Read Batak Angkola 2 JUJUR TAON 3 Bible Online

2 JUJUR TAON 3 - Batak Angkola bible

2 JUJUR TAON 3

¹Na dung ditontuhon Raja Daud hian do, anggo Bagas Ni TUHAN i angkon di Jerusalem do dibangun, di Dolok Moria, i ma di pardegean ni gandum ni si Arauna halak Jebus i. Dipungka Raja Salomo ma pambangunan ni Bagas Ni TUHAN i

²di bulan paduahon di taon paopatkon ia mamarenta.

³Ginjang ni Bagas i dua pulu pitu meter jana bidangna sambilan meter.

⁴Ginjang ni ruang na parjolo sarupa dohot bidang ni bagas i, i ma sambilan meter. Gincatna lima pulu opat meter. Sian bagasan ni ruangan i dilampis do dohot sere na polin.

⁵Ruang tongana i dipapani do dohot hayu sampinur Libanon jana dilampis dohot sere na matobang na diukir dohot gambar ni bona ni harambir dohot hiasan na marrangging-rangging.

⁶Dihias raja i ma bagas i dohot batu intan na jeges-jeges rap dohot sere na diparo sian tano Parwaim.

⁷Laing dipake ia do sere i mangalampisi angka tembok ni Bagas Ni TUHAN i, angka balokna, angka pamalpal ni pintu dohot di angka pintuna i. Diukir do angka tembokna i dohot gambar ni kerub.

⁸Bilik parbagasanna i, i ma na margoar Bilik Na Sun Badia, sambilan meter ginjangna jana bidangna sambilan meter, sarupa dohot bidang ni Bagas Ni TUHAN i. Dua pulu ton sere ma dipake laho mangalampis angka tembok ni Bilik Na Sun Badia i

⁹dohot lima ratus pitu pulu gram sere laho mambaen paku. Angka tembok ni kamar-kamar na di tirket parginjang i pe dilampis do dohot sere.

¹⁰Laing disuru raja i do angka parkarejo i mambaen dua patung ni kerub sian logam, na nilampisan muse dohot sere jana dipasang ma i palambung dohot Bilik Na Sun Badia i mangadop tu pintu. Rap marhabong na mangirbang, ginjangna 2,2 meter, padais ma ujung ni na sada di tonga-tonga ni ruangan i jana ujung na sabariba nari lalu ma i tu tembok na di siamun dohot na di siambirang. Jadi sambilan meter ma ginjang ni angka habongna i, i ma sabidang ni ruangan i.

¹⁴Laing dibaen do tire di Bilik Na Sun Badia i, i ma sian abit linen dohot abit na asing na rata langit, na bunga torung dohot na rara. Dihiasi do tirena i dohot gambar ni kerub.

¹⁵Dibaen raja i ma dua tiang rap lima bolas satonga meter gincatna, lalu dipajongjong ia ma i di jolo ni Bagas Ni TUHAN i. Ganop tiang i adong do kapala tiang 2,2 meter gincatna.

¹⁶Dipajeges do kapala ni tiang i dohot hiasan na dibaen sian loyang, songon rante na dibayu ma i mardongan saratus batu ni dalimo.

¹⁷Dipajongjong ma tiang i di lambung sabola siambirang dohot siamun ni pintu laho masuk tu Bagas Ni TUHAN i; na sabola Selatan i digoari ma i Jakin,[1] jana na sabola Utara i, digoari ma i Boas.[2]