Read Batak Angkola 2 JUJUR TAON 23 Bible Online

2 JUJUR TAON 23 - Batak Angkola bible

2 JUJUR TAON 23

¹Di taon papituhon diputuskon Malim Joyada ma laho martindak. Marsaroha ma ia dohot lima halak perwira, i ma si Asarya anak ni si Jeroham, si Ismail anak ni si Johanan, si Asarya anak ni si Obed, si Maaseya anak ni si Adaya, dohot si Elisafat anak ni si Zikri.

²Kehe ma halahi mandapotkon sude kota na di Juda, jana dipalagut halahi ma angka halak Levi dohot sude kapala ni horong, lalu dioban halahi ma tu Jerusalem.

³Marlagut ma halahi di Bagas Ni Debata, jana dibaen halahi ma parjanjian dohot si Joas, anak ni raja i. Didok si Joyada ma tu halahi, “On ma ibana anak ni mandiang i Raja Ahasia! Angkon juguhannia ma saonnari habangsa i, dibaen madung dijanjihon TUHAN bahaso na totop do mamarenta pomparan ni Raja Daud.

⁴On ma na angkon sibaenonta: Muda dung abis martugas di Ari Sabat angka malim dohot halak Levi, nada tola halahi mulak. Sapartolu sian halahi angkon dohot do manjago di angka pintu horbangan ni Bagas Ni Debata,

⁵sapartolu nari di bagas godang ni raja i jana na deba nari i di Pintu Horbangan Partoru. Angkon marlagut do sude rayat i di alaman ni Bagas Ni Debata.

⁶Sada halak pe nada adong na tola masuk anggo tu Bagas Ni Debata asing sian angka malim dohot halak Levi na markarejo. Anggo halahi tola do masuk dibaen na dihapunjungkon do halahi tu TUHAN. Angka halak na asing i angkon tunduk do tu paraturan ni TUHAN jana tinggal di ruar.

⁷Angkon jongjong do anggo halak Levi marpodang na sintak humaliang raja i, jana kawalon ni halahi ma ia sanga na tu dia ia kehe. Sanga ise na giot masuk tu bagasan Bagas Ni Debata angkon dibunu.”

⁸Didalankon angka halak Levi dohot rayat ni Juda i do parenta ni si Joyada i. Angka halak na dung abis markarejo nada dipatola mulak. Jadi tararahon angka perwira i ma denggan angka halak na dung abis markarejo bope halak na baru ro laho markarejo.

⁹Dibagihon si Joyada ma tu angka perwira i tombak dohot parince nampuna ni Raja Daud na disimpan di Bagas Ni Debata.

¹⁰Laing dibaen si Joyada dope halak na marpodang na sintak humaliang jolo ni Bagas Ni Debata i laho mangalindungi raja i.

¹¹Dung i dioban si Joyada ma si Joas haruar, dipayakkon ia ma tuku di uluna i jana dipasahat ma tusia Tona Ni TUHAN. Songon i ma pangalahona si Joas diangkat gabe raja. Dung i diduruskon si Joyada dohot angka anaknia i ma miak upacara panabalan tu si Joas, lalu marsurak ma sude jolma i, “Horas! Horas!, Horas ma di Raja i!”

¹²Dibege si Atalia ma rayat i marsurak mangalo-alo raja i. Diompoti ia ma kehe tu Bagas Ni Debata tu inganan ni halak na marlagut i.

¹³Diida ia ma raja na imbaru i jongjong di pintu masuk tu Bagas Ni Debata di inganan panabalannia i. Dihaliangi angka perwira do ia dohot angka siombus sarune i. Marsurak ma sude rayat i marjop ni roha lalu mangkuling ma sarune jana angka parmusik ni Bagas Ni Debata pe dohot ma pariburkon parayaan i marhite angka alat musik ni halahi. Disibakkon si Atalia ma pakeannia tanda ni murukna jana marsurak ma ia, “Panghianat! Panghianat!”

¹⁴Nada dipatola si Joyada bunuon si Atalia di humaliang ni Bagas Ni Debata i, jadi gabe didok ia ma tu angka perwira i, “Oban hamu ma ia tu ruar mamolus sian barisan ni pangawal i, jana bunu hamu sanga ise na mancubo-cubo laho paluahon ia.”

¹⁵Ditangkup halahi ma ia, lalu dioban tu bagas godang. Dibunu ma ia di pintu horbangan kudo.

¹⁶Dialap tahi Malim Joyada ma Raja Joas dohot rayat i mambaen parjanjian paboa na gabe bangso ni TUHAN noma halahi.

¹⁷Disaroso halahi sude ma bagas parsombaan ni Baal lalu dirumpakkon halahi; langgatan dohot angka patungna i dilantuk halahi dohot si Matan, malim ni Baal i pe dibunu di jolo ni angka langgatan i.

¹⁸Jadi ditugaskon si Joyada ma angka malim dohot halak Levi laho mangurus parkarejoan di Bagas Ni Debata songon na dung ditontuhon ni Raja Daud. Angkon haulkonon ni halahi ma haul situtungon tu TUHAN hombar tu angka uhum ni si Musa jana martanggung jawab ma halahi salaho tu angka ende dohot angka pesta ugamo.

¹⁹Di angka pintu horbangan ni Bagas Ni Debata, dibaen si Joyada ma pangawal na manjago anso ulang masuk halak na so ias.

²⁰Diihutkon angka perwira, angka hatobangon ni masarakat, angka na marjabatan di pamarenta dohot sude rayat i ma si Joyada mangudurkon Raja Joas sian Bagas Ni Debata tu bagas godang. Masuk sian horbangan godang ma halahi, lalu juguk ma raja i di habangsa.

²¹Marjop ni roha ma sude rayat i, kota i pe aman do jana si Atalia madung dibunu.