Read Batak Angkola 2 JUJUR TAON 32 Bible Online

2 JUJUR TAON 32 - Batak Angkola bible

2 JUJUR TAON 32

¹Dung dipatupa Raja Hiskia angka pangalaho na patuduhon hasetiaannia tu Tuhan, ro ma si Sanherib mamorangi Juda. Dihobuk ia ma angka kota na marbenteng jana diparentahon ia ma pasukannia anso mangarebut kota i.

²Di na tarboto tu si Hiskia na adong maksud ni si Sanherib laho manyaroso Jerusalem,

³diputuskon ia ma dohot angka pagawenia i laho manutup angka inganan ni aek na adong di ruar ni kota i, maksudna anso ulang adong dapot angka halak Asur i aek muda lalu halahi di lambung ni Jerusalem. Bahat sajo do halak na niarahon ni angka pagawe ni si Hiskia i laho manutup sude mual ni aek na mardalan tu ruar ni kota i.

⁵Jadi dipatogu raja i ma partahanan ni kota i marhite na padenggankon tembokna, pajongjongkon angka palas-palas dohot na mambangun tembok parruar. Tamba ni i dipadenggan ia dope benteng na dipajongjong di ginjang ni tano timbunan na di sabola Habincaran ni kota na lolot na di Jerusalem. Laing disuru ia dope paulion bahat sajo tombak dohot parince.

⁶Diangkat ia ma angka perwira laho mamimpin sude halaklahi na adong di kota i, jana marsuru halahi marlagut di alaman na di jolo ni horbangan ni kota i. Jadi didok ia ma,

⁷“Togu ma rohamunu jana marpos ni roha; ulang hamu mabiar tu raja ni Asur i sanga tu angka pasukanna i. Gumodang dope gogo di hita ulang pado di pihak ni halahi.

⁸Gogo ni jolma do na adong disia, tapi anggo hita adong do TUHAN Debatanta laho mangurupi jana marporang humopkop hita.” Umbege hata ni raja ni halahi i, gabe barani ma rayat i.

⁹Dung adong sanga na sadia honok dompak di Lakis dope si Sanherib dohot pasukannia i, disuru ia ma utusan tu si Hiskia dohot tu rayat ni Juda di Jerusalem laho palaluhon tona songon on,

¹⁰“Au si Sanherib raja ni Asur, giot marsapa au sanga hara ni aha do umbaen na songon i pulukmunu laing tongtong tinggal di Jerusalem na hona hobuk i.

¹¹Adong he na nidok ni si Hiskia do na giot paluaon ni TUHAN Debatamunu i hamu sian kuasonami? Ulang hamu porsaya disi, harana na paoto-otohon hamu sajo do i. Na giot padiaronnia do hamu mate tangkuraparon dohot manguas.

¹²Ia ma da ibana na mangaroncohon angka inganan paribadatan dohot angka langgatan ni TUHAN, lalu disuru ia halak Juda dohot Jerusalem marsomba dohot manutung dupa di sada inganan sajo.

¹³Adong he na so diboto hamu dope na hubaen dohot angka ompu na umpompar au maradopkon angka bangso na asing? Na so unjung dope adong angka debata ni bangso na asing na paluahon bangsona sian kuaso ni raja ni Asur!

¹⁴Ise ma sian halahi na jungada patupahon songon i? Jadi mungkin ma he Debatamunu i paluahon hamu?

¹⁵Ulang padiar hamu rajamunu i manggabusi dohot paoto-otohon hamu! Ulang haporsayai hamu i! Harana nada unjung debata ni bangso na dia pe sanggup paluahon bangsona anggo sian kuaso ni raja ni Asur. Pasti dohot Debatamunu i pe indangkan na margogo i paluahon hamu!”

¹⁶Bahat dope hata na nidok ni angka utusan ni Asur i laho mangalayasi TUHAN Debata dohot si Hiskia, naposo ni TUHAN i.

¹⁷Dibaen Raja Asur muse dope surat mangalo TUHAN, Debata na nisomba ni halak Israel. Songon on ma hata ni surat i, “Laing sarupa do Debata ni si Hiskia i dohot debata ni sasude bangso na asing, nada margogo i paluahon bangsona sian kuasongku.”

¹⁸Disurak-surakkon angka utusan ni Asur i ma sudena i di hata Ibrani laho mambiar-biari dohot pagalehon semangat ni angka halak Jerusalem na adong di ginjang ni tembok ni kota i. Jadi songon i ma dibaen halak Asur i laho manaluhon kota i.

¹⁹Dihatahon halahi ma taringot tu Debata na disomba di Jerusalem dos do i dohot angka debata ni bangso na asing, i ma angka patung na nipauli ni tangan ni jolma.

²⁰Jadi gabe martangiang ma Raja Hiskia dohot Panurirang Jesaya anak ni si Amos. Pio-pio ma halahi tu Debata.

²¹Jadi disuru TUHAN ma sada surusuruan mamatehon angka parajurit dohot angka perwira ni Asur i. Jadi ila sajo ma roha ni raja ni Asur i mulak tu tanonia. Sanoli dompak di bagasan bagas ni debatania i ia, ro ma sanga na piga halak sian angka anaknia sandiri mamunu ia dohot podang.

²²Songon i ma carana dibaen TUHAN paluahon Raja Hiskia dohot halak Jerusalem sian kuaso ni si Sanherib raja ni Asur i dohot sian musu ni halahi na asing i. Dilehen TUHAN ma tu halahi pangalaho na denggan mardongankon angka negara-negara hombar balok ni halahi.

²³Bahat do halak marroan tu Jerusalem maroban haul tu TUHAN dohot angka hadiah di si Hiskia, jadi mamungka sian i gabe dipasangap sandok bangso ma ia.

²⁴Laing hira-hira di hatiha i, marnyae ma Raja Hiskia hancit jabat do giot marujung. Martangiang ma ia, jadi dilehen TUHAN ma tanda disia bahaso na malum dope ia.

²⁵Tapi hara na ginjang rohania, nada mandok tarimakasi ia hara ni hamalumon na nilehen ni Tuhan i tusia. Jadi hara ni i gabe muruk ma TUHAN tu Juda dohot Jerusalem.

²⁶Tapi ujungna patoruk rohana do si Hiskia dohot angka halak Jerusalem, jadi gabe nada didalankon be uhuman i salolot mangolu si Hiskia.

²⁷Gabe sun ma kayo ni Raja Hiskia, jana sude halak pasangapkon ia. Dibaen ia ma angka kamar inganan panyimpanan ni artania i, i ma: sere, perak, angka batu intan, parmasak, parince dohot angka barang-barang sigodang arga na asing.

²⁸Adong do gudangnia inganan ni barang-barang suha ni tanonia, i ma: gandum, anggur dohot miak zetun; songon i muse angka bara ni lombu dohot angka biri-birinia.

²⁹Na lobi bahat i, tamba ni i dipungka ia do bahat kota. Bahat sajo do sinadongan na nilehen ni Debata tusia.

³⁰Raja Hiskia ma na mambaen tahalak ni mata mual Gihon, jana dipadalan ia ma aekna i mamolus bubusan di bagasan tano tu bagasan kota Jerusalem. Manjadi do sude na nikarejohon ni si Hiskia.

³¹Jana dompak diparro ni angka utusan na sian Babel i laho manyapai tusia taringot tu hamamalumnia na pahomang roha i, dipadiar TUHAN ma si Hiskia mambaen lomo ni rohana sandiri laho manguji rohania.

³²Barita na asing salaho tu Raja Hiskia dohot taringot tu holong ni rohania maradopkon TUHAN, disuratkon do i di bagasan Buku Halumbaan Na sian Debata Tu Panurirang Jesaya Anak Ni si Amos, dohot di bagasan Buku Sejarah Ni Raja-raja Juda dohot Israel.

³³Marujung ma ngolu ni si Hiskia, lalu dikuburkon ma ia di panangkohan na di tano kuburan ni raja-raja. Sude do rayat ni Juda dohot Jerusalem mangalehen hasangapan na godang tusia di parmatenia i. Gabe raja ma anaknia si Manase manggontihon ia.