Read Batak Angkola 2 JUJUR TAON 26 Bible Online

2 JUJUR TAON 26 - Batak Angkola bible

2 JUJUR TAON 26

¹Dung marujung ngolu ni si Amasia, sude ma rayat ni Juda mamili si Usia anaknia i gabe raja. Marumur onom bolas taon ma ia di hatiha i. Si Jekolia do inangnia, boru Jerusalem. Lima pulu dua taon lolotna mamarenta ia di Jerusalem. Ia do na mambuat kota Elot mangulahi dohot mambangunsa.

⁴Songon amangnia laing dipatupa si Usia do na pasonangkon roha ni TUHAN.

⁵Si Zakaria do panuturinia domu tu soal partondion. Salolot di ngolu ni si Zakaria, setia do si Usia maribadat tu TUHAN, jadi gabe dipasupasu TUHAN do ia.

⁶Marporang ma si Usia mangalo halak Pilistin. Ditolbak ia ma angka tembok ni kota Gat, Jabne dohot Asdod lalu dipajongjong ia ma angka kota na marbenteng di lambung ni Asdod dohot di luat na asing di Pilistin.

⁷Ditolong Debata do ia manaluhon halak Pilistin, halak Arab na maringanan di Gurbaal dohot halak Meunim.

⁸Manggarar pajak do halak Amon tu si Usia. Mur martamba ma kuasonia jabat tarbonggal goarnia lalu tu Mesir.

⁹Laho patoguhon kota Jerusalem, dipajongjong si Usia ma palas-palas di Pintu Horbangan Suhi, di Pintu Horbangan Lombang dohot di belohan ni tembokna i.

¹⁰Laing dipajongjong ia muse ma angka palas-palas na marbenteng di luat padang-padang jana dihuar ia bahat sumur hara ni bahatna pahan-pahanannia di angka partoran na hornop bope di tano napa na toruk na di sabola Hasundutan. Dibaen tartarik do rohania tu partanian, dianjurkon ia do tu rayat i anso manyuan anggur di angka luat na mardolok dohot manggarap luat na napu.

¹¹Adong do tentara ni si Usia bahat na sai tongtong hobas marporang. Muda maju halahi marporang, dietong do bahat ni angka pasukan i jana disurat si Jeiel ma i dohot si Maaseya, angka sekretaris ni raja, na dipimpin ni si Hanaya, i ma sada halak sian anggota stap ni raja i.

¹²Pungu ma sude tentara i 307.500 halak parajurit na bolas marporang di raja i, 2.600 halak ma komandan na mamimpin halahi.

¹⁴Dipasingkop si Usia do di tentarania i parince, tombak, kupia baja, baju bosi, sior dohot panah songon i dohot batu.

¹⁵Dipauli angka na malo di soal sinjata na di Jerusalem do angka alat-alat laho manembakkon anak ni panah dohot angka batu na godang-godang sian palas-palas dohot sian angka suhi-suhi ni tembok ni kota i. Tarbonggal do si Usia sanga na di dia jana gabe markuaso situtu ma ia dibaen diurupi Debata do ia antong.

¹⁶Dung gogo Raja Usia gabe ginjang ma rohania, jana i ma na maroban ia tu hasegoan. Dilanggar ia ma parenta ni TUHAN Debatania, harana masuk ma ia tu Bagas Ni Debata laho manutung dupa di ginjang ni langgatan pardupaan.

¹⁷Tapi diihutkon Malim Asarya ma ia dohot salapan pulu malim ni TUHAN na asing angka na gogo-gogo

¹⁸laho mangalo pambaenanna i. Didok halahi ma, “Di raja i na hami parsangapi! Nada adong hak ni raja i manutung dupa di TUHAN. Tugas ni angka malim pomparan ni si Harun do i, harana halahi do na marhasurungan tusi. Ditadingkon raja i ma inganan na badia on! Ma dialo raja i TUHAN Debata, jana nada ditolopi Ia be raja i.”

¹⁹Topet ma jongjong raja i di lambung ni langgatan pardupaan na di Bagas Ni Debata maniop panutung ni dupa di tanganna i. Muruk ma ia tu angka malim i, jana tompu ma ro nyae kulit na jorbut di bohinia i.

²⁰Tarsonggot ma si Ahasia dohot malim na deba nari i mangaligi tusia, gabe dipaksa halahi ma ia manadingkon Bagas Ni Debata i. Diompoti ia ma haruar dibaen madung hona uhum ni TUHAN ia.

²¹Hara ni nyaenia i dipaasing ma Raja Usia di bagasan sada bagas jana tinggal disi ma ia lopus mate. Nada dipaloas be ia masuk tu Bagas Ni Debata. Sude karejo ni pamarentaon gabe dibuat si Jotam anaknia ma i.

²²Barita na asing salaho tu pamarentaon ni Raja Usia madung disuratkon Panurirang Jesaya anak ni si Amos.

²³Di na marujung ngolu ni si Usia, dikuburkon ma ia di tano na di lambung ni kuburan ni raja-raja, tapi nada di kuburan i sandiri, hara ni na marnyae kulit na jorbut ia. Gabe raja ma anaknia si Jotam manggontihon ia.