Read Batak Angkola 2 JUJUR TAON 34 Bible Online

2 JUJUR TAON 34 - Batak Angkola bible

2 JUJUR TAON 34

¹Marumur salapan taon ma si Josia di na gabe raja ia di Juda, jana tolu pulu sada taon lolotna mamarenta ia di Jerusalem.

²Dipatupa ia do na pasonangkon roha ni TUHAN, diihutkon ia do tiruan ni Raja Daud ompuna i, jana dihaburjuhon ia do mangoloi uhum ni Debata sian sude rohania.

³Dung salapan taon ia gabe raja, dompak bajar dope ia, mamungka ma si Josia marsomba Debata na nisomba ni Raja Daud ompunia i. Dung opat taon mamungka ma dironcohon ia angka inganan parsombaan ni gana-ganaan, angka patung ni Debata Asera, dohot angka gana-ganaan na asing.

⁴Diropuk-ropuk anak bua ni si Josia i ma angka patung dohot gana-ganaan i lalu diambungkon ma abuanna i tu ginjang ni kuburan ni angka jolma na mangahaulkon haul tu angka gana-ganaan i. Diparrumpakkon halahi ma angka langgatan ni Baal dohot angka langgatan pardupaan na adong disi.

⁵Dung i ditutung si Josia ma di ginjang ni langgatan i holi-holi ni angka malim na mangoloi angka gana-ganaan i. Jadi songon i ma gabe ias mangulahi mangihutkon ugamo, Juda dohot Jerusalem.

⁶Laing songon i muse do dibaen ia di angka kota dohot angka luat na dung hancur di Luat Manase, Efraim dohot Simeon, lalu tu Naftali na di Utara.

⁷Dirumpakkon si Josia ma angka langgatan dohot patung Asera na adong di sude Harajaan Utara, lalu diduda ia ma angka patungna i dohot sude langgatan i. Dung i mulak ma si Josia tu Jerusalem.

⁸Di taon pasalapanbolaskon mamarenta si Josia, dung ias sude dihais ia parsombaan tu gana-ganaan sian Bagas Ni TUHAN dohot sian sude tano i, disuruhon ia ma tolu halak laho padenggankon Bagas Ni TUHAN Debata i. I ma si Safan anak ni si Asalia, si Maaseya gubernur ni Jerusalem, dohot si Joah anak ni si Joahas, sada pagawe tinggi.

⁹Dipasahat angka halak Levi na manjago pintu ni Bagas Ni Debata i ma tu Malim Godang Hilkia hepeng na nipalagut ni halahi i. I ma hepeng na sian halak Efraim, Manase dohot na sian rayat na deba nari na di Harajaan Utara, maradu na sian rayat ni Juda, Benyamin dohot Jerusalem.

¹⁰Dung i dipasahat Malim Godang Hilkia muse ma hepeng i tu sitolu halak na ditugaskon laho mangawasi na padenggankon Bagas Ni Debata i. Dung i dilehen halahi muse ma hepeng i

¹¹tu angka tukang hayu dohot tukang bangunan sitobuskonon tu batu dohot hayu laho padenggankon angka bangunan na dipadiar-diar ni angka raja ni Juda i marsegoan.

¹²Tigor-tigor do roha ni angka halak na markarejo padenggankon i. Opat halak Levi na mangapalai halahi: Si Jahat dohot si Obaja na sian horong Merari, si Zakaria dohot si Mesulam sian horong Kehat. Angka halak Levi, na malo-malo sude marmusik

¹³dilehen ma karejona mangawasi na maroban bahan-bahan mangapalai parkarejo di angka parkarejoan na marragam, mangakarejohon administrasi dohot na manjago pintu.

¹⁴Dompak na mangharuarkon hepeng sumbangan i sian inganan panyimpananna dapot si Hilkia ma Buku Tona Ni TUHAN, i ma angka uhum na nilehen ni Debata tu si Musa.

¹⁵Didok si Hilkia ma tu si Safan, “Dapot au Buku Tona Ni TUHAN di Bagas Ni TUHAN.” Lalu dilehen ia ma buku i tu si Safan,

¹⁶jana dijagit si Safan ma buku i lalu kehe ma ia mandapotkon raja i jana didok ia ma, “Madung hami patulus sude na niparentahon ni raja i.

¹⁷Madung hami buat hepeng na disimpan i di Bagas Ni Debata i, jana hami pasahat tu angka parkarejo dohot angka pangawasna i.”

¹⁸Dung i ditambai ia muse mandok, “Dilehen si Hilkia do buku on tu au.” Jadi disise si Safan ma buku i tu raja i.

¹⁹Umbege isi ni buku i, disibakkon raja i ma pakeanna hara ni marsakna.

²⁰Jadi dilehen raja i ma parenta tu si Hilkia, si Ahikam anak ni si Safan, si Abdon[5] anak ni si Mika, si Safan sekretaris ni negara, dohot si Asaya ajudan ni raja i. Didok ia ma,

²¹“Kehe ma hamu marsapa tu TUHAN salaho tu au dohot salaho tu bangso i na tinggal dope di Israel dohot Juda. Tangkasi hamu ma salaho tu pangajaran na di buku on. Madung muruk TUHAN tu hita hara ni na so diihutkon angka ompunta hata ni TUHAN jana nada dipatulus halahi na didok di buku on angkon sipatuluson.”

²²Hombar tu parenta ni raja i, kehe ma si Hilkia dohot na deba nari i martahi tu sada anakboru na margoar si Hulda, sada halak panurirang na maringanan di parhutaan na imbaru na di Jerusalem. (Halaklahina si Sallum anak ni si Tikwah jana pahompu ni si Harhas, mangurus pakean ibadat do karejonia di Bagas Ni Debata.) Dibege si Hulda do sude na nipatorang ni halahi i.

²³Dung i disuru ma halahi mulak tu raja i paboahon tusia

²⁴hata ni TUHAN na mandok songon on: “Na ro ma Au manguhumi Jerusalem dohot sude halak kota i songon na tarsurat di buku na baru disisehon tu raja i.

²⁵Ditadingkon halahi do Au jana kehe halahi marsomba tu angka debata na asing. Pasunggul-sunggul muruk do Au tu Jerusalem, jana nada ra mombun murukKi.

²⁶Anggo salaho tu raja i sandiri, songon on do na Hudok, Au, TUHAN Debata ni Israel mandok: Dibege ho do na tarsurat di buku i,

²⁷jana hara ni i gabe manyosal jana dipatoruk ho rohamu di jolongKu. Disibakkon ho pakeanmu jana mangandungi ho hara ni marsakmu di na nibegemu ancaman na Hudok laho manguhum Jerusalem dohot halak na maringanan disi. Madung Hutangihon tangiangmi

²⁸jana uhuman na Huoban tu Jerusalem nada paroonKu be i salolot di ngolumu. PadiaronKu do ho mate di bagasan dame.” Jadi mulak ma angka na disuru i mandapotkon Raja Josia jana dipalalu halahi ma barita i.

²⁹Dipiohon Raja Josia ma sude pamimpin ni Juda dohot Jerusalem,

³⁰jana rap kehe ma halahi tu Bagas Ni TUHAN, didongani angka malim dohot halak Levi maradu sude rayat na pogos dohot na kayo. Di jolo ni halahi sudena, disise raja i ma gogo sude buku ni parjanjian na baru dapot i di Bagas Ni TUHAN.

³¹Dung i dibaen raja i ma parjanjian tu TUHAN, paboa na oloannia ma TUHAN, jana dalankononnia sian sasude roha dohot tondinia sude parenta dohot angka uhumNia, jana gohannia sude aturan ni parjanjian tu TUHAN dohot bangsoNia na tarsurat di bagasan buku i.

³²Sude halak Benyamin dohot sude halak na asing na adong di Jerusalem, disuru ia ma marjanji paboa na burju mangoloi parjanjian i. Jadi gabe diihutkon angka halak Jerusalem ma angka paraturan na di bagasan parjanjian antara ni halahi dohot Debata ni ompu ni halahi.

³³Dironcohon Raja Josia ma sudena angka gana-ganaan sihagigian na adong di angka inganan na masuk tu luat ni halak Israel. Disuru ia ma rayatnia i maribadat tu TUHAN, Debata ni ompu ni halahi. Jadi salolot di ngolu ni si Josia, sai tongtong do setia rayat i tu TUHAN.