Read Batak Angkola 2 JUJUR TAON 22 Bible Online

2 JUJUR TAON 22 - Batak Angkola bible

2 JUJUR TAON 22

¹Sanoli di na ro sagarombolan halak Arab mangaroro, asing sian si Ahasia anak ni si Joram sianggian i, mate hona bunu ma sude anaknia i. Jadi hara ni i diangkat halak Jerusalem ma si Ahasia gabe raja manggontihon amangna i.

²Marumur dua pulu dua taon ma si Ahasia di na gabe raja ia jana salapan taon honokna ia mamarenta di Jerusalem. Laing songon keluarga ni Raja Ahab do ngolu ni si Ahasia harana diajari si Atalia inangnia i do ia laho mambaen na jahat. Boru ni Raja Ahab do si Atalia, pahompu ni si Omri raja ni Israel i.

⁴Mardosa do si Ahasia tu TUHAN laing songon keluarga ni si Ahab, harana halahi do antong na gabe panuturinia dung mate amangnia i. Angka panuturinia i do na mambaen marmara ia.

⁵Hara ni sipaingot ni halahi, margabung ma ia dohot si Joram raja ni Israel laho marporang mangalo si Hasael raja ni Siria. Marporang ma halahi di Ramot, na di Luat Gilead. Mabugang ma si Joram di parporangan i.

⁶Lalu mulak ma ia tu kota Jisreel anso diubati, jana kehe ma si Ahasia mangaligi ia tusi.

⁷Madung ditontuhon Debata bahaso na dapot ma ajal ni si Ahasia di na kehe ia mangaligi si Joram. Na topet do di hatiha i martangkang si Joram dohot sada bayo na margoar si Jehu anak ni si Nimsi. Na dung dipili ni TUHAN do si Jehu laho mamatehon pomparan ni Raja Ahab. Gabe dohot-dohotan ma si Ahasia na topet ro tusi di partangkangan i.

⁸Dompak na giot patuluskon tona si Jehu tu pinompar ni si Ahab, pajumpang ma ia dohot sarombongan angka parpangkat ni Juda, dohot angka babere ni Raja Ahasia na mandongani ia. Jadi dibunu si Jehu ma halahi sude.

⁹Anggo si Ahasia sandiri sanga do ia marlojong tu Samaria. Jadi dijalahi ma ia jana dapot ma di inganan partabuniannia. Dioban ma ia tu si Jehu, lalu dibunu. Dikuburkon anak buania i pe ia, hara ni na pasangapkon Raja Josafat ompungnia i do na mangoloi tu TUHAN sian sasude rohana. Sian keluarga ni si Ahasia nada adong na sanggup manggontihon ia gabe raja.

¹⁰Di na tarboto tu si Atalia bahaso na dung mate Raja Ahasia anaknia i, diparentahon ia ma anso dibunu sude pomparan ni raja na di Juda.

¹¹Adong do sada iboto ni si Ahasia na margoar si Joseba na marbagas tu sada malim na margoar si Joyada. Sip-sip ma dibuat si Joseba sada anak ni si Ahasia na margoar si Joas sian tonga-tonga ni angka dakdanak ni raja i na giot bunuon ni si Atalia. Ditabunihon ma dakdanak i dohot parorotna di sada kamar gabe nada dohot be dibunu si Atalia.

¹²Onom taon lolotna si Joas ditabunihon di Bagas Ni Debata salolot mamarenta si Atalia gabe ratu.