Read Batak Angkola 2 JUJUR TAON 29 Bible Online

2 JUJUR TAON 29 - Batak Angkola bible

2 JUJUR TAON 29

¹Marumur dua pulu lima taon si Hiskia di na gabe raja ia di Juda jana dua pulu sambilan taon lolotna ia mamarenta di Jerusalem. Si Abia do goar ni inangnia boru ni si Zakaria.

²Dibaen si Hiskia do na pasonang roha ni TUHAN mangihutkon tiruan ni ompuna Raja Daud.

³Di bulan sada di taon parjolo si Hiskia mamarenta, dibuka ia ma angka pintu ni Bagas Ni Debata jana disuru ia ma halak padenggankonsa.

⁴Disuru ia ma angka malim dohot halak Levi marlagut di alaman na sabola Habincaran ni Bagas Ni Debata i,

⁵jana manghobari ma ia tu halahi disi. Didok ia ma, “Hamu angka halak Levi, angkon manghapunjungkon diri do hamu tu TUHAN, jana paiaskonmunu Bagas Ni TUHAN, Debata ni ompumunu i. Angkon paoroton do sude na pahodarkon bagas i.

⁶Nada setia angka ompunta tu TUHAN Debatanta jana dibaen halahi do na so pasonangkon rohaNia. Nada dirohahon halahi be Ia jana inganan parmiananNia i pe nada be dipardulihon halahi.

⁷Ditutup halahi do angka pintu ni Bagas Ni Debata jana diintopi halahi angka lampuna. Jana nada adong be na manutung dupa sanga na manghaulkon haul situtungon di Bagas Ni Debata.

⁸Jadi di bagasan hamuruhonNa, diuhum TUHAN ma Jerusalem dohot Juda. Jana torang do diboto hamu sudena, songon dia songgotna dohot jorbutna pangkilalaan ni sude halak di tindakan ni TUHAN i.

⁹Marmatean angka amanta di parporangan jana angka dakdanak dohot dongan sabagasta dioban gabe taban.

¹⁰Saonnari au giot mambaen parjanjian dohot TUHAN, Debata ni Israel, anso ulang muruk be Ia tu hita.

¹¹Hamu angka dakdanakku, ulang be palambat-lambat hamu, angke hamu do na nipili ni TUHAN laho manutung dupa diSia dohot na laho mamimpin rayat i maribadat tuSia.”

¹²Angka halak Levi na ro di hatiha i i ma: Sian horong Kehat: Si Mahat anak ni si Amasia dohot si Joel anak ni si Asarya Sian horong Merari: Si Kis anak ni si Abdi dohot si Asarya anak ni si Jehaleleel Sian horong Gerson: Si Joah anak ni si Zima dohot si Eden anak ni si Joah Sian horong Elisafan: Si Simri dohot si Jeiel Sian horong Asap: Si Zakaria dohot si Matania Sian horong Heman: Si Jehiel dohot si Simei Sian horong Jedutun: Si Semaya dohot si Usiel.

¹⁵Dung i dipalagut halahi ma angka halak Levi na deba nari, jana mangias diri ma halahi. Dung salpu i, domu tu parenta ni raja i masuk ma angka malim tu Bagas Ni Debata i jana dipungka halahi ma paiaskonsa mangihutkon Tona Ni TUHAN. Sude na hodar diparuar ma i tu alaman ni Bagas Ni TUHAN i. Sian i dioban halak Levi ma i tu Rura Kidron na di ruar ni kota.

¹⁷Di tanggal sada bulan sada ma dipungka karejo i. Di tanggal salapan sidung ma halahi na paiaskon sude alaman lopus tu bagian parjolo ni Bagas Ni Debata. Dung i salapan ari muse dipaias halahi ma bagas i sudena lopus sidung di tanggal onom bolas bulan i.

¹⁸Jadi dilapurkon halak Levi i ma tu Raja Hiskia, “Madung sidung hami paias Bagas Ni Debata i sudena, dohot langgatan ni haul situtungan, meja inganan ni roti sihaulkonon tu TUHAN, dohot sude parkokasna.

¹⁹Madung hami buat muse angka parkokas na nipaduru ni Raja Ahas di na so dirohahon ia be TUHAN di hatiha mamarenta dope ia. Sude parkokas i madung hami hapunjungkon mangulahi tu TUHAN, jana saonnari di jolo ni langgatan i do i.”

²⁰Nada pola marlolot-lolot dipainte Raja Hiskia, dipalagut ia ma angka hatobangon ni masarakat, lalu kehe ma halahi tu Bagas Ni Debata i.

²¹Dibuat halahi ma pitu lombu jantan, pitu biri-biri, pitu anak ni biri-biri, dohot pitu hambeng, sipakeon baen haul pangampuni ni dosa ni keluarga ni raja dohot rayat ni Juda, dohot laho mangiasi Bagas Ni Debata i. Dung i disuru raja i ma angka malim pomparan ni si Harun manghaulkon angka pahan-pahanan i di ginjang ni langgatan gabe haul situtungon.

²²Mula-mulana disambol angka malim i ma pahan-pahanan i jana diduruskon halahi ma mudarna i di langgatan. Laing songon i muse ma dibaen halahi biri-biri na pitu dohot anak ni biri-biri na pitu i.

²³Ujungna dibuat halahi ma angka hambeng i jana dioban halahi ma i tu raja dohot rayat na maribadat i disi. Dipayakkon halahi ma tangan ni halahi be tu ginjang ni angka hambeng i.

²⁴Dung salpu i disambol ma angka hambeng i jana mudarna i diduruskon ma di langgatan i gabe haul pangampuni ni dosa ni sude rayat i. Dibaen halahi ma songon i hara ni na niparentahon ni raja i anso baenon haul situtungon dohot haul pangampuni ni dosa di sude rayat ni Israel.

²⁵Hombar tu panogu-noguon na nilehen ni TUHAN tu si Daud marhite si Gad, panurirangNia dohot Panurirang Natan, dibaen raja i ma halak Levi di Bagas Ni Debata laho mamiltik hasapi dohot gambus,

²⁶songon na nipake ni si Daud. Songon i muse ma angka malim na marsarune.

²⁷Dilehen si Hiskia ma tandana paboa na giot mulaan ma upacara na pasahatkon haul i. Jadi taran na manghaulkon haul i, mamungka ma marende angka jolma i mamuji TUHAN, jana angka parmusik pe dipalu ma sarune dohot angka musik na deba nari i.

²⁸Ungkap ma marsomba Raja Hiskia dohot halak na adong disi tu TUHAN jana torus ma marende angka parende jana parmusik torus marmusik lopus abis sude haul i mosok.

³⁰Disuru raja dohot angka hatobangon ni rayat i ma endehonon ni angka halak Levi i puji-pujian tu TUHAN na nikarang ni si Daud dohot Panurirang Asap. Marjop ni roha situtu ma sude jolma i na marende i lalu marsinggang manyomba Debata.

³¹Dung i mandok hata ma si Hiskia, “Dibaen madung ias hamu saonnari, jadi na gabe songon haul tarimakasimunu, angkon lehenonmunu do haul tu TUHAN.” Jadi sude halahi mamboan angka haulna, jana adong do na sian na nionjar ni rohana mamboan angka pahan-pahanan sihaulkononkon songon pelean situtungon.

³²Dioban halahi ma pitu pulu lombu jantan, saratus biri-biri, dohot dua ratus anak ni biri-biri, lalu dihaulkon halahi ma i gabe haul situtungon di TUHAN.

³³Laing dihaulkon halahi muse dope onom ratus nari lombu jantan dohot tolu ribu biri-biri anso rap mangankon sudena na ro i.

³⁴Maotiktu do angka malim na paiaskon dirina i laho mambobahi sude pahan-pahanan i. Jadi gabe dibantu halak Levi i ma halahi, harana setiana dope halak Levi tu paraturan ni haiason. Totop ma halahi mangurupi lopus tuk bahat ni malim na mangias diri.

³⁵Tamba ni haul situtungon i, laing dihaulkon angka malim i dope tabo-tabo na sian haul tarimakasi na nipangan ni rayat i. Laing dihaulkon halahi muse do anggur na niusehon rap dohot haul situtungon i. Songon i ma pangalahona di na mangulahi dibaen ibadat di Bagas Ni Debata.

³⁶Jadi gabe sonang ma roha ni Raja Hiskia dohot rayatnia i dibaen di na sangombas sajo madung diurupi Debata halahi laho patuluskon sudena i.