Read Batak Angkola 2 JUJUR TAON 30 Bible Online

2 JUJUR TAON 30 - Batak Angkola bible

2 JUJUR TAON 30

¹Nada tarbaen rayat i dope laho patupahon Pesta Paskah topet di hatihana di bulan sada i, dibaen maotiktu dope angka malim na mangias diri jana nada sadia bahat dope halak na marlagut di Jerusalem. Jadi hara ni i, satahi ma Raja Hiskia dohot angka pagawenia maradu sude halak na maringanan di Jerusalem laho mamestahon Paskah i di bulan dua, jana sonang do roha ni halahi sudena di sangkap i. Jadi ditongos raja i ma surat tu sude jolma na adong di Israel sude dohot Juda. Songon i muse tu Efraim dohot Manase. Diundang ma sude bangso Israel, sian Berseba sahat tu Dan anso sude ro tu Jerusalem laho mamestahon Paskah i laho pasangapkon TUHAN, harana nada ro dope halahi sude rap mamestahon songon naung tarsurat di tona ni si Musa. Na so jungada songon i riburna nipestahon Paskah i.

⁶Hara ni parenta ni raja i dohot angka pagawena, disuru ma angka utusan tu sude Juda dohot Israel laho maroban angka surat i, songon on ma hatana, “Hamu halak Israel! Madung malua hamu sian kuaso ni halak Asur. Saonnari sai mulak ma hamu tu TUHAN, Debata na nisomba ni si Abraham, si Ishak dohot si Jakob, anso mulak muse Ia tu hamu.

⁷Ulang ma hamu songon angka ompumunu i dohot angka halak Israel na asing na so setia tu TUHAN Debatana i. Madung diida hamu sandiri sanga songon dia dokdokna panguhumiNia tu halahi.

⁸Ulang pajogal roha hamu songon halahi i, tapi burju hamu mangoloi TUHAN. Ro ma hamu tu Jerusalem, tu Bagas Ni Debata na nihapunjungkon ni TUHAN Debatamunu diSia sandiri salolot-lolotna. Beta ma hita maribadat tuSia anso laing mombun ma da murukNia maradopkon hamu.

⁹Muda dirohahon hamu TUHAN, gabe maribo ni roha ma angka halak na maroban koum sisolkotmunu tu habuangan i jana suruonna ma halahi mulak mangulahi. Debata na burju jana paribo roha do TUHAN Debatamunu i; ParrohahononNia do hamu muda diparrohahon hamu Ia.”

¹⁰Di na kehe angka utusan i sian angka kota na di luat ni Marga Efraim dohot Manase lopus tu Utara lalu tu luat ni Marga Zebulon, dipartatai halak ma halahi jana dilayasi.

¹¹Tapi laing adong do antong halak na sian Marga Aser, Manase dohot Zebulon na ra ro tu Jerusalem.

¹²Di Juda pe markarejo do Debata jana dipasada Ia do roha ni rayat i anso marsitutu mangoloi hagiot ni Debata marhite na mangihutkon parenta ni raja i dohot angka pagawena i.

¹³Di bulan dua marlagut ma bahat rayat di Jerusalem laho mamestahon Ari Pesta Roti Na So Marragi.

¹⁴Dibuati halahi ma angka langgatan na di Jerusalem laho manghaulkon haul dohot manutung dupa tu angka debata jana diambungkon halahi ma i tu Rura Kidron.

¹⁵Di tanggal opat bolas bulan i disambol halahi ma angka biri-biri sihaulkonon gabe haul Paskah. Angka malim dohot halak Levi na hodar dope gabe maila situtu ma. Mangias diri ma halahi anso bolas dohot manghaulkon haul situtungon di Bagas Ni Debata.

¹⁶Marsibuat ingananna be ma halahi mangihutkon hatontuan na adong di Uhum Ni si Musa. Dipasahat halak Levi ma mudar ni angka haul i tu angka malim, lalu diduruskon ma i tu langgatan.

¹⁷Bahat dope halak na ro i tusi na so mangias diri, jadi gabe nada tola halahi manyambol biri-biri sibaenon haul Paskah i. Jadi hara ni i gabe angka halak Levi i noma na mangkarejohon i di halahi dohot manghaulkonsa tu TUHAN.

¹⁸Tamba ni i, bahat do halak Efraim, Manase, Isakar dohot Zebulon na ro so jolo mangias dirina. Jadi nada digohi halahi dope angka aturanna, hape dohot halahi mamestahon Paskah i. Jadi gabe ditangiangKon Raja Hiskia ma halahi, ning ia ma,

¹⁹“TUHAN, Debata sombaon ni ompunami, sian hadengganan ni rohaMi, sai ra ma Ho nian mangampuni halak na mulak tu Ho sian sasude rohana, haru pe na so mangias dirina dope halahi.”

²⁰Ditangihon TUHAN do tangiang ni si Hiskia i. Diampuni Ia ma angka jolma i jana nada hona uhumNia halahi.

²¹Pitu ari lolotna, di bagasan jop ni roha godang, pitu ari lolotna angka jolma na marlagut di Jerusalem i mamestahon Ari Pesta Ni Roti Na So Marragi i. Ganop ari sai dipuji-puji halak Levi dohot angka malim i ma TUHAN sian situtu ni rohana be.

²²Malo-malo do antong angka halak Levi i mamimpin ibadat tu TUHAN, jabat do dipuji si Hiskia halahi. Dung adong pitu ari lolotna halahi na manghaulkon haul i dohot na mandok tarimakasi i tu TUHAN, Debata ni ompu ni halahi,

²³diputuskon halahi ma laho manoruskon pesta i pitu ari nari. Jadi dipestahon halahi ma i mangulahi marmoga-moga.

²⁴Disumbangkon Raja Hiskia ma saribu lombu jantan dohot pitu ribu biri-biri jana ia dohot angka pagawai ni si Hiskia manyumbangkon 1.000 lombu jantan dohot 10.000 biri-biri. Dilehen ma sude pahan-pahanan i tu rayat i anso disambol jana dipangan. Bahat sajo do malim na mangias dirina.

²⁵Martua do pangkilalaan ni sude rayat ni Juda, angka malim, angka halak Levi dohot angka halak na marroan i sian Utara, maradu angka halak sileban na dung hot maringanan di Israel dohot di Juda.

²⁶Ribur sajo do Jerusalem, harana mamungka sian hatiha ni Raja Salomo anak ni si Daud i, na so unjung dope masa tarjadi na songon on.

²⁷Dipangido angka malim dohot halak Levi ma pasupasu ni TUHAN di rayat i, jana sian inganan parmianan ni Debata na di banua ginjang i, ditangihon Ia do tangiang ni halahi i jana dijagit Ia do pangidoan ni halahi i.