan ni Edom ma ia, tapi bornginna i luncat ma halahi sian hobuhan ni musu jana maporus ma halahi palua dirina.

¹⁰Mamungka sian i nada tunduk be Edom tu Juda. Laing di hatiha i mangalo muse ma Libna. Tarjadi pe sudena i hara ni na nitadingkon ni si Joram do TUHAN, Debata na nisomba ni ompuna.

¹¹Mur dipajongjong ia muse dope tehe angka inganan parsombaan ni gana-ganaan na di luat partoran Juda, jana hara ni ia gabe mardosa ma rayat ni Juda dohot Jerusalem tu TUHAN.

¹²Jadi ditongos Panurirang Elia ma surat tu si Joram. Songon on ma hata ni surat i, “TUHAN, Debata na nisomba ni si Daud manguhum raja i harana nada diihutkon raja i antong tiruan ni ama dohot ompung ni raja i.

¹³Tapi sabalikna do, songon angka raja ni Israel do ngolu ni raja i, jana mambaen nada setia rayat ni Juda dohot Jerusalem tu Debata. Songon pambaen ni Raja Ahab dohot angka na manggonti ia do pangalaho ni raja i. Dibunu raja i do antong salangkan anggi ni raja i, hape nian umburju dope halahi sian raja i.

¹⁴Ro ma uhuman na dokdok sian TUHAN mandondoni rayat, angka dakdanak maradu angka dongan saripe ni raja i jana roncohononna ma sude sinadongan ni raja i.

¹⁵Raja i sandiri pe marnyae baro bunion noma, mur martamba ari mur poran!”

¹⁶Di hatiha i adong do halak Pilistin dohot halak Arab maringanan di lambung ni parhutaan ni halak Sudan na di topi ni laut. Digorakkon TUHAN ma roha ni angka jolma i laho mamorangi si Joram.

¹⁷Diporangi halahi ma Juda, dihobuk halahi ma bagas godang ni raja i, lalu dioban halahi ma maporus sude dakdanak dohot dadaboru ni si Joram gabe taban, asing ni si Ahasia anakna sianggian i.

¹⁸Dung tarjadi sudena i, hona uhum ma si Joram dibaen TUHAN dohot nyae baro buni na so ra malum.

¹⁹Mur poran do nyae i dua taon lolotna lopus di ujungna marhancit situtu ma ia di na mate. Nada dipagara rayatnia i api purunan tanda ni na marsiluluton songon na nibaen ni halahi di angka ompu na umpompar halahi.

²⁰Umpe adong sada halak na manyosal di parmatena i. Dikuburkon di Kota Ni si Daud do ia, tapi nada di kuburan ni angka raja-raja i. Di na gabe raja, marumur tolu pulu dua taon ma si Joram jana salapan taon honokna ia mamarenta di Jerusalem.