Read Batak Angkola 2 JUJUR TAON 27 Bible Online

2 JUJUR TAON 27 - Batak Angkola bible

2 JUJUR TAON 27

¹Marumur dua pulu lima taon ma si Jotam di na gabe raja ia, jana onom bolas taon honokna ia mamarenta di Jerusalem. Si Jerusa do goar ni inangnia boru ni si Zadok.

²Dipatupa ia do na pasonangkon roha ni TUHAN, mangihutkon tiruan ni amangnia. Hum on tutu, nada manutung dupa ia di Bagas Ni Debata songon na nibaen ni amangnia i. Tapi haru songon i pe, laing dipupu rayat i do na mardosa.

³Dibangun si Jotam ma Pintu Horbangan Utara di Bagas Ni Debata jana dipatogu ia ma tembok Ofel na di Jerusalem.

⁴Dipajongjong ia ma angka kota di partoran Juda dohot angka benteng maradu palas-palas di harangan.

⁵Diporangi jana ditaluhon ia ma raja ni Amon rap dohot tentarana i, lalu dipaksa ia ma halak Amon manggarar pajak. Tolu taon lolotna marturut-turut angkon manggarar pajak halahi ganop taon 3.400 kilogram perak, 1.000 ton gandum dohot burir-burir 1.000 ton.

⁶Mur tamba ma kuaso ni si Jotam angke setia do ia jana burju mangoloi tu TUHAN Debatania.

⁷Angka na masa na asing di pamarentaon ni si Jotam, angka parporangan dohot angka haputusan na nibaennia, madung disuratkon sudena i di bagasan Buku Sejarah Ni Raja-raja Israel dohot Juda.

⁸Marumur dua pulu lima taon ma si Jotam di na gabe raja ia, jana onom bolas taon lolotna ia mamarenta di Jerusalem.

⁹Marujung ma ngolunia jana dikuburkon di Kota Ni si Daud, jadi gabe raja ma anaknia si Ahas manggontihon ia.