Read Batak Angkola 2 JUJUR TAON 24 Bible Online

2 JUJUR TAON 24 - Batak Angkola bible

2 JUJUR TAON 24

¹Marumur pitu taon ma si Joas di na gabe raja ia di Juda, jana opat pulu taon lolotna ia mamarenta di Jerusalem. Si Zibia do goar ni inangnia na sian kota Berseba.

²Salolot di ngolu ni Malim Joyada dipatupa si Joas do angka karejo na pasonangkon roha ni TUHAN.

³Dipili si Joyada ma dua boru na gabe ripe ni si Joas jana adong do anak dohot boru sian halahi di si Joas.

⁴Dung adong sanga na sadia honok ia mamarenta, diputuskon ia ma laho padenggankon Bagas Ni Debata.

⁵Diparentahon ia ma angka malim dohot halak Levi anso kehe mandapotkon angka halak na mangingani kota na di Juda dohot palagutkon hepeng sian rayat laho padenggankon Bagas Ni Debata ganop taon. Disuru ia do halahi manigor padalankon karejo i, hape marlemba-lemba do angka halak Levi.

⁶Jadi hara ni i, dipio ia ma Malim Joyada, pamimpin ni halahi i lalu didok ia ma, “Nada he disuru si Musa naposo ni TUHAN i do rayat manggarar pajak laho mambalanjoi Bandar Ni TUHAN? Saonnari, biasi nada disosak ompu i angka halak Levi i laho palagutkon pajak sian rayat na di Juda dohot Jerusalem?” (

⁷Na disego-sego ni angka dongan ni si Atalia dadaboru na jahat i do Bagas Ni Debata i, jana bahat do sian barang-barang na mardohonan tu Debata dipake halahi marsomba Baal.)

⁸Jadi diparentahon raja i ma anso dibaen halak Levi sada poti ni hepeng jana dipayakkon ma i di jolo ni pintu horbangan ni Bagas Ni Debata.

⁹Dipabotohon ma di sude Jerusalem dohot Juda, mandok angkon sude do halak maroban pajak tu TUHAN, songon na niaturkon ni si Musa.

¹⁰Jop do roha ni rayat i dibaen boa-boa i songon i dohot angka pamimpin ni halahi. Marsiadu marsitaruhon pajakna do halahi tu bagasan poti-poti i.

¹¹Ganop dioban angka halak Levi poti-poti i tu pagawe ni raja na markarejo salaho tusi, gok do poti i dohot hepeng. Diparuar ma hepeng i disaksihon sekretaris negara dohot wakil ni Malim Godang. Dung diparunggir, dipaulak ma poti-poti i tu ingananna humani. Sai songon i ma dibaen halahi ganop ari jana bahat sajo do hepeng na marlagut i.

¹²Dung i dipahasat raja dohot si Joyada ma tu angka mandur, jana disuru halahi ma markarejo angka tukang batu, tukang hayu dohot tukang na mangkarejohon logam.

¹³Marsitutu do halahi sude na markarejo i laho padenggankon Bagas Ni Debata i anso gabe togu jana jeges laing songon di mulana.

¹⁴Dung sidung karejo i, dipasahat ma sere dohot perak na lobi i tu raja i dohot tu si Joyada. Jadi dibaen ma sere dohot perak i gabe angka mangkuk dohot angka parkokas na asing di Bagas Ni Debata. Salolot mangolu Malim Joyada taratur do haul dihaulkon di Bagas Ni Debata.

¹⁵Ginjang do umur ni si Joyada jana di na marujung ngolunia marumur ma ia saratus tolu pulu taon.

¹⁶Dikuburkon di kuburan ni raja-raja i do ia di Kota Ni si Daud laho marningot angka jasania tu Debata, tu Bagas Ni Debata dohot tu bangso Israel.

¹⁷Jadi dung jumolo si Joyada, dijajang angka pamimpin ni Juda ma si Joas, gabe nada dirohahon ia be pangajaran ni si Joyada.

¹⁸Gabe nada maribadat be rayat i di Bagas Ni TUHAN, Debata ni ompu ni halahi, tapi marsomba gana-ganaan noma dohot angka patung ni Debata Asera. Patunda ni dosa i muruk ma TUHAN tu Jerusalem dohot Juda.

¹⁹Disuru TUHAN ma angka panurirang laho manggorahon halahi anso mulak mangulahi tu TUHAN, hapengani nada ra rayat i manangihon.

²⁰Jadi dirajai Tondi Ni Debata ma si Zakaria anak ni Malim Joyada i lalu pio-pio ma ia, “Pandok ni Debata, ‘Biasi nada dioloi hamu angka parentangKu jana diago hamu dirimunu sandiri? Nada parduli hamu di Au, jadi Au pe nada parduli be di hamu!’ ”

²¹Tapi mambaen kompolotan ma rayat i mangalo si Zakaria, jana dohot do Raja Joas di bagasan kompolotan i. Nada diingot ia be jasa-jasa dohot haburjuon ni si Joyada amang ni si Zakaria i. Diparentahon raja i ma anso didangguri si Zakaria dohot batu lopus mate di alaman ni Bagas Ni Debata. Di na laho tos hosania, pio-pio ma si Zakaria, “Sai diida TUHAN ma pambaenanmon jana dibaloskon Ia!”

²³Laing di bagasan taon i di pargontian ni musim, ro ma tentara ni Siria mamorangi Juda dohot Jerusalem. Dibunu halahi ma sude pamimpin jana dioban halahi ma bahat barang rampasan tu Damaskus.

²⁴Hapengani saotik sajo do tentara ni Siria, tapi dipadiar TUHAN ditaluhon halahi tentara ni Juda i na dao umbahat bilanganna, hara ni na so dirohahon halak Juda be TUHAN, Debata ni ompu ni halahi. Songon i ma dibaen TUHAN manguhum Raja Joas.

²⁵Margasa ma si Joas banga. Jadi dung kehe tentara ni musu i, mambaen kompolotan ma dua halak pagawenia. Dibunu halahi ma ia di podomanna i gabe balos ni na nibununia anak ni Malim Joyada i. Dikuburkon ma si Joas di Kota Ni si Daud, tapi nada di kuburan ni raja-raja. (

²⁶Si Zabad anak ni si Simeat boru Amon dohot si Josabad anak ni si Simrit boru Moab i do na mambaen kompolotan i mangalo si Joas.)

²⁷Di Buku Tafsiran ni Buku Ni Raja-raja dapot do disi angka barita salaho tu angka dakdanak ni si Joas, angka alatan na so denggan salaho tusia, dohot na nipadenggannia Bagas Ni Debata, dapot do di bagasan hatorangan ni Buku Ni Raja-raja i. Digonti anaknia si Amasia ma Raja Joas.